Khovel Vaak Na hi Uh Hi

 

Thupatna

Khovel vaak na hi uh! Chih kammal pen Matthai 5:14 a Jesu thugen, Khristiante lak a Bible taang kitawi mahmah khat ahi.

Tualeh hih “Vaak-light” chih pan etsak nei kammal (metaphor) zong ahi hi. Pasian laisiangthou ah hih “Vaak” pen Gen. 1:3 na ah, “Vaak om hen” chih Pasian thupiakna tungtawn in a hung om masa pen a, tualeh Bible bu tawpna, Kilakna 21:23 a i muhbang un, Jerusalem Thak pen, “Pasian thupina in a taanvaak hi” chih ahi a, hih “Vaak” pen ahihleh Pasian ompihna, thudik (truth) taklatna, siangthouna suklatna, chihte etsakna leh limlahna ahi.

Hichibang ahihlai in i Toupa Jesu’n a nungzuite kiang a, “Khovel vaak na hi uh” (Matt. 5:14) a chihlai in, a nungzuite mi hihna (identity) pen amah a zungkha leh hinna gui kibang nei, ahihdan a gennopna ahi. Aziak pen Amah Jesu Khrist pen “Vaak” ahi. Limtak in ngaihsun in!

 

Laisiangthou in “Vaak” Tungtaang a Genna Tamlou

“Vaak” chih kammal kimuh masakna pen ahihleh Gen. 1:3 na ahi a, “Vaak om hen” chih ahi’ tualeh hih “Vaak” pen a khonung in “Pasian pen vaak ahi a, Amah ah mialna mawngmawng a omkei hi” (1Jn. 1:5) chi in, Pasian pen “Vaak” ahihdan i muthei uh hi.

Vaak tawh kilangpan in Mialna a om a, hih mialna pen khelhna leh sihna limlahna in a kizang taangpi hi; hilezong vaak in hinna leh siangthouna tawh kisamkaihna thuktak a nei hi. Taanglai in Kumpi David in “Toupa ahihleh ka vaak leh ka hutdamna ahi; kua laau diing ka hia? (Laate 27:1) a na chi a, tualeh Laate 119:105 ah zong, “Na thu (Pasian thu) ka keeng a diing in vaak (meivaak) ahi a, ka lampi a diing in khovaak ahi” a na chi hi; a omdan pen, eite silh-le-teen a i kithuam bang ua, Pasian pen vaak a kithuam, chihna ahi a, khatvei-vei siatna buupa gawtna diing in, meikuangpi bang in zong a kilangthei zeel hi; hih pen Peter in “Lamdang, chizat-huai” a na chi hi (1Pet. 2:9); tuachiang in “Vangam (vaantung gam) in ni (sun) leh kha (moon) chihte a poimawh kei diing a, Pasian thupina in a taanvaak diing hi” (Kil. 21:23) chih ahi.

Hichibang ahihtaak leh, Laisiangthou in “Khovel Vaak na hi uh” a hung chihna pen, 1Kor. 3:16 na dungzui a, eimah sung a om kha (Pasian Kha) pen vaak ahi a, hua vaak pen taangkhiasak diing, chihna ahithei mai diam?

 

Jesu, Khovel Vaak Ahihna

John 1:4-5, “Amah ah hinna a om a, tua hinna ahihleh mihingte vaakna ahi. Vaak mial lak ah a hung vaak a, mial in amah a theikei hi.”

John 1:9, “(Jesu)… vaak diktak, mi zousiah tanvaak diing a leitung ah a hung pai ahi.”

John 8:12, “Jesu'n a kiang uah, ‘Kei leitung vaak ka hi, kei hung zuite mial ah a khawsa kei diing a, hinanleh hinna vaak a neizaw diing hi,’ achi hi.”

Cultural Background – Jesu hunlai a Judahte’n “Temple Vaaksakna” kichi pawi khat a na bawl zeel uh hi. Hih hun a kizakna mun pen ahihleh temple a numeite omna mun ahi (Judahte temple in, numei leh naupangte omna diing mun a tuam in a nei a, tualeh papite, siampute leh Pasian a diing zong, amun a tuam chiat a, hilezong a temple pen a kibang ahi). Hih numeite omna mun mial chihtak a amial chiang in, meivaak (candelabras) mun li ah a kide (vaaksak) a, hua in temple huang sungteng a salhvaak hi; tuachiang in hua vaak ah, siampute leh mipite’n laam in phatna laate a sa uh hi. Hih lungsim a nei kawm in Jesu’n a kiim a ding Farisaite kiang ah, “Kei khovel vaak ka hi,” a chi a, hichih hunlai in Judahte lungsung ah “Vaak” chih kammal pen a na omkha naikei hi. Tualeh hichi a Jesu’n a gen sawmtak pen ahihleh, na meivaak un temple huangsung bek a tanvaak a, hilezong Ke’n leitung pumpi ka tanvaak diing hi, a chihna ahi. Hih “Vaak” pen mial delhmangna diing a vanzak omsun ahi.

Tu in Ama’n hih “Vaak” puaktute hi diing in nang leh kei a hung ngansiahta hi. Jesu Khrist a diing a, khovel vaak hi sam diing in, tuni’n thupuukna na bawlthei sam diam?

 

Noute, Khovel Vaak Na Hi Uh Hi

Leitung mihgingte, “Vaak” hi ngailou diing i hihlai un, “Vaak” hihtheih na diing hamphatna i Toupa Jesu’n a hung pia hi. A chiil in: Pasian pen Vaak ahi a, Jesu zong Vaak ahi a, tu in nang leh kei zong, i Toupa Jesu’n eite sung a, a hung hintheih na diing in a hinna a hung pia a, tuachiin Amah Jesu Khrist, eite sung a hing pen ziak in Vaak i hita uh hi. Hih Vaak pen tu in eite sung ah a hingta ahihman in, i taansak diing uh ahita hi. Noute zong Vaak na hita uh hi!