Belaam leh Humpinelkai Meelpua Jesu Khrist

 

Bangziak a Jesu, Belaam leh Humpinelkai tawh Genkhawm a Om Ahia?

Hih dokna in Jesu hihna diktak leh bangziak a hih leitung a mihing meelpua a hung pai ahia, chih thute a hilhchian in ka thei hi.

Tuachiang in, hih Belaam leh Humpinelkai pen Leenggam tawh kisaikhakna thuktak nei ahihziak in, limlahna chiangtan bek ahikei a, hih pen political language hizaw deuh leh kilawm hi.

Hisung i gen uh lim (Belaam leh Humpinelkai) tegeel in Khrist mizia nihte a taklang masa a, hua pen eite theih diing a poimawh mahmah sil khat ahi hi.

Belaam in a taklat ut pen ahihleh, Toupa in eite a hung itna ziak a, eite a diing a, a hung kipumpiakna, singlamteh a sihna tawh kithoihna a hung bawlsakna a taklang masa hi.

Tualeh Humpinelkai in, a (Khrist) thuneihna, TOUPA ahihna a hung musak hi.

Tu in Belaam tungtaang tamlou i kikumthak zual diing uh hi.

Johan 1:29 ah, Baptispa Johan in, “En un Pasian belaamnou, leitung khialhna pua-mang diingpa!” a chi a, hih thu in bangziak a mihingte khelhna pua-mang diing a Belaam zak ahi a?  chih in i lungsim uh a luahdim hi.

Thukhun Lui ah Belaam pen khelhnate ngaihdam hihna diing in, kithoihna in a na kizang hi; ama’uhte pen dembaanglou leh gennop, zem neilou ganta ahi uh hi.

Ama’uhte sisan pen khelhna pan a mihingte kiliahkhuhna hi diing in a kisuah zeel hi. Hichibang ahihlai in, Belaam a kithoihna in mite khelhna a lakmangsak denkei a, tomkhat sung bek a diing a kithoihna ahizaw hi. Tuaziak in hih kithoihna pen alim a lahna ahi a, ganta Belaam a kithoihna saang a lianzaw leh thupizaw hung om diing ahihdan a hung musakzaw hi.

Jesu Khrist tanchin a i lut ua ahihleh, Amah pen hua Belaam diktak, mihingte khelhna liahkhuhna diing a sisan suah a ompa ahihdan kichiantak in a a muhtheih hi.

Isai 53 na ah, Kamsaangpa’n, “Belaam bang in, a kithahna diing mun a pui in a om hi; tuachiin Ama’n i khelhnate uh a pua a, Amah liamna ah eite sukdam in i om uh hi,” chi in a hung hilh hi.

Jesu Khrist ahihleh mi bukimtak, khelhna neilou, eite kithoihna hing diktak ahi a, Ama’n a utthu in a hinkhua, nang leh kei a diing in singlamteh ah, thuakgimna nasatak tawh a hung pia hi. Khelhna ziak a Pasian thangpaihna thuak teitei diingte i hihlai un, Ama’n eite thuakna diing mun ah a hung thuak hi; hih ziak in Jesu pen Belaam chih in a om hi. Aziak pen, Amah ahihleh, Pasian kiang a kithoihna kibawl zousiah bikumna leh taangtun ahi. Amah bek in, khatvei a diing in khelhna a lamangthei hi!

Tu in Jesu Humpinelkai hihna tawh kisai tamlou i kikumlai diing uh hi.

Kilakna 5:5 na in, Jesu Khrist pen, “Judah nam a Humpinelkai” a na chi hi. Hih Humpinelkai ahihleh thuneihna, silbawltheihna, vaangletna chihte limlahna ahi a, amah pen gamsate kumpipa, gamsa leh ganhing dangte laau leh zahtaak ahi hi.

Jesu Khrist zong Humpinelkai dan a i ngaihsut chiang un, Amah pen mi ki-ngiamkhiat, kithoihna Belaamnou chih chiang bek ahikei a, Amah pen gaalzou kumpipa zong ahi hi.

Hih Humpinelkai pen Siamchiilbu 49:9-10 na a, Jacob in a tapa Judah thupha a piakna a hung kipan a na hita a, a sawt mahmahta hi. Tuachiin Jacob in a thupha piakna ah, Judah a kipan in kumpi a hung piang diing a, Amah pen humpinelkai bang ahi diing; Ama’n namte thu a pia diing a, ama’un a thu a mang diing uh hi, a chih pen Jesu a genna ahi.

Amah pen, Belaam bang a, a kithahna diing mun a pui a om in, haankhuuk ah a omden kei a, sihna pan a thupitak a kaihthoh in a om a, khelhna, sihna leh setan tung ah, gualzohna thupitak a ngah hi.

Belaam bang a thah ahih dungzui in, Humpinelkai bang in vaai a hawm diing hi; dangka siik in maitang nih (two face) a nei a, maitang khat bek tawh dangka siik a neih theihkei hi.

Jesu’n zong, Belaam bang a, a sih masak keileh, khelhna, sihna leh siatnate a zou theikei diing a, tualeh sihna pan in zong, Humpinelkai bang a vaaihawm diing leh thunih diing in thou keita henla hileh, Belaam bang a, a sihna pen bangmahlou ahi diing hi.

Belaam in a hung itna a hung ensak a, Humpinelkai in a haatna a hung musak hi!

Belaam pen eite hung hundam diing a thah ahi a, Humpinelkai in a hung lamkaih na diing a, a thuneihna a hung musak hi!

Biakna leh phatna i piak uh Jesu Khrist pen hichibang ahi! Hundampa nunnem leh Kumpi Haat ahi a!

Toupa Thupha