ISMAEL NAM 12TE

 

Ismael tanchin chih article a i na gensa mahbang un, tutung in Ismael nam sawm leh nam nihte tawh kisai a, theih diing a hoih, hilezong kuamah in a mawk genkhiat ngam ngailouh uh thu khawk taktakte, website tuamtuamte leh theihna gilzaw a na neite’n a na gelh uh article tuamtuamte en in i kikumkhawm diing uh hi.

Bangteng hitaleh, Tongkup Zaitha youtube channel memberte, Ismael nam sawm leh nam nihte tanchin, Bible tawh Kisamkaih Tanchinte ah, kung vaidawnna chibaih i Toupa Jesu min in k’ung buk masa hi.

 

ISMAEL NAM SAWM LEH NAM NIHTE

 

Hun masalai a i gensa uh Ismael Tanchin ah,

Ismael in tapa sawm-le-nih a nei a, ama’uhte a unpi un hausa (tribal chief) in, Havilah gam a kipan in Shur (Assyria pan a Egypt gamgi) dong a luahdim uh hi. Tualeh hih Ismael tapate ahihleh:

1.     Nebaioth (נְבָיוֹת Nəḇāyōṯ)

2.     Kedar (קֵדָר Qēḏār), Arab mallam gam, Persian gulf leh Sinai Peninsula kikaal gamteng thununtu Qedarites kichi namte pubul (Pa) ahi. Tradition dungzui in amah pen Quraysh namte pubul (Pa) ahi a, tuachiin Islamte kamsaang Muhammad-te pubul (Pa) ahi hi. Hih pen Ismael tapa nihna ahi.

3.     Adbeel (אַדְבְּאֵל ʾAḏbəʾēl)

4.     Mibsam (מִבְשָֽׂם Mīḇsām)

5.     Mishma (מִשְׁמָע Mīšmāʿ)

6.     Dumah (דוּמָה Ḏūmā)

7.     Massa (מַשָּֽׂא Massāʾ)

8.     Hadad (חֲדַד Ḥăḏaḏ)

9.     Tema (תֵימָא Ṯēmāʾ)

10.  Jetur (יְטוּר Yəṭūr)

11.  Naphish (נָפִישׁ Nāfīš)

12.  Kedemah (קֵדְמָה Qēḏəmā)

 

Hibang a i na gensate uh baan ah, Ismael pen Isak pian masang teng ahihkeileh a hun masalam teng, a nu leh Pa kiang ah nuamtak in a khosa a, hilezong Isak a hung piantak in, Isak tawh a hung kituak nawnkei ua, tuachiin sanggam meelma a kisuah lawhta uh hi (Hih Sanggam meelma tawh kisai a theihbeh ut na nei a ahihleh, ka google blog ah, Sanggam meelma chih article episode khat a kipan in li tan a om a, huate a na sim diing in zong k’ung ngen hi).

Tongkup-Zaitha google blog a, “Mi thupite Thugen” chih article a i na taklatna ua, D.L. Moody in, “Ka nu’n kei a hung kep bang in, mi nute’n zong a tate uh kem chiat le’uh jail (thong-inn) a om a ngaikei diing hi,” a na chih pen in gen-le-sak tampi a nei a, hua tampite lak a, numei in innsung ah tate hoihna diing leh siatna diing tawh kisai in zong mohpuakna liantak a nei chih, baihlamtak a muhtheih in a om hi. Tutung in zong Ismael pen Abraham tapa hoihtak bang a, a khankhiat diing leh a khankhiat louh diing pen anu Hagar tawh zong hoihtaknou in a na kisai-pha mahmah hi.

Awle, akhoi-abang hitaleh, i theih chiatsa uh ahih dungzui in, Isak suan-le-khaakte a kipan in Israel nam sawm leh nam nihte a hung omkhia a, tuachi-mahbang in Isak gaalpa Ismael suan-le-khaakte a kipan in zong Ismael nam sawm leh nam nihte a hung om khia a, ama’uh pen, a neulai peng ua kipan a na kidou-doute ahi ua, tuni dong khovel in tanchin ngaihnop-huai asak penpente lak a khat a suak a, hua in eite a hung hipta hi pen in a kilang hi.

