Pasian Mizia tawh Kithuam Diing a Ngetna

Bible: Eph. 4:22-24, “Na ni danglai omdan ua mihing lui, kheemna leh lunggulhna hoihloute koihkhia unla. Na lungsim kha uah athak in hung om un, mihing thak, diktatna leh siangthouna Pasian bang a siam pen silh un.”

1. Siangthouna kichi Pasian mizia ahi a, gingtute kiang a Jesu Khrist tungtawn a piak zehoihtak ahi. Tualeh Bible in a gen Siangthouna pen Sabon (Soap) a kisil sianna siangthouna ahikei a, mizia i chih uh Bible tawh kituak a omdan-hoih kichite ahizaw hi. Pasian in Khrist tungtawn a ginna ziak a, a hung piak hih siangthouna mizia pen leitung a pawkhia, phoulak leh hingsak diing in nang hung deih hi. Buahbaan pan a eite hung Tanpa in Siangthou a om a, hih Sianthouna pen khovel musak diing in hung deih hi (Read. Lev. 19:2; 11:45; 1Pet. 1:15-16)

2. Diktatna kichi mihingte pianken mizia leh omdan ahikei a, Pasian a ahi. Diktatlou leh diktatna chang theiloute i hihlai ua, Diktat diing a eite hung Tanpa in, i omna mun zousiah uah, hih Diktatna mizia pawkhia a, khovel mite musak diing in hung deih ahi chih mangngilh kei ni (Read. Eph. 4:25-31).

3. Ngaihdamna kichi pen Pasian mizia ahi; Daniel 9:9, “Toupa, koute Pasian kiang ah khawtuahna leh ngaihdamna a om hi.” Mi dangte ngaihdam theihlouhna mizia khauhtak tawh omte, Khristian i kichih nung ua zong mi dangte khelhna simsimte (counting others mistake and sins) in, bangchi in hih Pasian mizia hoihtak, Ngaihdamna mizia i neithei diing ua maw? Neihtheih thamtham ahi; hih mizia pen Pasian in Khrist tungtawn in a hung pia a, hua pen ginna tungtawn a neih diing ahi. Tulai in i gam uah ginna diktak nei kitamlou adiam, ngaihdamna muh diing tamlou hi. Ngaihdam theihlouhna mizia pan a Ngaihdam theihna mizia neita diing a eite hung Tanpa in, khovel ah ngaihdam mizia pawkhia a, hinpih diing in nang a hung deih hi; “Pasian in Khrist a nou a hung ngaihdam bang in, npu zong khat leh khat ki-ngaidam tuah chiat un,” (Eph. 4:32). Hih ngaihdamna mizia khovel mite musak diing a deih na hi a, ngaihdamna mizia tawh khovel a hing hiing a teeltuam na hi. 

4. Vaak (Light) Mizia neite hi diing a deihte Khristiante ahi. Matt. 5:14-16 ah, Vaak na hi ua, na vaak uh mite muh diing a, a vaak diing ahi, chih i muthei uh hi. Achiil in hih vaak mizia pen mihingte a ahikei a, Pasian mizia, zehoih leh kilawmna ahi. Tu in hih zehoihtak pen gingtute kiang ah Khrist tungtawn a piak ahi a, hih pen Khrist a ginna tungtawn neihtheih mizia leh zehoihtak ahi. Tuni chiang in hih Vaak mizia pen leitung a pawkhia a, khovel mite musak diing leh atak a ensak diing in, Pasian, eite hung Tanpa in gingtute khut ah hung koihta hi. Khristian khat na hihna ah, na omna mun leh na sep-le-bawlna mun ah hitalezong Vaak na hihna pen kilangsak a, khovel mite musak diing leh ensak diing in Pasian in nang hung ngansiah a, tuachiin “khovel vaak na hi uh” hung chih lawhta hi. 

5. (To be continue)