Belaam leh Humpinelkai Meelpua Jesu Khrist
Bangziak a Jesu, Belaam leh Humpinelkai tawh Genkhawm a Om Ahia? Hih dokna in Jesu hihna diktak leh bangziak a hih leitung a mihing meelpua a hung pai ahia, chih thute a hilhchian in ka thei hi. Tuachiang in, hih Belaam leh Humpinelkai pen Leenggam tawh kisaikhakna thuktak nei ahihziak in, limlahna chiangtan bek ahikei a, hih pen political language hizaw deuh leh kilawm hi. Hisung i gen uh lim (Belaam leh Humpinelkai) tegeel in Khrist mizia nihte a taklang masa a, hua pen eite theih diing a poimawh mahmah sil khat ahi hi. Belaam in a taklat ut pen ahihleh, Toupa in eite a hung itna ziak a, eite a diing a, a hung kipumpiakna, singlamteh a sihna tawh kithoihna a hung bawlsakna a taklang masa hi. Tualeh Humpinelkai in, a (Khrist) thuneihna, TOUPA ahihna a hung musak hi. Tu in Belaam tungtaang tamlou i kikumthak zual diing uh hi. Johan 1:29 ah, Baptispa Johan in, “En un Pasian belaamnou, leitung khialhna pua-mang diingpa!” a chi a, hih thu in bangziak a mihingte khelh...