Tualeh theih diing a poimawh mahmah khat ahihleh, Isak leh Ismael pen Pasian in zong a na gawm sawmkei a, tuachiin a kikhensak hi; hih unau kikhente a kipan a hung pawtkhia sahkhua thupi nihte ahihleh Christian leh Islam ahi; Pasian in bawn a na gawm sawmlouh silte eite’n zong gawm sawmdah mai ni, a chi utdan i hi.

Khaileh! Ismael nam sawm leh nam nihte tu in khoi ah a omta ua? Chihte leh ama’uhte tawh kisai thute tomkimtak in i taklat sawm diing uh hi.

Laisiangthou Genesis 25:12-18 ah, “12Hihte Abraham in Sarah silanu Egipt mi Hagar tawh a neih, a tapa Ismael suan-le-khaakte ahi. 13Hihte Is mael tapate ahi ua, a suan-le-khaakte uh tawh kituak a, a minte uh ahi: Nebaioth, Ismael tapa taak pen ahi a, Kedar, Ad beel, Mibsam, 14Mishma, Dumah, Mas sa, 15Hadad, Tema, Jetur, Nafish, leh Kedemah-teahiuhhi.16HihteIsmaelta pate ahi ua, a beh daan ua vaihawmmi sawmlenihte leh, a khua leh a giahphual daan ua a minte uh ahi. 17(Ismael dam sung kum za leh sawmthum leh sagih ahi; amah laitat in a si a, a mite lak a a kivui hi.) 18Ama'uhte Havilah a kipan Assiria zotna Egipt gaalkhat Shur tan ah a teeng uh hi; amah a tanau zousiah mai ah a sita hi,” chi in a na kigelh a, tualeh hih thu mah, 1Khangthute 1:28-31 ah zong, “28Abraham tapate: Isaac leh Ishmael ahi. 29A khangthu uhhichibang ahi: Ish mael tapa taak pen Nebaioth; tua baan ah, Kedar, Adbeel, Mibsam, 30Mish ma, Dumah, Massa, Hadad, Tema, 31Je tur, Naphish, leh Kedemah ahi uh hi. Ama'uhte pen Ismael tapate ahi uh hi,” chi in a na kigelh kiik hi.

Tualeh hih Ismael tawh kisai a Pasian kammal, tuni Ismael suan-le-khaakte hung zongsaktu pen ahihleh LST Genesis 17:20 na a kigelh, “Ishmael a diing a na gen pen, k'ung ngaikhia hi; Amah thupha ka pia diing a, khaakphatak a bawl in ka pungsak diing hi; vaihawmmi sawm-le-nihte pa ka hisak diing a, nam thupitak in ka bawl diing hi,” chih ahi. Hisung a Pasian kamchiam, Ismael pen vaihawm nam 12te pa hi diing chih pen kipatna diing in Pasian in Ismael kiang ah tapa 12 a pia a, hua a kipan in namte a hung om hi.

Tuachiin ama’uhte’n LST a i muhbang un Havilah gam a kipan in Shur dong, leh Egipt gam a kipan in Assiria dong, luahdim in a teeng uh hi. Ismael ta pasal 12te tanchin i en diing uh hi.

Ismael tapa taak pen Nebaioth (ama’uh khotual haam a Nabajoth) Namte tanchin.

Ismael tate lak a tanchin hau pen ahihleh Nebaioth ahikha diing hi.  LST Is. 60:7na dungzui in, Nebaioth namte leh Kedar namte ahihleh Belaam khawisiamte ahi uh hi. Tualeh ama’uh tegeel min pen Assiriate min khumna bu ah zong a tallang mahmah hi, chi a gen in a om hi.

Tualeh Nebaioth pen Jewish Historian Josephus kichipa in a genna ah, Nabataean kichi mi namte pen Ismael tapa taak pen, Nebaioth suan-le-khaakte ahi ua, ama’uhte ahihleh Eufatis guunpi a kipan a Tuipi San dong a teengte ahi uh hi; tualeh hibang a, a teenna mun min uh kitheihdan ahihleh “Nabatene” chih ahi, chi in a gen hi.

Tualeh Josephus in hibang a, a na gelh thute ahihleh Nabataean mite a kipan mahmah a, a na lak-khiat ahi. Tualeh hih Nabataean mi namte’n Arabbic haam a zang ua, a lai zong a Arabic mah a zang uh hi. Hichibang a, Nabataean mite haam zak pen Greek leh Roman historiante’n zong a na gen ngai uh hi.

