A DINMUN LEH HIHNA THEILOU MIHING (E03)

 

By: Pastor Thangdoulal Suantak

 

Jesu Khrist nung ka zuihkhawmpih saptuamte, i Pa Pasian, Tapa Pasian, Kha Siangthou Pasian min in, kei leh ka innkuante’n lung kituaktak in, Innmun pan in chibai ka hung buk hi.

BIBLE: 1Kum. 1:5 Tu in Haggith tapa Adonijah, amah leh amah kitawisang in, “Kumpi diingpa ka hi,” a kichi hi; ama’n sakol lengkaite leh sakol tungtuangmi sawm nga, a mai a na tai diingte guat in, kisakkholhna a nei hi.

I na gensa bang un, leitung mihingte lak ah a hihna diktak leh a dinmun diktak thei a hinkhua zangh kuamah ki-omlou i chi ut masa uh hi.

 

Tutung a “A Dinmun Leh A Hihna Theilou Mihing,” chih thupi tawh kisai a i taangthu suut diing uh ahihleh, ADONIJAH taangthu ahi.

 

ADONIJAH pen Hebru Bibkle ah, ʾAdoniyyah leh ʾAdoniyyahu chi’in a kigelh a, a khiatna ahihleh, “Ka Toupa YH Ahi,” chihna ahi a, hih YH or Yah pen YHWH tom-genna ahi.

 

Adonijah pen David Tapate lak ah a lina ahi.

1. Amnon. A taak pen ahi a, Absalom a sanggamnu a suam zaik a Absalom in a thah ahi.

2. Kileab or (Daniel). Karmel a Abigail tawh a tapa ahi. Amah a nihna ahi a, a neulai a si ahi.

3. Absalom. A thumna ahi a, a pa a dounalam a si ahi (1Khang 3:1-2).

4. Adonijah. A lina ahi a, a pa David theihlouhkaal a a kumpitouna laak sawm, leh a nu kiteenpih sawm a, Solomon in a thahpa ahi (2Sam 3:4; 1Kum 1:1-11; 1:32-35, 50-53; 2:13-25).

 

DAVID TAPA KHAT A KIPAN IN THUM TAN SITA HI. ADONIJAH A LINAPA’N A PA KUMPI ZAA A LUAH DIING HILOU MAW?

Ni danglai a Israelte tawndaan pen, tulai a eite tawndaan tawh kibang a U-zawte pen pa zaa luahte, pa tawh teengkhawmte ahi uh hi.

David tapate lak ah Adonijah a lina ahi a, ama tung a pasal thumte lah sita uh ahihman in, ama’n (Adonijah in) a pa zaa a luah diing ahita hi. Ahiinlah lawpna lianpi a nei a, a pa zaa a luah kei hi (Adonijah lawhsapna taangthu 1Kum. 1:1-30).

 

