TOUPA NITAAK AN
Jesu
Khrist nung ka zuihkhawmpih saptuamte, i Pa Pasian, Tapa Pasian, Kha Siangthou
Pasian min in, kei leh ka innkuante’n lung kituaktak in, Innmun pan in, i Toupa matsak a a om diing kuan a, nungzuite
tawh ankuang nunung a uumna uh theizing kawm in Advance Good Friday chibai ka hung buk hi.
Bible;
Matt.
26: “26 Tuabang
a ann a neklai un, Jesu`n tanghou a la a, thupha a pia a, a balkeek a; tuachi`n
nungzuite kiang ah apia a, ‘La unla ne un, hih ka taksa ahi,’ achi hi. 27 Tuakhit
in Aman nou a la a, kipahthu a gen a, a kiang uah apia a, ‘Na un un, dawn un.
28 Khelhnate ngaihdamna diing a mi tampi a ding a pawt, hih ka sisan a
thukhunthak ahi. 29 Hinanleh k'ung hilh ahi, ka Pa gam a nou tawh a thak
ka dawnni atun masangsiah tuban hih grep-tui ka dawnnawn kei ding,’ achi hi.
30 Tualeh la asak zoh un apawt ua, Olive mual ah a paita uhi.”
Nekna
mun khat pouhpouh ah, ankuang uumdaan a kibang kei a, khual i hawh leh, i
zintunnate ankuang sawkdaan bang in an kine a, or inn neite’n an a na nek
ngaina daan uh bang in an kine hi. Tuabang in tuni a i ngaihsut diing uh an
pen, nang a hilou a, kei zong hilou a, i Toupa nitaak An ahi. Tuaziak a Toupa
deihna tawh kituak a hih an pen i neek diing uh ahi, chi in i ki-ngen masa uh
hi. Aziak pen, eima deihna bang a i neek uh leh i tung uah siatna tungthei a,
hibang siatna pen, a ut bang ua ne, Korinth Saptuamte tung ah a na tung khinta
hi (!Kor. 11:23-32 sim in).
Tualeh
hih Toupa Nitaak An tawh kisai in gindaan or ngaihdaan tuamtuam tampi a om a
tuate lak ah ei Baptistte pomdaan ahihleh, ‘Toupa nitaak an ah, Jesu Khrist pen
a taktak in a hung omkei hi. Hih an nete’n Jesu Khrist sihna theihzingna in a
ne uh hi,’ chih ahihziak in, hih An pen
Toupa Theihzingna An zong ahi hi. Tuni a hih An ne diing kisate i hihna uah,
Hih An tawh kisai a Toupa deihna leh tupna i En diing uh hi.
1.
Hun Paisate Etna (1Kor. 11:23-25)
Toupa’n a nungzuite nitaak an a neekpihlai
a tanghou a balkeek ziak a, eite’n zong Toupa Theihzingna diing a Toupa Nitaak
An i neek chiang ua tanghou pen a kimawk balkeek hilou hi. Toupa’n hih tanghou
pen ka taksa ahi a chi hi. Tuaziak a Toupa nitaak an i neek chiang ua, i Toupa
uh thuaknate, vuak a a omnate, Roman gaalkaapte zeepnate, siik-lingte’n a taksa
a kuihkeek daante leh a lu a ling lukhu khu zeen a a thuak daante, a taksa tung
a kikhen luut, a khut leh a keeng kilhnate, a naak tei a dawt a a omnate
theizing kawm a, hibang a A liamnate ziak a eite’n hutdamna i ngahtheih ua,
taangtawn hinna i ngahtheih daante uh a theihzing diing uh ahi, chih pen
alou-theilou ahi. Bible; Is. 52:14, “Amah lamdangsa mi tampi om hi.
Mi dangteng saang in A meel suksiatzawk in a om a, mihing lim-le-meel zong paw
nawnlou khop a suksiat in a om hi.” Is. 53:3-6, “3Amah kilh in a om a, mite
deihlouh leh huat ahi. Dahnate thuakmi, lungkhamnate thei mi ahi. Amah mukha
mite’n mai huum a a lehngatsan uh mi tawh kibang ahi. Amah a kihdak-huai a,
kuamah in a ngaisaang kei uh hi. 4Aman i zawngkhaalnate leh i dahnate a pua
taktak a, eite’n lah Pasian saat, Pasian vuak leh thuaksak i hisak uh hi. 5
Hilezong i mawhnate uh ziak a sukliam ahi a, i thulimlouhnate uh ziak in vuak
sidup in a om hi: i lungmuanna diing un gawtna a thuak a, vuak-liam a a omnate
ziak a damask a om i hizaw uh hi. 6 I unpi un, belaam bang in i na vaakmang ua,
eima lampi tuam chiat uah i pialmang uh hi; hinapi Toupa’n Ama tung ah i unpi
ua i thulimlouhnate uh a ngata hi.”
Tanghou chi a i na neek uh i Toupa uh
taksa, nang leh kei a diing a a kibalkeekna pen, thuakna mulkim-huai mahmah
ahi. Tuaziak in hih tanghou, Toupa’n ka taksa a chih pen thupi ngaihsut diing
in Jesu minsuang in i ki-ngen uh hi.
2. Hun Hung Tung Diing
Etna (1Kor. 11:26)
Tuni
a Toupa nitaak an i neek bangbang uh, i Toupa tawh Pasian Kumpigam a i
neekkhawm hun diing in i gaal-et taktak uh hi. Bible; Matt. 26:29, “K’ung hilh ahi, ‘ka
Pa gam a nou tawh athak ka dawnni atun masangsiah tuban hih grep-tui ka
dawnnawn kei ding,’ achi hi. “Hua kinepna Pasian thupi leh i hundampa uh Jesu Khrist kilakna ding thupitak pen ngak
in i om ding uh chih a hunghilh hi (Titus. 2:13).”
Tuni
a i neekna bek ua bei diing hilou a i it uh leh a min a i kikhopna uh Toupa
tawh Pasian gam a i neekkhawm diing uh kinem kawm leh, Jesu Khrist mitsuan a
nei kawm a hih an siang I neek diing uh ahi.
3. Sunglam Etna (1Kor.
11:27-32)
Toupa
Nitaak An pen, chitna neiloupi a zong neektheih ahi a. Korinth Saptuamte bang a
thupi ngaihlou a bawltheih zong ahi hi. Tuaziak in i hindaan uh, i omdaan uh, i
kizakdaante uh kichiantak a, eimah leh eimah ki-enchian diing in i ki-ngen uh
hi.
Bible; Laate. 32:5, “Tuakhit in ka khelhnate na
kiang ah k'ung thei sak a, ka tatsiatna zong k'ung ip kei hi; Ka gamtatvaalna Toupa kiang
ah ka phuangzak diing,” ka chi a, tuachiin nang ka gitlouh khelhnate n'ung
ngaidamta hi. Selah.” Chi a David in a genbang in, Pasian mai ah kisuahkhia ni,
kiphuangzaak ni hang in tuachiin i ne diing uh hi.
Toupa
Nitaak An ne diing a kisa i hihna uah, Hunpasa ah bang a na chi a? Mailam hun
ah bang a hung chi diai? Chihte leh, Eima mimel sunglam hinkhuate enchain a
Pasian mai a kiphuangzaak diing in i ki-ngen zaw uh hi.
TOUPA’N
THUPHA HUNG PETA HEN
Comments
Post a Comment