Hih Josephus in hichibang thute a muh masang hunlai in, Assiriate sil chiamtehna laibu (record baak) khat ah, Kumpi Ashurbanipal in B.C. 668 a kipan a B.C. 663, a vaihawm hunsung in, hih Arab a om Nabataean namte a na kidoupih kha-ngai hi, chi in a na kigelh hi. Tuachiang in B.C. 703 kum in, Kaldaite honkhat leh a kiim ua gamte a kipan a mi honkhatte in Assiria a vaihawmpa Sennacherib a na dou uh hi. Tualeh kumpipa Tiglath Pilezeer III silte kichiamtehna laibu khat ah, Hagaranu zong hih kumpi Sennacherib doute lak ah a na pang hi, a chi hi. Tualeh hih Hagaranu pen Ismael nu suan-le-khaakte hi diing a gintat ahi. Hichibang a kidouna nasatak a omlai in, hih tribe-te Assiria gam a kipan in Arab gam maang ah a na taai uh hi, chih pen a na kichiamtehna dan ahi.

Hichibangteng khit in, Assiria kumpigam pen unau pasal nihte kikaal ah hawmsak a om in, sehnih suahsak ahi a, tuachiin a khat pen Babylonia a kichi a, tualeh a dang khat pen Assiria Kumpi a kichita hi. B.C. 652 kumlai in hih uta tegeel kikaal ah kidouna khat a na omkha a, tuachiin Babylonia kumpipa huhna in Kedar namte’n Assiria tumlam gamte a dou ua, hilezong zoulou in Nabaioth mite lamkaipa Natnu beel in a gaaltaai loh uh hi. A khonung in, Natnu mite tawh pangkhawm in Assiria tumlam gamgite a vadou kiik ua, hilezong a zou tuamkei uh hi; tuachiin Kedar namte lamkaipa in Natnu tapa Nuhuru a pangta hi, chi a gen in zong a om hi.

Hichibang a ama’uhte taangthu paitou-tou pen, sutzoh diing zong ahikei phial a, eite theih baihlam a gen in, A.D. 106 kumlai in, Ismael tapa taak Nebaioth suan-le-khaak, Nabataean namte, Roman leenggam nuai ah a kipia lut ua, tuachiin ama’uhte tuamna (distinctiveness) pen a mangthangta hi, chih ahi.

Kedar Namte Tanchin

I na gensa mahbang  un Kedar pen Kedar namte hung piankhiatna zungpi leh tuulpipa ahi. Tualeh hih Kedar namte pen Ismael tate lak a kidou siam, gaal-haat leh hangsante a hi uh hi. Kamsangpa Isai in hih Kedar namte tawh kisai in, Isai 21:16-17 na ah, “Nam thupi leh kidou-siam, thalkap siam mahmahte,” a hihdan uh a gen hi. Tualeh Ezekiel 27:21 na in zong, Arabia kumpite leh Kedar miliante pankhawmdante a na taklang hi.

Tualeh hih Kedar namte pen Assiriate tawh kidou tawntungte ahi uh hi. Assiriate, Neo-Babylonte, Persiate leh Roman leengte’n hih Kedar namte luahna gam, Arabia mallam gamte, sumbawlna diing a poimawh ahihdante thei in a opkhum sawm tawntung uh hi.

LST Nehemiah 2:19 na a kimu ‘Arab mi Geshem’ ahihleh Arab mallam gamte sil chiamtena laibu dungzui in, amah pen B.C 5na hunlai pawl a, Kedar kumpite lak a khat hi a theih ahi.

Tuachiang in Kedar namte sahkhua na tawh kisai in, Assiriate sil chiamtehna laibu a kigelhna ah, Sennacherib in Arabiate pasian tamkhoptak, Kedar mite khopi Dumah ah a matsak hi, a chi a, tualeh hih Kedar namte’n pasian tampi a nei ua, hua tampite lak ah a lian pen in Astarsamain kichi, thangvan zingsol aksi chih, Mesopotamiate pasian Ishtar bangbang a ngaih, leh thupi a nei uh hi. Tualeh ama’un pasian neuneu zong tampi a nei uh hi.

