Dohzoutak in i Thuak Hamham Diing uh hi!

 

Bible simna:

Toupa'n Setan kiang ah, “Ka sila Job na ngaihsun kha-ngai ei? Leitung ah amah bang a dembaanglou leh mi diktat, Pasian zahtaak leh siatna kiheisan a omkei hi,” a chi hi. Tuachiang in Setan in Toupa a dawng a, “Job in a mawkna a Pasian a zahtaak hisak na maw? Nang amah leh a innkuante, leh a neih-le-lamte kiimkot a daai na khun hilou a maw? A khut nna sepna thupha na pia a, tuachiin a gantate'n gamteng a luahdim uh hi. Hilezong tu in na khut zankhia inla, a neih-le-lamte khoihsak lechin, na maitang mahmah ah a hung samsia pai diing hi,” a chi hi. 12Toupa'n Setan kiang ah, “Tuabang ahihleh hoih e, a neih-le-lam zousiah na khutsung ah a omhi; hilezong amah tung ah na khut kha ken!” a chi hi. Tuachiang in Toupa omna a kipan in Setan a paikheta hi. (Job. 1:8-12)

Eima suk-khelh hikha mawngmawng loute zong khat-veivei i thuak hun uh a om zeel hi. Bangziak e, chih theihkhiat zohlouh haksatna leh thuakgimna a hung tun hun, mihing hinkhua ah a om kha-thei zeel hi. Hilezong gingtu hinkhua a sil tungte pen, Pasian theihpih louh a om mawngmawng kei hi chih, Job hinkhua ah a kichian mahmah hi.

Job pen haksatna chinteng thuaktu, vangsiat chinteng a liangzang a ki-nga, Pasian thangpaihna leh gawtna thuaktu bang a, mite mitmuh a akilat laitak in, Job in, amah tungtaang a Pasian leh Setan kitawkna (ki-challenge-na) pen a theipha kei hi. Tualeh Pasian a kipan in zong, hanthawnna leh a kinepna diing thu hoohte bangmah gen in a omkei a, ginna a, a dinkipna diing thute zong a kiang a gen in a omkei hi.

Hilezong Job in, haksatna leh thuaknate lak ah zong Pasian a gum teitei a, Pasian lak ah a beidong utkei a, a tung a siltungte, phunlou in a thuakzaw hi.

Eite’n zong, i tu dinmun ua i thuaknate uh, lohsam i kisaknate uh, vangsia i kisaknate uh a kipan in, a hilhchetna i mukei maithei hi. Hilezong Pasian in, hun kipahhuai bek ah hilou in, haksatna leh mite muhsitna leh vangsia bang a, i kilatlai ua zong, amah a i gin-omna uh tungtawn a, Amah a diing a i dinkipdante uh Amukhiat diing ahi. Gingtu hinkhua a vangsiatna leh haksatna a tun hun chiang in, Pasian leh Setan zong a na kigolh uh ahih tuak mahmah hi. Tuaziak in, hih hun haksate ah Setan hilou in Pasian thupisak ni!

Hichibang ahihziak in, i ginna uh etchet a, a om chiang in, dohzoutak in i thuak hamham diing uh hi; i sil bawlte un lah nuamman nei diing ahi ngal a.