BITNA KHOPI DAWNGKOT PAAM TEEKTUUK A SIHNA

 

Joshua laibu a i khualzinna uah, thupi tuamtuamte i na kikupna zong i neita ua, “Gaaldounate, Thahat leh Haansansuah a ngaihnate, Gam hawmna” chihte baan ah, Bitna Khopite, chih thupi a nei in, a hun masa uah zong i na kikumkhinta uh hi. Tuni in, hih Bitna Khopi chih thupi a nihveina gen diing, lungtakpi tawh, Pasian hung houpihna AW zaa diing in, GINNA leh lungtang a lunggulhna tawh, thanuamtak in i na ngai diing uh hi.

Bangteng hileh, Delhi a diing in, tu hun a kikhopna neih pen challenging mahmah ahihna ah, tuni a, i Toupa Pasian leh Saptuam vei na liantak neikawm a, hung kikhawmte, na unpi un, i Toupa Jesu min in chibai k’ung hi.

 

Bible Simna

Joshua 20:7, “Tuachiin ama'un Naftali singtaang gamsung, Galili gam a om Kadesh, leh Efraim singtaang gam a om Sekem, leh Judah singtaang gam a om Kiriath-arba (tua pen Hebron ahi) a septuam uh hi.”

Thupatna

Hebron ahihleh Bitna Khopite lak a khat ahi a, Levite Khopi, Aaron suante kiang a piak ahi. Hisung ah Kumpi David zong a na teeng hi; a ziak pen Pasian Hebron a teeng diing in David a na sawl hi (2 Samuel 2:1).

Hih Bitna Khopi ah, kithah, kimat leh sisan kisuah chihte a om kei a, hichibangte pen a omlou diing mawng a Pasian in a na bawlsa ahi hi; hichibang ahihlai in, hih khopi ah lusuunna huaisetak khat a om, Kumpipa hial, nau-kah a kap in a om hi. Aziak pen hih Khopi dawngkot paam ah mi khat asi a, hua pen pammai leh itlua ahihman in, kumpipa pen naukah in kap mai hi.

Bitna khopi ahihleh Pasian in a mite teenna, ama nna semte teenna mun diing a, a na bawl ahi a, hisung ah Kumpi in David a pang hi.

Laisiangthou ah David pen metaphor a zak ahih hun a om a, a tak a zak ahih hun zong a om hi; hih Hebron khopi tawh kisai a David kumpi hihna pen a nih tuak a zak theih in a om hi. David chih kammal metaphor a zak ahih chiang in Pasian genna ahi. Hichibang mah in Bitna Khopi zong Physical-tak in a om a, Spiritual meaning a nei hi.

Bitna Khopi = Pasian Khopi ahi a, a sung ah Pasian nna semte a teeng uh hi.

Bitna Khopi Kumpipa David = Kha a Bitna Khopi Kumpipa Pasian.

Khopi kulhpi pulam a sihna = Piangthak lou a sihna

David, Bitna Khopi Kumpipa kahna = Pasian zong Piangthak loute diing in kap veve hi.

Hichibangteng lungsim a nei kawm in, Bitna Khopi dawngkot paam a si pa a kipan in bang zillai i nei ua, chih i en diing uh hi.

 

Laisiangthou

2Sam. 3:27, “…Abner Hebron a hung tuntak in, Joab in a kiang a thu guk gen diing bang in kulhpi dawngkot gei ah a paipih a, a sanggampa Asahel sisan phuba la in, Joab in Abner gilpi a dawtsak a, tuachiin Abner tua mun ah a sita hi. 32 Ama'un Abner Hebron ah a vui uh hi. Abner haan ah kumpipa khasetak in a kap kouhkouh a, mipi zousiah zong a kap uh hi. 33Kumpipa'n Abner suun in a kah a, “Mimaw sih a Abner a sih mai diing ama? 34na khutte lephen a hikei a, na keengte zong kol kibulh a hikei hi; mi giloute mai a puuk bang in, na puukta mai hi,” chi'n kahteng a lou hi. Tuachiin mipite'n zong amah khatvei a kah thak kiik uh hi.”