LST, Bible in Kedar namte tawh kisai a gen-le-sak a na neihnate ah, ama’uhte pen, mi vakvai, pemhat, omna leh teenna kichian neilou a kisuan kawikawite a na chi taangpi hi. Laate 120 na ah, lungkham kahna, chimohtak a omna muhtheih in a om a, tuachiin hih thu gelhpa Kumpi David in, “Kedar gam buuktate a teeng diing leltak a, Meshek gam a ka vakhualhawh khaak pen, ka dah mahmah hi,” a na chi hi. Isai 42:11 na in zong, Kedarte teenna khuate zong Pasian phat diing in a phuut hi. Jeremiah 2:10 na in zong, Israel namte kiang ah, “Sapras tuikual gamte kaan in va-en un, Kedar ah mi sawl unla, ama’un pilvangtak in va-enchian uh hen; hichibang sil a om ngai taktak amaw, enchain un,” chi in a thumop hi. Aziak pen hih Kedar namte a Pasiante uh nusia in pasian dangte a na beta ua, hua pen lamdangsakna ziak a enchain diing a thumopna ahi. Jeremiah 49:28 in, Arabia kalh a kamsaan thute a na gen a, hua pen ahihleh Hazor leh Kedar namte douna thu ahi a, Babulon kumpipa Nebukadnezar in ama’unte a suksiatna diing thu ahi. Ezekiel 27:21 ah zong ama’uhte tanchin tamlou muh in a om hi.

Tuachiin Nabataean namte a hung khantou uh tawh kituak in, hih Kedar namte tanchin leh khangthu pen, fourth century B.C. hunlai pawl in a na beita a, ama’uhte pen Nabataean namte lak a khat kisuakta uh ahihtuak hi.

Adbeel Namte Tanchin

Adbeel ahihleh Genesis 25:13 na dungzui in, Ismael tapa 3na ahi. Hih Adbeel namte kitheihdan pipen ahihleh Arubu chih ahi a, Assiria kumpi Tiglath Pileser II, B.C. 744-727 kikaal hunlai agent khat bang a na om in, Assiria a diing in Egipt leh Assiria kigamgiitna lak a nna a sem hi. Hichih hunlai a Adbeel namte gaalkaap buupa min Idibi’ilu ahi. Historian khenkhatte’n hih Adbeel namte Sinai ah a teeng uh hi, chi in zong a gen uh hi.

Mibsam & Mishma Namte Tanchin

Genesis 25:3-4 na dungzui a, Ismael tapa 4na leh nga-na ahihleh Mibsam leh Mishma ahi. Hih mi namte tanchin pen muh diing a tamkei a, historian khenkhatte’n Jebel singtaanggam a khuate lak ah Mishma suan-le-khaakte a teeng uh, a chi uh hi. Tualeh 1Khangthute 4:24-27 na in a gendan in, hih nam tegeel pen Simeon namte tawh kibanteenzakte (intermarried) ana hih tuak mahmah uh hi. Tuachiin ama’uhte tanchin leh khangthu pen nam khat bang in a omkei a, awl-awl in a mangthang hi.

Dumah Nam Tanchin

Genesis 25:14 na dungzui a, Ismael tapa 6na ahihleh Dumah ahi.  LST, Joshua 15:52 na ah, Dumah pen Kanaan gam a khopi khat hi in a na gen hi. Tualeh Isai 21:11 na dungzui in Edom leh Seir tawh zong kipawl ahihtuak hi.

Historiante theihdan ah Dumah pen Addyrian Adummatu mite, chih ahi. Esarhaddon shiamtehna in a gendan in, Esarhaddon pa Sennacherib in Adummatu namte dou in, Arab gam a ukna nuai ah a omsak hi. Sennacherib in Adummatu kumpipa Haza’il “Arab Kumpipa” chi a theihpa a man a, a thunuai ah a omsak hi, a chi hi.

Hih Adummatu namte luahna gam pen, summeet-bawlte diing a kikawmtuahna mun, pelh theih louh na gam valaitak a om leh lamlian poimawhtakte in a zuihkhak na gam, Siria, Babulon, Najd, leh Hijaz kichi gamte kikawmtuahna diing a poimawh lamlian tunna ahi. Tualeh hichibang a mun hoihtak a, teengte ahihna uah ama’uhte pen Arabia mallam gatekeeper asuah hial hi. Tualeh ama’uhte tanchin pen Assiriate nuai ah a omdenta hi.