ADONIJAH SIHNA

(1KUM. 2:13-25): 13Tuakhit in Haggith tapa Adonijah, Solomon nu Bathsheba kiang ah a hung pai hi. Bathsheba in, “Lungmuang a hung pai na hi ama?” chi'n a na dong hi. Ama'n, “Lungmuang a hung pai ka hi,” a chi hi. 14 Tuakhit in ama'n, “Thu khat k'ung gen thei diai?” a chi hi. Bathsheba in, “Gen in,” a chi hi. 15 Adonijah in, “Kumpigam pen kei a ahi a, Israel mi zousiah zong ka vaihawm diing a lam-en uh chih na theihsa ahi; hitalezong kumpigam pen ka sanggampa a diing a heikhiat in a om a, Toupa guatna bang in ama'n a tang hi. 16 Tu in na kiang ah ka nget ut khat a om hi; hung deek ken,” a chi hi. Bathsheba in, “Gen in,” a chi hi. 17 Adonijah in, “Kumpi Solomon kiang ah hung ngetsak in, ama'n na thu a hung nial kei diing hi. Shunam mi Abishag ka zi diing in hung pia hen,” a chi hi. 18 Bathsheba in, “Hoih mahmah e; nang a diing in kumpipa ka na houpih diing hi,” a chi hi. 19 Tuachiin Adonijah taang a thugen diing in Kumpi Solomon kiang a Bathsheba a vapai hi. Bathsheba dawn diing in kumpipa a ding a, a mai ah a kuun hi; tuakhit in a kumpitouna ah a touta hi. Tuachiang in kumpipa nu a diing in kumpitouna khat a hung la ua, a ziatlam ah a tou hi. 20 Bathsheba in, “Sil neu khat k'ung ngen ut hi; hung nial ken,” a chi hi. Kumpipa'n a kiang ah, “Ka nu aw, na nget ut pen gen in; k'ung nial kei diing hi,” a chi hi. 21 Bathsheba in, “Shunam mi Abishag pen, na sanggampa Adonijah zi diing a piak hi hen,” a chi hi. 22 Kumpi Solomon in a nu a dawng a, “Bang diing a Shunam mi Abishag pen, Adonijah zi diing a na ngetsak e? Kumpigam zong ngetsak vanglak ve! Amah ka u taakpen uh a vele; amah a diing bek hilou, siampu Abiathar leh Zeruiah tapa Joab a diing in zong ngetsak tanla!” a chi hi. 23 Tuakhit in Kumpi Solomon, Toupa  min in a kichiam a, “Adonijah in a sil nget ziak a, a hinna a taanlawh kei taak leh, Pasian in a lawh lawh hung lawh henla, a saang a nasezaw in zong hung bawl hen! 24 Tua ahihziak in tu'n, ka pa David kumpitouna a hung tousak a, hung phutkip leh thuchiam innkuan hung hisakpa Toupa hinna sial in ka gen hi. Tuni a Adonijah a sih teitei diing ahi,” a chi hi. 25 Tuachiin Kumpi Solomon in Jehoiada tapa Benaiah a sawl hi; ama'n Adonijah a saatpuk a, tuachiin amah a sita hi.

 

ADONIJAH  DINMUN L EH  HIHNA POIMAWH NIHTE

1. David Tapate lak a a taak pen hikei lezong, a tung a teng sita a hihman un, a taakpen hihna ngahta hi.

2. Israel khang paidaan a a pa David zaa luah a, kumpi diing ahi.

 

ADONIJAH  IN  A  DINMUN  LEH  HIHNA  POIMAWH  TEGEELTE  A  NGAHZOU  EI? NGAHLOU.

1. David tapa taakpen tanvou a tan diing pen tangzou lou.

2. A pa zaa luah a kumpi hi diing hinapi’n ngah zoulou hi.

 

ADONIJAH IN A KITHEIHSIAM LOUH BANG OM E?

1. Adonijah in a pa David leh a pa Pasian tawh pangkhawm a a pa kumpi zaa a luah diing ahihlam theisiamlou hi. Amah leh Amah kimuang ahihman in kumpi hilezong tatsia diing a, Pasian zong limsak lou diing ahihman in Pasian in a pa zaa a luah diing lemsakpih lou ahi diing hi. Hih thute Adonijah in theisiamlou ahihman in lawhsam dimdem hi.

2. Adonijah in tapa taak pen tanvou a tan diing pen thei a, hilezong hih tanvou pediing pen Pasian ahihlam theilou hi.

3. Adonijah in a pa china or damlou ngaihsak lou in a hihna or a zaa delh masa zaw ahihman in, bawlkhial hi. A pa a kep masak diing, tuakhit chiang a a zaa a laak diing hinapi, a masa diing pen masasak lou ahihman in lawhsam hi.

 

Adonijah mawhsak ken. Nang leh ke’n zong Adonijah bang in, i hinkhua ah a masa diing pen masasak lou in, a nukhiik diing pen masasak maithei i hi uh hi. Bible in, “Pasian gam leh a diktatna zong masa un,” chi-chi napi, eite’n i nisial hinkhua ua i poimawhte uh ki-ngaihsak masa zaw gige hi.

Adonijah in a tanvou bekbek a buaipih bang in, nang leh ke’n zong, ka tan diing, ka ngah diing bang e, chih bekbek ki-ngaihsunkha thei zeelzeel hi. Tanvou buaipih Jesu nungzui na hih leh, buai-huai mahmah diing hi. Bible in, “Kuamah in pu nih nna a semthei kei diing,” a chi hi. Na tanvou leh Jesu kua na deihzaw a? A nih a na neihkhawm ut leh, Jesu teel in. Jesu bek na neih leh Jesu’n na tanvou diing hung na kholsak diing hi.