 

Ner tapa Abner Sihdan

Hichih hunlai in, David leh Saul innkuan a na om kidouna pen a na bei naikei hi. Hilezong David pen a haat deuhdeuh a, a vaihawmna zong a dik deuhdeuh a, tualeh Pasian in zong a ompihna pen muhtheih diing a, a omziak in, Saul gaalkaap Bu Abner, David kiang a kipia in, kamtaaite tungtawn in thukhun David tawh a bawl ua, Hebron kichi Bitna khopi ah a hung pai hi.

Hih thute pen David gaalkaap Bu Joab in a theikei a, tuachiin a heh mahmah a, gaalpa thahlouh a paisak chih mawngmawng chi in, a lungkim theikei a, tuachiin David kiang ah a vaphunta hi.

Tualeh David kiang pan a Joab a hung pawtkhia a, tuachiin Abner nungdelh a, vasam kiik diing in mi a sawlta a, ama’un a vadelh ua, Sirah tuikul ah a vapha ua, hua a kipan in a hung kiikpih uh hi.

Hibang a, a hung kilehpihlai un, Bitna Khopi Hebron dawngkot ah Joab in a na ngak a, ama’uhte a hung tuntak un, thuguk gen diing bang in Joab in Abner a kawi a, hua Bitna Khopi dawngkotpi mai ah a thatta hi. Hih sihna ziak in kumpipa a dah mahmah a, Abner suunna pen a huaise mahmah hi.

Tuachiang in Bitna Khopi Kumpipa in, “Na hinna diing a, na na pan sam diing hi a, hilezong na pangkei mawk a, tu a Mimaw sih a na sih taktak mai diing hita maw?” chi in khasetak in a kap hi. Hichibang sihna pen ahihleh;

 

1. LAWM A BAWLNA A, A PILVANLOUH ZIAK AHI

a. Kilemna thukhun official a phuanna omlou in, Amah leh Kumpipa kilemna pen ziak in, a nidanglai gaalpa Joab pen a na LAWM bawlkha hi.

Joab in Abner a thah utna ziakte ahihleh; (1) A sanggampa Asahel phulakna ahi (2) Joab in ka hihna hung suanmang thei diing ahi chih ngaihdan a neihziak (3) Abner pen enkhiatu dan a ngaihsutna a neihziak ahi.

b. Abner pen a Maw sim mah ahi. Pilvang zoulou ahihziak in

c. Nang zong na LAWMTE pen Pasian theilou hilou maithei ahi aw! Lawm khenkhat in siatna ah a hung pui ut mahmah uh hi; hichibangte pen Setan evangelist kichi a, nang zong, kei zong a hithei i hi.

d. Abner mahbang in Job in zong LAWM TAKLOU a na neikha ngai hi.

e. Tapa Taimangpa in zong Abner mahbang in LAWM TAKLOU a na sin ngai hi.

f. Nang a, na LAWMTE bangchibangte ahia?

 

2. AMAH KIVENGLOU HIMHIM AHI

a. A khutte lephen ahihlouh hang, a sualkei a, bangmah a bawlkei hi.

b. A keengte zong hen ahikei a, hilezong tailou a, zuanzawsawp hi.

c. Bitna Khopi Hebron dawngkot tawh a kinaih mahmah hang, a gamla mahmah hi.

 

3. BITNA KHOPI SUNG TAWH KINAIH AH A SI A, A KINAIH MAHMAH HANG, A NA GAMLA MAHMAH HI.

a. Joab in Bitna Khopi Dawngkot ah a kimuhpih a, tuachiin a ngawng a kawi in, Bitna Khopi Kulhbaang liim ah a paipih a, a that hi.

b. Hichibang sim in, Setan in zong, taangtawn hinna dawngkot mai ah mite a na kimuhpih ut mahmah hi; hua pen a lemtheih liaileh hung zolkhia a, amah tawh si khawm diing a, a hung koihna diing in ahi.

c. Tulai chiang in, Mi tampite Hutdamna Kulhbaang pulam ah asi uh hi.

 

Thukhitna: Tu in eite zong ki-enchian ni! Hehpihna tungtawn a Pasian hutdamna dawngkot pulam a om i hihkhak diing uh a lauhuai mahmah hi; meelma dailiim ah va dinkhawl tadih kenla, Hutdamna Huangsung ah tu in, hung lutta in, Pasian hutdamna huang sung ah i lut chiatta diing uh hi.