🧑💻TONGKUP-ZAITHA💪
__✍🏻 Pastor Thangdoulal Suantak
Simtute, Ideal Nursing Home, Tuibuang pan in chibai aw.....
Tuni hun-nuam zang diing in Toupa'n hung ompihta hen
Baseball siam a minthang, Jackie Robinson kichpa'n a naupan lai in tum-le-ngim thupitak a nei hi. Hilezong lawm-le-gual ngaina mi ahi a, tuachiin a lawm-le-gual ngaihnat luatna lam in a hinkhua ah lam diklou a zuihlohta hi.
Khawlai a misual honte (Gang) tawh aziing-azaan in a omkhawm a, tuachiin a tum-le-ngim zousiah mitkha a suak siangta hi.
Zaan khat, a naupanlai leh teirawl ahih hunlai a, a tum-le-ngimte a ngaihtuah khia kha hi.
Tuachiin a lungbuai mahmah a, hilezong amahtang a kitankhia zou diing dinmun ah a omkei a, panpihtu diing a poimawh mahmah hi.
Tuachi a ki-ngaihtuah buaitak a hun a zaklai in, ni danglai a, a loipa khat toh a kimukha uh hi.
Tuachiin a kihoulim ua, a tanchinte uh a kihilhtuah uh hi.
Tuachiang in a loipa'n theihtawp suah in a na thumop a, a nu lungtang a natsak dante, amah mah a diing a zong sil poitak ahihdante a na genpih hi.
A khonunglam deuh a Robinson in a gendan in, “Ka loipa'n khawlai a ka loite tawh ka kigop gige pen, a phattuam louhdan leh… hansanna leh lungsim neitak a hinkhua zak zawkna pen, eite hung kikhelsak thei sil omsun ahi” a chi hi.
Robinson in a khawlai loite a paikhiaksan a, a sil tup pen a tak a mualsuah sawm in theihtawp a suah hi.
A damtheih nate poimawh ngaih in, kum tamlou zoh in Athlete hoihtak khat a hung suak hi.
Football, Basketball, Baseball chihte ah kimawl a siam mahmah hi.
A kaina University ah, game 4 a award la thei, masa pen ahi hi. Kidoupi II-na khit in Brooklyn Dodgers ah a kigelh lût hi. Mi vomte lak a Baseball Major Leagues Player masa per a ahih bek hilou in,
Rookie of the Year a diing a teelkhiat ahi hi.
Tum-le-ngim neihna chiang bek ah lohchinna a omkei hi.
Kuhkalna leh chihtaktak a panna a ngai a, hih pen beidonna nunglam a om lohchinna ahi.
🧑💻TONGKUP-ZAITHA💪
Comments
Post a Comment