BANGZIAK A LOT ZI CHI-KHUAM SUAK AHIA?

 

Lot zi chi-khuam a suakna ziak pen a khodak ziak hiam, a kinung-hei ziak hiam chiangtan bek ahikei hi.

Lot zi chi-khuam a suakna ziak pen, kinung-hei lou diing a Pasian thupiak a zuihlouh ziak i chih diing uh ka gingta a, zong adik ahi; hilezong hih saang a dikzaw diing a kilawm pen ahihleh, a lungtang in a nusiat lel-lel leitung a khiatlah luat ziak ahi.

Khatvei a kinung-hei na in, a kha kikhenna, ahihkeileh a taksa leh a lungtang a zawkkhawm louhna pen chiangtak in a kilangsak hi.

Tanchin-hoih Luke 17:32 ah, Jesu’n zong eite kiang ah taihilhna khauhtak a nung nusiat a om a, hua pen ahihleh “Lot zi thei theizing un” chih ahi; kammal tamnloutak hilezong a gikna pen a tawntung a gik den ahi.

Lot zi a kinung-hei a, tuachiin taangtawn in a mangthangta hi.

Hih in eite a hung hilh ut pen ahihleh a kichian mahmah hi; Pasian in siatna pan a, a hung sap a ahihleh kinung-hei kei in. Khelhna ah omden kenla; Ama’n a hung tatkhiatna mun pen valunggulh nawn kei in.

Aziak pen, a hinkhua lui pen nusia ut ngailoute, a mangthang diing uh hi; hilezong Toupa Jesu Khrist kiang a, a hinkhua aapte pen hutdam in a omzaw diing uh hi.

Lot zi tanchin ahihleh taangthute tunglam pek a om tanchin poimawh, eite ki-etna diing limlang (Mirror) ahi hi.

Eite lak ah mi bangzah in, i nusiatsate lunggulh kawmkawm in Pasian thu i mang un, i zui ua le? Mi bangzah in Jesu min a i na nusiatsate lunggulh kawmkawm in Pasian thu ka mang hi, i chi-ngam diing ua?

Kinung-heina zousiah in a taklat ut pen ahihleh, i lungtang uh omna mun ahi; Lot zi in nang leh kei a hung taihilhna pen ahihleh tha-dahna leh utlouhna pen siatpih theih ahi, chih ahi.

Hichibang ahihziak in, na mailam tangtak in en in, na mai ah singlamteh a om hi; kinung-hei ken.

 

Toupa’n Thupha hung pia hen aw!