KUHKALNA

 

Gingtu hinkhua pen nopna leh kipahna a dim ahikei a,

Thuaknate tawh kimaituahna diing lamlian zong ahi hi.

Aziak pen hih lamlian ahihleh Singlamteh lamlian ahi hi.🍂

Pasian in gingtu hinkhua ah, Thuakna zong a hung pia a, hua pen Amah a diing a gingtu hoih leh siangthou hihna diing deihna ahi. Hichibang ahihziak in, gingtu hinkhua pen a nuamkim ahikei hi.🍂

Pasian in A ta thumang leh hoihtak hihna diing a, a hung thuhilhna ah, haksatna tamtak zong pal-gaalkai diing i nei uh, chih pen i mangngilh louh diing uh ahi; i mangngilh khaak ua ahihleh beidonna tuamtuamte i maituah uh a ngai kha-diing hi; aziak ahihleh Pa in ta a sawi pen a ngaina ahi.🍂

Nunnop tawntung, kipah tawntung i sawm ua ahihleh, Singlamteh gam haksatna i theisiam kei diing ua, Khrist leh Pasian hung itnate zong, a thupina chiangtan ah i vamusuk zoukei diing uh hi.🍂

Simlei hinkhua a, haksatna i thuakte un Toupa hung samtamsak henla hileh, eite a diing in kha-lam ah Khanna hoihtak ahi diing a, i Toupa deihna zong ahih ngei diing a gintaak huai hi; hichibangte ziak a thawmhauna hinkhua pen gingtute a diing a poimawh khat a na hizaw ahih tuak hi.🍂

Mother Teresa in zong, hun sawtpi Pasian aw a theikei chi a gen in a om hi; “Om nawnlou na hita hiam?” chi in a thuum hi, zong a kichi hi. Hitalezong kiptak leh kuhkaltak in Toupa nna a sem a, tuachiin semtu phattaak leh pahtawina piaktaak hi in a hinkhua a mualliamta hi.🍂

Toupa Jesu Khrist ngei in zong, “Ka Pasian, ka Pasian, bang diing a nung taaisan e?” a na chikha ngai hi. Haksatna tamtak leh thawmhauna, thuakna chi-kim tawh Singlamteh haksatna a palgaalkai hi.🍂

Hichibang ahihziak in, gingtute’n kuhkalna pen eimah a ahi, i chih theih diing uh a poimawh mahmah mai hi.🍂

“Ka sanggamte aw, engbawlna na tuak chiang un, kipakna ngen in ngai un, na ginna uh etkhiatna in kuhkalna a siam chih thei un”. Jakob 1: 2-3.