Puan Thak (Savun puantual): Siamc 3:21.

 

TONGKUP-ZAITHA: BIBLE STUDY

Siamc 3:21. Puan Thak (Savun puantual): “Toupa Pasian in Adam leh a zi Evi a diing in savun puantual a bawlsak a, a silhsakta hi,” chih pen Bible a i muhdan uh ahi.

Bible ah puan thak silhsak a om Adam leh Evi bek ahikei a, “Puan thak” silhsak a om mi bangzah hiam a om hi; ama’uhte lak a tallang pen Ruth (Ruth 3:3), leh tapa taimangpa (Lk 15:11-32) ahi. Hih puan a kituamna ahihkeileh puan silhsakna in a gen nuam pen ahihleh hutdamna ahi. Ruth pen a tanpa tawh kimu diing ahih ziak in puan thak silh diing a sawl in a om a, tapa taimangpa pen a pa in puan thak tawh a na tuam hi; hih pen Adam leh Evi puan thak silhsakna tawh kibang, lungmuanna, bit kisakna leh Pasian angsung a hutdam a omna limlahna ahi (Gal, 3:26-27).

Bible a i muhtheih uh taksa khuhna khenkhatte: Adam leh Evi in ama’uh taksa khuh thei diing in theipiteh a khui ua, hua tawh a kituam uh hi, chi in Bible in a hung hilh hi. Taksa khuhmangna pen Pasian a diing a poimawh pen hikei lezong, mihing mit a et a taksa kituamna hoihtak leh ginna mit a et a, kha a diing a kithoihna or hutdamna hi diing in Pasian in ama’uhte a diing in kituamna a bawlsak hi. Hichibang ahihlai in, mihingte lak ah kha-mit vaakna a kisap luat ziak in, taksa lam bekbek a kituamna a kimuthei zaw a, tuachiin Bible ah taksa a kituamnate hibang in a na kigen hi.

Proverbs 7:10 ah, numei kizuakte puansilh a kimu a, hua puansilh in pasalte, nu leh pa kaal lunglutna tha a guan hi. Hih pen a hoihlou lam a kihilhna ahi.

Proverbs 5:18-20 ah, nupa zousiah ama’uh zi leh pasal a lungkim diing a thuhilh in a om hi (Heb. 13:4; Lev. 20:17; Isa. 20:4; 47:2,3).

2Samuel 11:2-4 ah, David in numei kisillai khat a mu a, tua in khelhna ah a puuksak hi. Numei ahihna diing bang a, a omlouh chiang in pasalte khial zeelzeel hituak hi.

Job 31:1 ah Job in, “Ka mit tawh thukhun ka bawl,” achi a hih pen numei, lunggulhna nei a enlou diing in ahi.

1Peter 3:2-6 na in, taksa a kithuamna diing (silh-le-teen) thu ah thuhilhna a hung pia a, etton diing in Sarah a hung kawkmuh hi.

Kil 3:18 ah, (figurative thugen hilezong) guaktang zumhuai nate a kilatlouh na diing a, Pasian in Adam leh Evi puan a silhsak bang a, puan i silh diing uh ahi (modelling or film starte bang a kisiam louh diing chihna ahi).

Mihingte Silh diing in Pasian in Puantual bawl: Taksa khuhmangna pen Pasian a diing a poimawh pen hi masa kei lezong, khelhna ziak a guaktanna kithei a, zumna a neitheita mihingte taksa khuhna or tuamna diing pen, Pasian a diing in zong sil poimawhtak a hung suakta hi.

Tuachiin Pasian in Pawt. 20:26; 28:39-40 ah, a nna sem siampute’n a taksa uh a dawksak diing uh phallou in a puantual diing uh a na bawlsak hi. Hih puantual pen Adam leh Evi a diing a kibawl puantual tawh kibang a gen in a om hi. (Compare Judges 3:16; 2 Sam. 10:4).

John 19:23 na a Jesu kilhlumte’n a puansilh aaisaan in a hawm uh hi. Hisung a Puan pen Greek ah CHITON a kichi a, hih pen Pasian in Adam leh Evi kiang a, a na piak puantual tawh kibang a gen in a om hi (compare Rev. 1:13)

Acts 9:39 ah, Pasian in a nna hoih sep a pomsak Dorcas kichunu in meithaite a diing a, a na bawl puante ahihleh puantualte mah ahi a, Adam leh Evi a diing a Pasian design tawh kibang a gen ahi.

Hih puantual pen Israel gam lak ah tuni dong in a na silhlai uh hi.

(Hih tawh kisai a theihbeh ut neite’n simbeh diing: Titus 2:5 “taihilh”; 2 Cor. 11:2; Luke 8:27,35; 1 Tim. 2:9,10. Matt. 5:27,28; Prov. 6:25; Phil. 4:8; Mark 7:20-23; Rom. 13:13,14; Gal. 5:19 21; 1 Pet. 4:1-4).