Numeite tungtawn a kikheelna thupizaw a omna diing in... Women for Greater Change chi ni aw..

 Women for greater change

I innsungte uh leh i minam sung ua kikhelna huaisetak tungta hi a i theihlai ua, tu dinmun a i muh uh leh i theih uh kikhelnate saang a, kikheelna thupizaw a tunna diing a “Numei” poimawhna thu gen diing pen, eite leh Judahte sung a thuklut zoukei leh kilawm hi. “Numei leh naupang thu kimang kenteh” chih kammal na hahzak mite leh numei ngaihsanna na neilou mite i na hih ziak un, “Numei na hun in om in” chih leh “Numei na taw-dim in tou khiinkhian in,” chih kammalte tawh i numeite uh i na hou taangpi uh hi. Hitalezong tu hun kikheelnate in hibang kammalte hung zangsak nawnlou deuhta ahihna ah, tu hun kikheelnate saang a thukzaw a kikheelna i neihna diing ua, NUMEI poimawhna tamlou i kikum diing uh hi.

Siamah Lun kichinu in, agapedigest.com kichi website ah, “Numeite pen mun khempeuh ah kisam mahmah/ alo thei lo dinmun ah om ahihman in, citak, hanciam, Pasian’ thu mang in om hi leh na lianpipi a semzote, mi manpha mahmahte ahih lam ka tel a, numei ka hih ka angtang mahmah hi,” a na chihbang in, leitung ah numei kideihlouhna omlou a, innkuan sung leh i nam sung uh puuksiatna diing leh lamtouhna diing in zong Numei mah a na poimawh hi. Hichibang ahihziak in, ettontaak numei leh ettontaak lou numei, Laisiangthou a kimuthei mite tanchin tamlou i ensuk diing uh hi. 

“Ettontaak lou numeite:

1. Evi: Eden huan sung a innkuan nuntakna diing a Toupa’ piak pen zahtak lou in, mitmuhna lam kepzawh louhna ziak in a pasal lam pialpih hi. A suahtakna diing in a pasal thu zong mang lou ahihman in leitung in siatna ngah lawh hi (Gen.3:6). Hinu in a tunsak kikheelna pen deih huailou hi.

2. Job' Zi: Innsung a haksatna a tun chiang a Pasian samlou a, Pasian deihna zong muh sawmlou a, Pasian samsia diing a, a pasal housianu ahi. Innsung a nop chiang a biakna mi mahmah napi a, haksatna a tun chiang a phun a, Pasian na-ngawn a langpan utte pen Job zi tawh kibang ahi (Job 2:9). Hichibang numeite pan a hung kipan kikheelna pen, khantouhna lam hilou in, sihna ahih tuakzaw hi.

3. Lot Zi: Pasian in a innkuan ua a sapkhiat hi napi, innsung Nu pen nunghei kik ahihman in chi-khuampi suak hi. Innkuan sung ah Nu pen hi napi-in pa pen vaihawmnate kantan a, biakna ziak a leitung taisan diing haksa a sate pen Lot zi tawh kibangte hi (Gen. 19:26; Luke17:32).

4. Mikhal: A pasal David Toupa min phat a a laam laitak a, va-laampih diing saang in a na zumpih zawsawp hi. I pasalte Pasian a diing a, a kipaik chiang u ana dongkholh tawntung numei, nupa kaal a Jesu a om diing na-ngawn a deihlou numeite pen Mikhal bang ahi uh hi (II Sam.6:16; 20-23).

5. Jezebel: Ama huang sung ah huaihamna tawh om a, a vengpa Naboth huan laksak diing in a pasal kun hi. Israel kumpi Ahab a lawmpa ziak in kisathei hi. Pasalte’ nasep theihna suang a mite tung a zawh thawhna tawh gamta mite pen, pasalte a buaisak, kitapkhapna a bawl Jezebel tawh kibang hi (I Kings. 21:1-29).

6. Zeresh: Mordekai a muhdah ziak a kikhailupna ding sing, tong 50 a saang bawl diing in a pasal hanthawn hi. Pasian in tua numeinu vaihawmna lungkimpih lou ahi diing a, Mordekai kikhaina diing ah Haman kikhai lumsak hi. Midang khat thangsiat ziak a pasalte holhthawh den numeite pen Zeresh bang hi (Esther  5:17;7:10).

7. Herodias: Ngeina loupe a Herod tawh kiteeng ahih ziak in Baptistpa Johan in tai a, tua thu lungkim lou in a pasal kiang ah Johan lutang ngen in a lu tansak hi. Ei thuman louhna hung hilh diing a, Pasian’ hung sawl mite tung a thuk kik utna lungsim neih pen Herodias dinmun hi (Mark 6:14-29).

