Damlai Gawtmun

 

By: Pastor Thangdoulal Suantak

 

Damlai Gawtmun pen vaangsiatna leh vaangsia kisakna genna kammal leh, utlouhna munte a omna leh nna sepnate genna deuh ahi a, hih pen mi zousiah tung a tungthei sil zong ahi hi.

 

Nu-ngak meel hoihtak khat in hunkhatlai in pasal sepna nei khat a a kiteenpih a, tuachiin ta pasal thum leh numei nih a hung neita uh hi. Hibang ahihlai un, a pasal in zu a neeksan a, lawm a ngaisan a, a zi-le-tate khawtuahlou in hinkhua a hung zangta mawk hi. Hih numei in a pasal leh a tate a nusiat diing pen a ngai-ngamkei a, tuachiin a tate tawh a neek diing uh khut nna sep a zong in hinkhua a hung zangtou ua, tuachiin a tapa taak pen a hung tangvaal simsimta hi. Tuachiang in a tapa taakpen tawh sum-le-paaite zong in a hung om ua, a naute skul a kaisak uh hi. Tuachiin hih numei tapa taak pen in zi a hung nei a, sepna bawlnate tawh innsung keem in, inn nuamtak a hung bawl a, haksatna tampi tawh a inn bawl uh hung zou uh hi. Nuamtak a hinkhua zak diing a nu’n a kineplai in, hih a tapa taak pen in natna khat a hung nei a, tuachiin a hunloutak in a hung sita hi. Hibang dinmun hung tuanlou nupi nu lungsim natna pen eite gensiam a genchingtheih diing ahikei diing hi. Hibangte ahi damlai gawtmun kichi. Damlai gawtmun pen taksa thuakgimna saang in lungsung natna ahizaw hi. Taksa a gentheihna pen a thuak a nuam a, hilezong lungsung a lungzuan lungleen, leh lung liangvaitak a omna pen thuakhak mahmah diing hi.

 

A ta ngaih mahmahte nusia a, lungleengtak a hinkhua a zang nu bangzah leitung ah a om deh-aw? Ahihke’h a ta ngaih mahmahte’n a nutsiat uh nu-le-pa lungleengtak a om mi bangzah a om deh-aw? Tate’n nu-le-pate a itna uh saang in, nu-le-pate’n tate a itna uh a lianzaw hi a kichihna ka za ngaita a, a dik diing in ka gingta hi. ‘Tate pen a giitlouhna uh a saan zawh tan in ki-it deuhdeuh hi,’ chi a kigen thute zong ka za ngaita a, a dik diing in ka gingta hi. Innsung pen vaangam maleepna mun ahihtheih kawmkawm in Gawtmun maleepna mun zong hithei veve hi.

Nupa khat in a tanu uh a ngaihlouh khat tawh a kiteengsak teitei ua, tuachiin a tanu un a omna ah nuam vasalou leh haksatak in hinkhua vazang a, tuachiin suulnung leh hunlui (nunlui) ngaihna in pumtuam hi, hibang a lungsung natna pen, damlai gawtmun a omna ahi.

 

Na ut mahmah khat bawlthei lou a, lunggim leh mangbangtak a om in na omkha hiam? Na utna leh muanna mun a omkhalou in, lungzuan lungleenna tawh na hinkhua na zangkha hiam? Na it-le-ngaih tawh omkhawm theilou in na lungsim a mungmawhkha hiam? Eite Pasian pen lungmuanna Pasian ahi a, Jesu Khrist pen eite hutdamna leh eite ettawn diing a, eite a diing liiuliau a hung kipia, Pasian tapa ahi. Amah ah zaleenna a om a, lungmuanna leh khamuannate zong om hi. Tu in Amah i beelta diing a, ni danglai a i na belhdan hilou, a taktak a Amah beelta diing i hi uh hi. Tua hileh, i damlai gawtmun uh i nusethei diing uh hi. Damlai gawtmun saltanna a kipan a hutdamna pen Jesu kiang ah om hi.