Na Ham Kamsuak Uh Chi Sawh Hehpihna Hi Gige Hen

 

✍️ Pastor Thangdoulal Delhi

Kumpinu lawng bawlkhiat, Titanic lawngpi, hoih leh muanhuai tungtuang a siam, tuilak a tum theilou diing a, detdoutak a siam leh muantaak a kigen minthang pen, a khatvei na diing in, Southamton pan a New York zuan a khualzin diing ahita hi.

Hichibang a, a zinkhiat diing kuan laitak in, Pi Albert Carwell in, “Na lawng uh tui a tum theilou taktak amaw?” chi in a vadong kha chiitchiat hi.

Tuachiin Lawng khawlmun a semtu mi khat in, “Pi aw, na Pasian in zong tuilak ah a tumsak theikei diing hi,” chi in, duh-aamtak in a na dawng hi.

Tuachiang in, hih lawng in, vangsiat huaitak in vuuk-tangh a phu-kha a, tuachian a kisiata a, mihing 2000 lak tuangte lak ah, mi 1517 diingte’n leitung a haankhuk thuuk pen a hung na zawtsan ua, tui nuai thuuktak a vui-liam ahita uh hi.

Hih lawng in, semtu khat kammal hoihlou, ahihkeileh pilvangtak a thu a genlouh ziak a, siatna thuak hi in a ngawhthei diam? I ham kamsuak ua i pilvang mahmah diing uh pen a na poimawh mahmah hi.

I kamsuak un mi dangte a sukliam theih bang in, ei mahmah zong a hung liamsak thei hi.

I ham kamsuak uh pen chi-bang a al, hehpihna tawh paikhawm ahih ngeingei diing ahi.

Mi zousiah bang chibang a dawn diing ahia chih na theihtheihna diing un, na ham kamsuak uh chi sawh hehpihna hi gige hen. (Kol. 4:6)