8. Saphira: Pasian kiang a piak diing a lawmte phualdap in sawltaakte mai ah zuau gen ahihman un, a nupa un sih lawh uh hi. Innkuan sung a Pasian thupha ngah napi a, Pasian a diing a kiphallou a, innkuanpihte silpiak, a gensia numeite pen Saphira dinmun a dingte ahi (Acts. 5:7).

Ettontaak numeite:

1. Sarah: Kichiantak in theikei lezong, Pasian in a pasal a sapna muangtak in a zuihpih hi. Innkuan sung leh pawlpi sung a kitaksapna om pen kichiantak in theikei lehang zong, Pasian in i pasalte a sapna leh a lamkaihna zuihpih theihna pen Sarah bakna ahi a (Gen. 12:1-3), hichibang mizia in innsung leh pawpi a diing in kikheelna thukzaw tunthei hi. 

2. Rebekah: Pasian thupiak muang ngam a, a muh ngailoh pasal kiteenpih diing in kuan vengveng ngam hi. Kiteenna thukhun ginna taktak tawh tukipte pen Rebekah bangte ahi (Gen. 24:57-60) ua, hih mizia pen kikheelna tuntu hihna diing khuampi khat ahi.

3. Ruth: A pasal sih nung a zong, a innpinu khahsuah lou, baan ah a pasal bek it, chihbang hilou in a pasal innkuante zong it hi. Hichibang mizia a neite pen Ruth tawh kibang a gen in om hi (Ruth 1:14-17); kikheelna tuntu khat hih sam na diing in Ruth mizia neih a ngai hi.

4. Abigail: Pasal gilou zukham Nabal tawh kiteng hi. A pasal’ gitlohna ziak in David in a innkuan un a thah sawm hi. “Ka innkuan gitlohna teng uh kei tung ah om ta hen” chi hi. Tua ziak in a innkuan un suahtak lawh uh hi. Nabal ahihleh si veve hi. Innkuan siatna ah mawh pua ngam Pasian kiang ah innkuan siatna teng a thuumpih ngamte pen Abigail bang hi (I Sam. 25:24); hichibang mizia neiloute pen kikheelna tuntu ahi theikei diing hi.

5. Hanah: “Pasian aw, ta nung piak leh nangmah kung pia kik diing hi” chi ngam hi. Tua pen Siampi Samuel hung pianna hi. Vaangam tunna diing a piangthak bek hi lou in, a hinkhua zong Pasian a pia ngamte pen Hanah bangte ahi ua (I Sam. 1:9-10), hichibang mizia pen kikheelna tuntu hihna diing a pelh theihlouh ahi.

6. Marka’ nu Mary: Jesu leh a nungzuite’n paikan pawi an a nekna diing un a inn, phaltak in a pia hi. Innsawn tung a na awngsak hi. Innkuan sung a nu pen in, Toupa tawh kipawl a houlim diing a mun a bawlsaknu uh pen innsung a Jesu hung teenna hi (Mark. 14:12-16), kikheelna tuntu khat hih sam na diing in i houlimna uh leh i houlim ngaih utte in thu pua mahmah hi.

7. Bethani khua Mary: Sathau namtui manphate it lou in Jesu lutung ah buak ngam a, a sam tawh a keng a nawtsak a, tualeh hua sathau namtui in innsung zousiah a zeelsuak hi. Toupa mai ah Nu pen kitamkham a, neih manpha penpen Jesu piak ngamna pen Mary dinmun hi (John.12:2-3). Jesu a diing a kipumpiakna mizia pen kikheelna tuntu hihna diing a poimawh mahmah khat ahi; neih-le-goute, dangka (sum-le-paaite) a kipumpiak a kikheelna tutsawmte’n na lungsim uh a na kheel un.

8. Mary (Jesu Nu): A hinkhua zakdan a deihhuai a, tualeh a ki-ngamkhiat siamna ziak in Pasian in a lungdampih hi. Nute’n Pasian deihlam a hinkhua a zak chiang un tate’n Pasian thupha ngah uh hi. Tualeh kikheelna tuntu hihna diing in zong, i hinkhua zakdan uh Pasian in a hung lungdampih a ngai hi.

Finally: Kikheelna pen utthu hiam, deihthu hiam a tunsak theih sil ahikei a, mizia hoihtak leh dettak, Pasian pomtheih mizia tungtawn a tunsak theih ahizaw hi.