DIKTATNA IN NAM A TAWISAANG

 

By: Pastor Thangdoulal Suantak

 

Diktatna kichi kammal pen mizia (mi hihna) genna ahi a, mi khat hindan leh omdante genna ahi. Tualeh hih pen Pasian a hung kipan mizia (mi hihna) khat ahi. Aziak pen Pasian in leitung mihingte a diing in daan a hung pia a, tua daan tawh kituak a hinkhua zangloute pen mi khial a kichi a, a diktatlou, a muan-huailou a suak uh hi. tuaziak in Pasian thukhun leh daante tawh kituaklouhna ah diktatna a omthei kei a, diktatna omna diing mun ah diktatlouhna omkha zeel hi. Leitung ah mihing hi-in, ganhing ahihke’h vanhzak tuamtuamte hitaleh, a omna diing uh mun a a omkei uh leh ama’uh a diing in siatna ahi.

Etsakna:

1. Zusa pen Ngeu omna ah va-ihmu leh, Ngeu in bang lungsim a nei diai?

2. Sakhi pen humpi teenna ah va-giak leh, Humpi lungsim ah bang a om diai?

3. Uipi mai ah saguhbawk kikoih leh nelou in a omthei diai? (Nu-ngak leh tangvaalte pen saguhbawk bang a, a gawngsan khat mai a vaki-lui diaiduai louh diing i gen utna uh ahi).

4. Diktatna omna diing mun ah Diktatlouhna om leh, Pasian leh Setan in bang lungsim a nei diing uai?

5. Diktatna in Nam a tawisaan leh, Diktatlouhna in bang a tawisaang diai?

6. Mi diktat khat hi in na kithei hiam?

7. Hih a tung a doknate, na lungsim haamkam (heart language) tawh dawng inla, na dawnna pen Pasian in a sim diing hileh, ‘Ka dawn masang in kibawl hoih masa ni’ng,’ na chi ut diam?

I omna diing mun ua omna pen diktatna ahi chih i genna uh ahi.

 

Diktatlouhna Hi A I Theihte Uh Bangbang E?

1. Guuktaatna                                        7. Thumanlouhna

2. Zuau genna                                        8.

3. Mi kheemna                                      9.

4. Neekguukna                                      10.

5. Thu sawm piakte zuihlouhna            11.

6. Sumpung Laakna                              12.                                                       (leh a dangdangte).

 

Diktatna Tawh Kisai a Ngaihsut Thak Diing Khenkhat.

1. Nu-le-pate’n tate hihna diing a thupukna a bawlte uh pompih napi zui utlou hi hang.

2. Eima eima field/ground (Sepna) mun chiat a diktat zouloute i hihman un lawhchinna ki-ngah zoulou hi. (Etsakna: Ka sunghpa pen, Manipur govt. schoolpu khat ahi a, ama’n hibang in ka kiang ah hung gen hi: ‘Ka seppihte office kailou leh school a zong semlou a, inn a om a, saptuam a local secretary leh Missions tawh kisai a mawhpuakna lianpipi neite ahihziak un, ka kikhop diing zong ka thadah hi,’ chi hi). Ngaihsun in. Hihte’n Nam tawisaang theilou diing hi.

3. Mihingte pen ut bangbang bawltheihna diing a zaleenna nei a bawlte i hihang un, Pasian utna, deihna, leh lungsim bang a om diing a eite hung bawlpa Pasian kinepnate i hi ua, hilezong Pasian thu zuih pen sil hamsa leh hithei lou, sahkhua kihilhna, ei mimal tawh kisailou dan a ngaihsutte i hihman un, eite hung bawlpa daante siatsuahte i suak ua, a dik theilou nna khat suak ahihman in kitungtuang zou taktak lou hi.

4. Laisim diing a school kai hinapi a, lai sim utloute a diktat kichi theilou hi.

5. Nna sem diing a kuan a, nna semloute zong a diktat kichi theilou hi.

6. Utlouh ziak a manlouh chih zong diktatna hilou hi.

7. Upa leh Pastorte kiang a i thubuaite uh tut diingte hinapi hang a, police leh court a kitutte ahihman un, diktatna tawh i kigamla uh hi.

 

Chakma Mite Kithuhilhna: Laisimna pen leitung gaaldouna ahi a, a sim zouloute’n gaal lel uh hi. Gaalzawhna diing in mitamna, tha-haatna, leh gam neihna saang, laisimna poimawh zaw hi. Laisiamte gam lian a, laisiamloute gam neu hi. (Chakma Autonomous District Council paikhiat hita hen! Chi a MZP-te’n lam zuihna a neih uh phattuamna bang a awm a?)

 

Diktatna In Bangziak a Nam a Tawisaang E?

Bible: Roman 7:19. ‘Aziak silhoih ka bawl ut pen ka bawl kei a, hinanleh sil hoihlou ka bawl utlouh pen ka bawl zawsawp hi’.

Pasian in a mite siatna diing vai hawmlou hi. Leitung luahdim a mihingte a pun diing uh lunggulhpa pen i Pasian uh ahi, chih thei masak a nei in hih a nuai a thute i ngaihsut khawmlai diing uh hi.

1. Nam khat tawisaan ahihna diing in, Sumsinna (Economic) leh Diktatna, khoi pen a poimawh zaw a? Dokna tawh kisai panpihtu: I Economics uh pen Diktatna a kilamtou ahih diing ahi.

2. Nam khat a khantouhna diing in, Economics leh Diktatna tawh Pasian a kisaikha hiam? Dokna tawh kisai panpihtu: Economics leh Diktatna bulpi Pasian ahi a, Pasian tawh kisai lou a khangtou bangmah omlou hi.

3. Economics leh Diktatna bulpi Pasian ahihleh, eite leh Pasian banglam in i kisaikha ua? Dokna tawh kisai panpihtu: Eite leh Pasian kisaikhaakna a tam a, tuate ahihleh: (1). Pasian bawlsa mihingte i hi ua, tuaziak in Setan kheem in i om uh hi. (2). Mawhnate a pan a Jesu sisan a tatsate i hi uh hi. (3). Ginna tungtawn a hih Pasian nna septe pomkip a, Amah a diing leh, Amah deihna leh lungsim tawh kituak a hinkhua zang diing a Pasian ki-lam-etnate i hi uh hi. (4). Nna leh sil zousiah ah eite leh Pasian i kisaikha uh hi.

4. Ahihleh, Economics, Diktatna, Pasian leh eite kisaikhaakna in Nam a tawisaang diing maw? Dokna tawh kisai panpihtu: Hi thamtham hi. Tulai in diktatna pen motna hiam, mot-huaina hiam in mite’n ngaihsunta ua, i gam leh i nam uah zong diktattak a nna sem mi omlou phialphialta hi. Govt. office-te ah nna leh silte diktak in pailou a, a sung a semte zong ginatak a sem tamlou hileh kilawm hi.

 

Diktatna pen a thu bek a gen leh theih hilou a, gualzawhna ahihna diing in panla ni.

Eite gualzawhna pen i Pasian uh gualzawhna hi a, eite gual lelna pen i Pasian ua diing a zong gual lelna ahi.