BARABBAS ZALEENNA ENTON NI

 

Jesu Khrist nung ka zuihkhawmpih Saptuamte, i Toupa Jesu min in chibai kung buk masa hi!

Jesu Khrist tanchin a hung kilang, Khristian zousiah in a muhdah phial uh ban ah, nawngkai a sak uh mi khat a om a, amah ahihleh BARABBAS ahi.

Jesu Khrist tanchin a hipa a hung kilat hunlai pen, Jesu sih kuan, Judah siampute’n Rome kumpi tungtawn a Jesu Khrist thah, ahih theih na diing a, a matsak nung uh leh a soisak nung uh ahi.

Bible in, “Pilat in Passover/ kut ankuang lui ni chiang in, thongkia/ jailer, mipite nget penpen a khahkhia zeel” Mark 15:6 ah a chi a, hih pen a tawndan uh zong ahi hi.

Hichibang tawndan in a taklat ut pen ahihleh hehpihna leh thukhenna diktak a omna ahi a, hih pen Paikan pawi (Passover) ah suklat ahi gige hi.

Hichih hunlaitak chiang in, mipite’n zong Ukpipa (Governor) thuzoh theihna diing hunhoih a nei ua, hua pen ahihleh, khelhna ziak a si diing khat suah zaleen diing a Ukpipa thuzohna ahi!

Hih thu Pilat in zong hoihtaknou in a thei a, tuachiin mipite kiang ah “Judahte kumpipa na kiang ua k’ung khah na ut uh hiam?” chi in a dong hi! Hilezong Siampite’n Barabbas suah zaleen ahih theihna diing in mipite a haantawk uh hi! Tuachiin Barabbas a zaleenta hi!

Hih BARABBAS ZALEENNA ah thu kiphual a omkha diam? Omta henla hileh bang ahi diing a? chih ngaihtuahna ah a om mahmah a, tamlou enlai ni aw!

Barabbas Zaleenna pen bangdang hilou in ama mun a Jesu a omtaak ziak ahi a, Barabbas in a Zaleenna pen a lei thoh hiam, a man a piak hiam a hikei hi! Hih mah ahi, tuni a tanchinpha gospel chi a i kikoupihpih uh!

Barabbas mahbang in eite zong khelhna neite i hi ua, i khelhna uh ziak a sih diing bek maban neite i hi uh hi! hitalezong ei sihna diing muntak a Jesu a hung omna pen ei a diing a hinna ahi a, hih hinna mah hinpih diing a deihte i hi uh hi!

Tualeh, BARABBAS min pen Pa Tapa chihna ahi. “Bar” i chih chiang un “Tapa” chihna ahi a, “Abba” i chih chiang un “Pa” chihna ahi.

Hichibang ahih chiang in, Pa Tapa ahihleh Pa Tapa tawh a dingkhawm hi, chihna a suak hi! Pa in leitung a it mahmah a tuachiin a tapa, taangtawn a, a it tawntungpa pen a pia hi. Tuachiin khelhna a dim Pa Tapa pen Khelhna a neilou Pa Tapa in a suah zaleenzaw hi!

Hih khelhna a dim Pa Tapa pen nang leh kei zong i hikha maithei diing hi! Pa kiang leh Pa innpi a i lut ua, i vaitun theihna diing un Pa Tapa, khelhna neiloupa pen in ei, khelhna a dimte mun a luahta a, i zaleenta uh hi! Zaleentak in Pa kiang i zuantheita uh hi!

Hichibang hamphatna Pasian a kipan a i muhlai un, mi tampite’n ama’uh deih teel theih na hamphatna pen mah tawh Pasian dek bawl in, Pasian kiang a zuan nuamkei ua, a poi mahmah hi!

Khenkhatte’n hih hamphatna pen theilou in, ama’uh utna leh deihnate mah a thupisak den ua, Pasian pen chihmoh hun chiang bek a diing in koihta uh hileh kilawm hi!

Sanggam aw! Pasian in nang pen, tuni Tanchinpha/ Gospel hi diing in a hung deih hi!

Toupa Thupha hung pia hen!