“Hibang a Pasian teenna mi i muzou diing uai?”

 

“Hibang a Pasian teenna mi i muzou diing uai?”

Kumpi Faro in a silate (officialte) kiang a, Joseph tungtaang a, a kammal zak, “Hibang a Pasian teenna mi i muzou diing uai?” Siamc. 41:38 chih thu i ngaihtuah chiang un, i Pasian, Pasian a koihlou Hindute khopi a om eite a diing in challenging mahmah hi.

Egipt gam a, a Pasian Pasian a kisimsak louhna mun, a ginna zong ginna a, a kipomsak louhna mun a Joseph a khosak hunlai in, kuamah in a Pasian a biakpih kei ua, hilezong Pasian in a teenpih hi, chih pen a omna mun a mite’n a chiamtehna uh leh a muhdan uh ahi.

Tualaitak a na omna mite’n nang bangchiin a hung mu ua? chih na na kidong thak lechin a chi ut mawk dan ka hi. Aziak maw, mi dangte hung muhdan pen i hihna uh a na hizaw gige ahi.

Pasian teenna mi khat hi in, na kiang a omte’n a hung mu thei uh hiam? Chih thu pen i unpi ua, eimah leh eimah i kidok thak uh a ngai mahmah hi.

Joseph, Pasian teenna mi, a kichihna mun maw, a sepna mun, a niteng nekzonna mun hi diing a, Pasian in a guatsakna mun a, a lut kipatna ah ahi ngal hi.

Eimite maw, sephna hoih amuh chiang a Pasian omna lam theilou kitam mahmah ei! Delhi ah kum nih Pasian nna sem in Toupa’n a hung omsakta a, hih hun sung a ka muhkhiat, a sepna mun a Pasian omna thei diing a ka gintak louh a tamdan!

Joseph in a Pasian a nusia ngaikei a, tuachiin Pasian in zong amah nusia ngailou hi. Eite’n Pasian i neihlam uh zong i theihphak louh hun uh tam mahmah leh kilawm samawkta ka hi! Ki-ngaihsun thak ni uh aw!

I omna mun uh leh i sepna munte ua mite’n, “Hibang a Pasian teenna mi i muzou diing uai?” a chih theih uh mi khat i hih ua ahihleh, i chi-le-namte leh i gam-le-lei zong, sawtlou nung chiang a dam diing in ginna ka nei hi.

Innsung leh chi-le-nam ban ah, gam-le-leitang damna diing i mimal chiat uh khut ah ki-nga lian mahmah hi! Singnuaimite ngoh-ngoh nawnkei inla, nampi lamkaite zong ngoh-ngoh nawnkei ni! Khatvei kipan thak ni hang in, eimah leh eimah chiat moh kipiakna tawh Toupa kiang lam i zuanthak uh aw! Amah mikhialte zong diing a hung pai ahi-Luke 5:32.

“Hibang a Pasian teenna mi i muzou diing uai?” chi a mite’n a genthang uh mi khat na hihna diing pen nangma khut a om ahi. Hichiangtan na tunzawhna diing in Toupa kiang ah ki-ap in!

Toupa Thupha!

Tuni hunzak nuam chiat ni!

TONGKUP-ZAITHA