PATE HAANTHAWNNA (E02)

 

By: Pastor Thangdoulal Suantak

Thupi: Pate Aw, Ngaihtuah Un

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in chibai ka hung buk hi.

Tuni a i tate uh hinkhua a panmun poimawhtak nei a, tate a diing a kha-muanna nu-le-pa hi a, i tate kepna ua lungkim leh kha-muang a i om chiat theih diing uh deihna in Pate tengteng zahna salaam ka hung buk hi. Tate keem a mawhpuakna saangpen, Pasian a kipan a ngahte i hihna uah, i lungkimna zah un i tate uh i keem na uh hiam? Tualeh i tate uh zong i kepdan uh leh i limsakdante uah a lungkim diing uh hiam? Chih ngaihtuah kawm in, Pa hihna a i mawhpuakna uh i zawhtheihna diing un, hih a nuai a thu sawmte i na sim diing uh hi. Tualeh hihte’n na zi-le-tate uh tawh na kaal uah, ki-itna, kilaichiinna hoihzaw a hung tut diing k’ung kineppih hi.

 

Khatna: Na Tate Nu Zahbawl In

Pa khat hihna ah, na tate a diing a na bawltheih tampite lak a a hoih penpen ahihleh a nu uh na itsak diing ahi. Na kiteenna uh na khauhsak/ damtheitak a na omsak diing ahi. Nu leh Pa kizahtaattuahna leh ki-itnate pen tate’n a muh diing un, a theih diing ahi. Na nupa kaal uh damna pen na tate a diing a zong damna, na zi a diing a zong damna, na u-le-nau a diing a zong damna ahi chih thei kawm in na tate nu it in. Hih tawh kisai a theihbeh ut na neih leh “protecting your marriage” chih a na sim in.

 

Nihna: Na Tate Tawh Hun Zangtam In

Matt. 6:21: Na gou omna uah na lungsim uh zong a om hi.

Tate tawh hun zaktam diing chih pen Pa khat a diing a thubaih hilou ahi chih theihsa ahi. Tualeh i singtaangpa tawndan uh tawh zong kituak khollou chih diing hiam in zong om hi. Eimite lak ah, Pa khenkhat pen, tate tawh kigop diing a ngaisiamlou pawl ki-omthei hi. Hilezong a taktak a chih in, tate’n Pa itna pen a hun zakkhawmna ua kipan in sim uh hi. Na tate’n na itna a muh ua, ka pa’n a hung it in, a hung ngaina taktak hi, chih a theihna diing un nah un a tamtheibang in na tate tawh zangkham in. Ta itte’n a tate uh tawh omkhawm nuamsa ua, a itloute’n tate tawh omkhawmlouh pen khawksalou uh hi. Ta itte’n a tate uh tawh hun a tamtheibang pen a zakkhawmna diing ngaihsun ua, a itloute’n ngaihsun lou uh hi. Na gou omna uah na lungsim uh zong a om hi,’ chi ahihman in, na tate Pasian a pan a na gou ahi uh chih na pomtheih leh, na tate tawh nah un zangtam in.

 

Thumna: Ngai Masa Inla, Tuachiang In Gen In

Ei mite lak ah, nute tawh tate kihou mun bang in Pate leh tate kihou tam khollou hileh kilawm hi. Pate’n tate a houpih chiang un, a taangpi in tate a buai hun uh ahi deuh hi. Tuaziak in nute’n tate kiang ah, na pa’n hung tua chih diing ahi, chihbang in thuhilh uh hi. Tuaziak in Pate’n ngaihsut ni hang in, i tate uh haksatna leh buainate ngaihkhiatsak masa ni. Aziak pen ama’uhte i ngaihkhiat masak leh, ama’uh khamuang in, a haksatna uh i theihpih uh chih a muthei uh hi.  Hibang a hihziak in tate lungsim leh ngaihdante ngaikhe ni hang in, tua khit chiang in houpih le-hang, a hung khantouh dan bangzeel un a nisial hinkhua ua haksa a sakte uh pen, a puakdan hung siam deuhdeuh diing uh hi.

