JESU’N A NU A SAPNA “NUMEI”
Ei Zomite
tawndan ah, Meitei paunak khat a na kihahzuih mahmah a, hua pen ahihleh “Na ma
na pa se, mit na uu bah lai ne,” chih ahi a, hih pen, “Mit a muhtheih na nu leh
na pa pen na leitung pasian ahi,” chih ahi.
Hizah
a nu leh pa a zah mahmahte i hihziak un, kuamah in a pianna a nu kiang ah, “NUMEI”
kichi ngamlou hi.
Hichibang
ahihlai in i ginna uh ki-ngakna zungpi Pasian Laisiangthou ah, Jesu in anu Mari
pen, kum 12 mi ahihlai in Biak-innpi (Temple) ah “NUMEI” a na chi a, Kana
mou-pawi ah “NUMEI” a na chi a, a sih kuan Singlamteh dawn a kipan in zong “NUMEI”
a na chi hi; bangziak hi diing ahia? chih dokna in i lungsim uh luahdimta
ahihziak in, aziak hithei diing a kilawm tamlou i en diing uh hi.
1. Jesu in a Pasian Hihna (Divine Identity) a
phuhkip na diing ahi.
Mari
in kha sung a paai a, hilezong Jesu pen Mari khutsuak/bawlkhiat ahikei hi. Amah
pen Mari masang pen a kipan a na omsa ahi a, Mari zong Ama siamsa (created) ahi.
Amah pen Taangtawn Pasian Tapa ahi a, Mari tapa ahi mawk kei hi.
2.
Kha-lam zekheemna pan a Kidaalna/ Kikepbitna diing ahi.
Jesu
in, hun hung omtou diing a, khangthakte’n Mari pen tawisaang a, pasian khat a,
a bawl ut diingdante uh theihsa ahita hi. Tuachi a Ama’n Mari pen “NU” a
chihlouhna tungtawn in, Creator (Sil Siamtu) leh Created (sil siamte) kikaal ah
gamgi kichiantak a bawl hi.
3.
Innkuan diktak bang ahia, chih a hilhchet-thakna ahi.
Jesu
in, “Ka nu kua ahi?” (Mat. 12:48) chi in a na dong hi; tuakhit in a nungzuite
lam ah a khut a zankhia a, “Hitak ah ka nu leh ka sanggamte a om uh, kua hileh
Vaan a om ka Pa deihlam bawlte, ka sanggampa, ka sanggamnu leh ka nu ahi” (Mat.
12:49-50) a chi hi.
Innkuan
diktak leh a taktak pen ahihleh Pasian thuzuihna ahi a, ka sisan a piang,
chihte ahikei hi. Mari in hih thu a theisiam a, tuachiin, “Na kiang ua a gen
taphot bawl un,” (Jn. 2:5) a na chi hi. Kei kiang ah hung thuum kei unla, ama aw
ngaikhia un, a chihna zong ahi.
Jesu
ahihleh Pa kiang zotna lampi omsun, thutak leh hinna ahi.
Toupa
Thupha
Comments
Post a Comment