TUUMTEH LAPSAANNA NIPINI (PALM SUNDAY)

 

By: Pastor Thangdoulal Suantak

Series 02 Topic: Hosana Chi-a Kikou Mipite a Kipan a Kithuhilhna

Tuni a i Palm Sunday Topic uh, Hosana Chi-a Kikou Mipite a Kipan a Kithuhilhna chih i na ngaikhawm diing ua, i ngaihkhiat ma un tuni a hih Youtube channel a thugen na ngai a, na subscribe kha nailoute’n a na subscribe diing in i ki-ngen masa hi.  

 

 

Bible taangteel, Matt. 21:8-10; Mk. 11:8-10.

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in Palm Sunday chibai ka hung buk hi.

Jerusalem khopi a Jesu a luut ni in mipi a tam mahmah chihte leh mipi kikhawmte tawh kisai thute series 1na ah i na genkhinta ua, tuaziak in tuni in hua mipite kuate ahi ua chihte suut nawnlou in, ama’uhte omdaan a kipan a, Pasian lam a eimah leh eimah kibawl dikna diing bangbang a om a? Chihte i ngaihsut khawmzaw diing uh hi.

1. Mipite Lak a Mi Hausate

Jerusalem khopi a Jesu a luut ni in, Mi hausa khenkhatte’n Jesu zahtak man leh, pahtawina piakna zong hilou in, mipite lak a minthanna a ngahna diing uh leh mite kipaksak a, mipite lak a theih a a omna diing uh, leh a hausatnate uh lahna in lamliang dung ah a puante uh a phah uh hi. Tulai chiang in Saptuam ah silpiak i kidem bawl ua, neihsa-lamsate leh sum-le-paaite bang i thoh or i pia ua, Nna mu a sepna zopthakte bang in a khaloh masa pen uh, Pasian tungtawn a nna a muh pen uh lungdamna lahna daan in a Saptuam ah a pia ua, a hoih mahmah kasa hi. Hilezong Pasian pen lungsim enpa ahi a, silpiak enpa hilou ahihna ah, silpiakte i piak kawm-kawm un, Amah kiang ah i lungsim zousiah uh zong pia a, bungkhe diing in i ki-ngen uh hi. Jerusalem a Jesu a luut ni a mi hausate’n silpiak a piak bang un a lungsim uh zong a na pia le-uh, Pasian lungdam mahmah diing hi a, hilezong a na pia lou uh ahihman un a dah-huaipi suak hi.

 

2. Mipite Lak a Mi Zawngte

Hosana chi-a kikou mipite lak a mi zawng khenkhatte’n zong, tulai a Khristian tamtakte bang sim in, mi dangte bawl bang a bawl a kinei in, tuumsing baate a khiak uh hi. Ei Khristian tamtakte pen, mi zong kikhawm a kuan sam ahihleh chi a kikhawm mawk-mawk pawl a kitam a, tualeh i nu-le-pate uh Khristian ahihziak ua Khristian kichi bang a tam in i tam mahmah uh hi. Hilezong mi khat Khristian a hihna or a suakna diing in, amah-mah in Jesu Khrist a lal (a hinna kumpipa) leh a hundampa a a saan masak a ngai a, Jesu Khrist a theihchian chiang bek in Khristian hithei pan ahi.

Khrist panglou a Khristian i tamluat ziak un, Jesu sisan a phuhsa Saptuam ah Jesu mun diing omlou thei zeel-zeel ahi kichi leh ki-genkhial lou maithei diing ahi. Tuaziak in Jesu nungzui taktak hih sawm in chi in i ki-ngen zaw uh ahi.

 

3. Jerusalem Khopi Mite

Mi honpi in Jesu a zuih dupduplai un, Jerusalem khopi mite’n a zuihpih kei ua, a kituam koih sese ua, Jerusalem khopi mi-le-sa ahihna uh a kisaktheihpih uh hi. John 12:12-19 sung i sim leh, Jerusalem khopi a Jesu a luutlaitak pen, khopi miten a na theilou uh a hihman in lamdangsakna tawh kidim ua, ‘en un, leitung in Amah a zuita uh,’ a na kichihloh uh hi. Hih Jerusalem khopi mite’n, Khopi siangthou mi-le-sa ahihna uh a kiletsakpih or a kisaktheihpih bang un, ei Khristian kichi tamtakte’n zong, i hihnate uh i kisaktheihpih ua, gaulpau-dekna bang in i zangthei zeel uh hileh kilawm mahmah hi. Tuaziak in i kisaktheihnate uh, i kiletsaknate uh, leh i kimitsaknate ua kipan in Jesu keengbul ah kileh ni hang in, i hihna bangbang uh tawh Pasian nnate sem in, Pasian in a neih a leitung missions a taangtun theihna diing in, Pasian tawh pangkhawmte hita ni, chi in i ki-ngen uh hi.

 

3. Mipite Kikouna …. Hosana….

Mipite Hosana, Hosana chi in a kikou zuazua ua, hibang a a kikounate uh anop-in nop a sakthoh ua, hilezong ni tamlou sung mah in Khailum un!... Khailum un!.... chi in a kikou uh hi. Halhthakna a tun chiang leh pianthakna i neih chiang un, laam in i diang ua, khitui luang zeen a thu-ngen in, leh i theitawp uh suah in Pasian i phat ua, hilezong ni tamlou sung in i pianthakna uh Pasian mah kilhlumtu in i pang khathei zeel uh hi. Hosana chi a kikoute mah in Crucify Him chi uh hi. Hilezong eite’n i chihlouh diing uh ahi. Jerusalem khopi a Jesu a luutlai a Hosana chi a kikoute i baklouh diing uh ahi. Hosana chih pen gualnop bawlna ahikei a, Khailum Un chih zong gualnop bawlna hilou hi. Pasian in a ngaihkhawk mahmah thu ahihziak in nang zong ngaikhawk a Pasian lungsim zong kawm-kawm a, Hosana chi a, Khailum un chilou diing in Pasian in thupha hung peta hen.

  

TOUPA PASIAN IN A THUPHA HUNG PIATA HEN……