 

Lina: Itna Tawh Na Tate Thunun In

Naupang zousiah in thuhilhna leh thununna a poimawh ua, gawtna a kisamkei uh hi. Na tate sil bawl hoihlou omte a hoihlouh dan theisak inla, tua hoihlou in gah a neihdante hilhchianzaw in. Huhamna leh hugiikna omlou a, tate nemtak a thununna in Pate itna tate tung ah kilangsak mahmah hi. Hih tawh kisai a theihbeh ut leh, “8 Things to Know About Disciplining Your Child.” Chih article a na sim in.

 

Ngana: Na Tate Diing A Pa Ettontaak Hi In

Nu-le-Pate pen, i tate ua diing a ettontaak a hi tawntungte i hi uh hi, chih nu-le-pa in theih masak diing ahi. Tuaziak in naupang khat in a nu leh a pa tawh kibakna mizia tamtak nei hi. Hibang ahihman in tate hoihna leh siatna tawh kisai in nu-le-pa in panmun leh mawhpuakna thupitak nei hi. Tuaziak in nu-le-pate’n i omdante ua kipan a tate, ki-ngaimkhiatnate, gin-omnate, chihtaknate, leh Pasian deihna tawh kituak khankhuate hilhzaw le hang hoih mahmah diing hi.

 

Gukna: Na Tate Diing In A Teacher Uh Hi In

Kithuhilhna diing in saang-inn a poimawh pen kei a, eima innsung chiat poimawh masazaw hi. Pa khat i hihna uah, i tate uh hoihtak a i thuhilh diiing uh ahi a, dik leh dikloute, hoih leh hoihloute tawh kisai a thuhilh a, a diklam leh a hoihlam a teel uh hiam chih i etchet diing uh ahi a, tualeh tate’n deihteelna hoih a neih ua, silsia saang a sil hoihte bawl diing a utzawkna dding ua, ni sial a i makaih ua, ama’uhte i panpih diing uh ahi.

 

Sagihna: Innkuan A An Neekkhawmna

Innkuan a an neekkhawmna pen eimite lak ah tam gen ngai diing in ka gingta kei hi. Aziak pen innkuan a ankuang umkhawmte i hi uh hi. Hih innkuan neekkhawmna in a deih pen ahihleh kilungkhatna diing, duh-le-ngaih kitheihtuah a, khat-le-khat kitheihchian zawk semsemna diing chihte leh a dang tami a om hi.

 

Giatna: Na Tate Khankhua Simdan Siam In

Tate hinkhua leh lungsim luahdim bangbang a om a, chihte pen nu-le-pate’n i sim diing uh ahi. Tuabang a tate hinkhua i simkhiatnate uh tungtawn a thu hilh a, a hung khanlet deuh chiang ua ama’un a hinkhua uh a simsiamna diing ua panlak diing ahizaw hi. Hih tawh kisai a theihbeh ut na neih leh, “6 Tips on How to Show Your Child Reading is Awesome,” chih article a na sim in.

 

Kuana: Na Lainatna Kilangsak In

Naupangte khamuanna hung kipatna pen, a innkuante’n a it uh, a ngaina uh, chih leh a hehpihna hi chih a theihna ua hung kipan ahi. Tuaziak in Pate aw, i tate un i itna uh muh diing a nei uh hiam, i tate’n i itna uh a kham uh hiam? Tate khavaatak a omsak nu-le-pa i hih khakdiing uh lau-huai hi.

 

Sawmna: Pa Nna Sep Pen Zousiangta Chih Omthei Lou Ahi Chih Thei In

Tate a pichin ua, inn nusia a, ama’uh utna bang a om diing a kimansa hitale-uh zong, ama’uhte’n Pate thumopna leh pilnate a mitsuan tawntung hi. Ama’uhte’n a laisimnate a sunzomta zong un, zi a neita zong un, ahihke’h nna (sepna) a neita zong un a hinkhua uah a pate un mun poimawhtak luahdim veve hi. Tuaziak in Pate pen tate a diing in poimawh uh hi. Hibangteng ahihna ah, pate nna septe leh mawhpuaknate pen tate pichin ziak a zouta hilou in, a kizoukim theilou, damsung a sual diing mawhpuakna ahi.

 

A tung a i gen uh sawmte lak ah khoi pen nang a diing in a haksa pen a?

Hih thute na simna tungtawn in Toupa Pasian in thupha hung peta hen.