PASIAN NAIH UN! PASIAN IN A HUNG NAIH DIING HI.

 

TONGKUP-ZAITHA

Jakob 4:8 “Pasian naih un, tuachiin aman a hung naih diing hi.”

Leitung ah i muanlouhte kinaihpih diing pen a haksa mahmah a, hilezong i muante kiang a om pen nuam kisa taangpi hi. Pasian toh omkhawm nuam na sak theihkei leh nang ah diklou om hikha diing hi; a na ngaihtuah thak in.

Leitung ah i it, i ngaihte toh om pen nuam kisa chiat hi. Pasian zong na it a, na ngaih leh Amah toh omkhawm pen nuam na sa diing hi.  

Mi muanhuai i saklouhte toh kinaih diing saang in kigamla a om diing pen mi taangpite tupna ahizaw a, hih pen adik mah hi in ka ngaihsun hi. Tua mahbang in Pasian muanhuai nasak leh kinaihpih in; muanhuai kasa mahvele chi kawm kawm a Pasian toh kigamla a om pen mahni kikheemna ahi.

Pasian zong muang seemseem lehang kinaih seemseem hi.

Muanna leh Ginna in kinaihna a omsak a, hilezong Pasian ka muang hi chi napi a, Pasian toh a kinaih lou mite pen, ama’uh leh ama’uh kikheem ahi uh hi. Jeremiah 17:9 na in, “Sil zousiah saang in lungtang a kheemhaat pen a, damask theih ahikei hi; kua in a theisiam diing a?” a na chi hi. Na lungtang in nang teekteek a hung kheem louhna diing in Bible ah thudik, thutak om pen theihkhiat sawm in.

Pasian naihte Pasian toh kizop uh hi; hilaitak ah eite diklouhna a kilang thei a om a, hua pen ahihleh Pasian i naihlouhna uh ahi. Aziak pen Pasian toh kizopna mizia pen eite ah muh diing a omkei phial hi.