Khelhna Kipiak-tuahna Siamchiilbu 3:11b-13.

 

TONGKUP-ZAITHA: BIBLE STUDY

Siamc 3:11b-13. Mawh Kipiaktuahna: Pasian in Adam mawhmat sawm a, a kiang a, “Na nek louh diing a k'ung thupiak singgah na nek maw?” chi a, a doklai in, Adam in, khial ahihna a kipomna leh amah siampa thupiak a zuihlouhna pomdan siam kawm a, “Hi” ahihkeileh “Ka na nekha mah hi,” chih kammal tawh a dawn diing hinapi’n, “Ka kiang a om diing a n'ung piak numei in, tua singgah a hung pia a, Ka nek ahi,” (t.12) chi in, ahilou lamtak ah a dawng hi.

 

Adam in a khelhna azi pesawn: Adam in ama kam vateek tawh, Pasian mai a, a khelhna pen a phuankhiat na diing in, Pasian in dokna dong a, hilezong ama’n hua khelhna pen ama khelhna a pomlou in azi Evi tung ah a tun zawsawpta hi. Adam in a khelhna a zi a piaksawn mahbang in, tulai in zong, i khelhnate uh mi dangte kipia nuam mahmah hi.

 

Evi in amah khelhna pen Guul pesawn: Adam in a khelhna pen ama khelhna a pomlou a, azi Evi kiang a, a piaktak in, Pasian in Evi kiang ah, “Bang chi daan ahichi gamtat na hia?” a chi hi. Tuachiang in Evi in zong, a pasal Adam mahbang in, ama sil bawlkhial pen mu lou in, a khelhna Guul ziak ahi, chi in guul a ngawh hi.

1Tim 2:14 na in, “Adam kheem in a omkei a, hinanleh numei kheem in a om a, bawh siatna ah a pukta hi,” a na chihbang in, Evi kheem in a om hi.

Tualeh hih kheemna pen kikheemna dan bangtak in a hung paikei a, kizolna, kichialna leh kiheelna (pasal in numei lunglut tak a, a vaheelna) tawh kibang in a hung paizaw a, kheemna dan in kimu masa khalou zeel hi.

Tepteh diing: Pasian in Adam leh Evi khelhna kanchet sawm bang a, a kilatna ziak pen, Adam leh Evi in, ama’uh kam vateek a, a khelhna uh a kiphuan ua, tuachi a Pasian in a huntak a, a ngaihdam theih na diing ahi a, hilezong khelhna kipia sawn uh ahihman un, a huntak ah Pasian in a ngaidam theikei a, tuachiin a khelhna man uh a muh sam uh a ngaita hi.

Mi dangte khial a puuksakna pen khelhna ahi. Satan in hih khelhna pen Eden huan ah na panta ahihman in, ama kiang ah bangmah kidong lou a, thukhenna kipia zaw hi. (1 Timothy 4:12; Matthew 5:13-16; 18:6,7; Titus 2:7,8; 1 Peter 2:11,12; 2 Corinthians 6:3; 8:20,21; 1 Corinthians 8:9-13; 10:23-33).