Massa Namte Tanchin

Genesis 25:14 na dungzui a, Ismael tapa 7na ahihleh Massah ahi. Assiria kumpi Tiglath Pileser III chiamtehna laibu in Massa leh Tema namte teenna munte a gen a, tualeh ama’un Assiria kumpi kiang a siah a piakdan un zong a gen hi. Hih Massa namte pan Jebal Ghunaym tunglam, Tayma simlam kilometers 14 lak a gamla diing pawl a teeng uh ahih tuak a, Archeologist Winnett leh Reed in, ama’uhte pen Dedan leh Nebayot (Nabaioth) namte tawh kisaikhakna thuktak nei ahi uh, chi in a gen uh hi.

Tualeh hichibang a gen-le-sak kichian zoulou simsim bangzah hiamte kawmkaal ah, LST a Israelte’n tuipi san a kaan nung ua, a phunna uh, Exodus 17:7, Deu. 6:16, 9:22, 33:8 na lak a kimu Israelte phunsiat hunlai a, a omna uh pen El Maser kichihna munlak ahi a, hilak pen Massa namte gam hi a ngaih ahi.

Hadad Namte Tanchin

Genesis 25:15 na dungzui a, Ismael tapa 8na ahihleh Hadad ahi.  Historian khenkhatte’n hih mi namte pen Harar ahihkeileh Hararina kichi, Palmyra maal-tum singtaang gam a teengte ahi uh, chih ngaihdan a nei ua, tualeh Arabia a om Hadad namte zong a hi maithei diing uh, a chi uh hi. Tu in hih Hadad namte Christian kisuak siang phial ahita ua, ama’uhte Levant gamsung teng, etsakna Jordan, Syria, Lebanon, Palestine chihte lak ah a teeng uh hi, chi in ama’uhte tanchin a kisuut hi.

Tema Namte Tanchin

Genesis 25:15 na dungzui a, Ismael tapa 9na ahihleh Tema ahi. Tema namte kitheihna pen ahihleh Teyma chih ahi a, ama’uhte ahihleh Tathrib ahihkeh Medina leh Dumah kikaal lamlian poimawh tunna, Hijaz District malsuah bial ah a teeng uh hi. 

Assiria Kumpi Tiglath Pileser III in hih namte leh Arab leengnu Samsi ukna bialte lak a kipan in, khamh, nguun, sangawngsaute, leh vanmanphate lak a kipan in siah a na la hi; tualeh hih Tayma leh leengnu Samsi ukna nuai a om namte ahihleh Saba, Hajappa, Badana, Hatti leh Idiba’il kichi namte ahi uh hi.

B.C. 552 hunlai diingvel ahihke’h Nabonidus hunlai B.C. 555-539 hunlai a, Babulon kumpi, LST Daniel 7:1 na dungzui a Belshazzar pianna pa in, hih Tayma khopi pen a teenna diing in a bawl a, tuachiin a vaihawm hun, kum 10 a kipan a kum 16 sungteng hih khopi ah a hun a zang hi.

Isai 21:13-14 na in, “Gaaltaaite an puak un” chi in Tema kiang ah a gen hi; hih tawh kituak chet in, Assiria kumpi Tiglath Pileser in Arabia mallam ah, B.C. 738 hunlai in gaal a bawl a, hua pen Jeremia 25:23 na a “Pasian thangpaihna nou” sunbuak a hihna diing pen tawh, a kituak lian hi. Job 6:19-20 ah, Job in a neih-le-lamte a suunna thu a om a, tualeh Tema gaalkaapte leh Sheba (Yemen) gaalkaapte’n a suhkhiatsak diing a kinep uh, a neih-le-lamte a suunna a om hi; hilezong Job in bangmah a nei nawnta kei hi. Tualeh hih Tayma gam pen, gam-maang, leihoih leh tui kiching omna gam, mun deihhuaitak zong ahi hi.

Jetur, Naphish, Kedemah Namte Tanchin

LST Genesis 25:15 na dungzui in, Ismael tapa 10na Jetur ahi a, a 11na ahihleh Naphish ahi a, tualeh a 12na pen ahihleh Kedemah ahi.

Abraham in a Egipt silanu Hagar tawh a neih a tapa Ismael suan-le-khaakte lak ah, Jetur, Naphish leh Kedemah namte tanchin ki-gelhna article deihbang leh lungtun-huai ka mukei a, a mu a, a theikha i om leh comment lam ah hung taklang diing in kung ngen hi. Kei source lakna leh zonna dan ah, ama’uh namte tanchin, lungtun-huai a omlouh ziak in, hi-chiangtan ah i hunsak phot mai diing uh hi.