GAMLAPI NA TUN MA IN, NA LAMPI ZUIH ENCHIAN IN

By: Pastor Thangdoulal Suantak

 

Judahte kumpipa hung piang amah khoitak a om ahia? Suahlam ah a aksi ka mu ua, amah bia diing a hung pai ka hi uh,” achi uh hi.

Herod kiang a kilehkiik nawnlou diing a amang ua Pasian a kihil ziak in, lamtuam zui in a gam lam uah a paita uh hi.

Tuachiin ama'uhte'n a paisan nung un, ngai in, Joseph mang in Toupa vaan tungmi a hung kila`k a, “Thou inla, nau ngek leh anu zohpih inla, Egipt gam ah taipih inla, thu k'ung piak masangsiah hua mun ah om un, Herod in naungek thah diing in zong diing a hihman in,” achi hi. (Mathai 2:2,12&13).

Gingtu hinkhua kipatna pen lamka-thuam tawh kibang sim ahihziak in, lamlian khat i zui diing a ahihleh lamlian dangkhat nusiat a na ngai zeel hi.

Lamdik a pai hi a i kitheihlai ua lamdik lou zui a paite na kihikha thei zeel ahihna ah, lamdik lou zui a paikha i hih ua ahihleh kilehna diing in gamlapi a na kitung mankha zeel hi.

Hichibang ahihziak in, Pasian mahmah in, eite mun diing a hung luahsakna singlamteh tung ah i mihing lui pen uh a hung khetbehsakta hi chih i theihchet mahmah uh a poimawh hi. Tualeh Singlamteh lampi a kipan a i pialmang louh na diing ua, Pasian thu in i hinkhuate uh a lamkaih ngeingei diing ahi. Sia-le-pha theihna in hilou, Bible in thu in i hinkhua uh a lamkaih ngeingei diing ahi hi.

Mi tampite, singlamteh puakna hinkhua panglou a, i hinkhua uh i zak tawntungna ziak uh ahihleh, i zuihpa uh Jesu Khrist i theichian taktak kei ua ahi ngei diing hi, chi in ka na ngaihtuah gige hi.

Suahlam mipilte’n zong, Jesu a pianlai in Kumpi Herod kiang a piang hi ngei diing in ngaihtuahna a nei uh hi; ama’un a leitung pilna uh zang a Jesu a zon ziak un, Jesu’n a sihlawh dektak hi.

Huachibang ahihlai in, Jesu a vamuhna uh ahihleh gankuang sung ah, a na hizaw daih mai hi.

Tulai a Khristian kichi mi tamte zong, Bible a i muh uh Suahlam Mipilte bang ngen kihi-simta mawk hi. Jesu i zondan uh leh i lam-etdante uh baan ah, Jesu neite dandan a i om hiauhuau dante un, Pasian nna sepna a dal zaw a, Jesu Khrist a diing a haksatna tuntu ahi khathei diing hi. Ki-ngaimkhiatna puan silhlou a thohkikna a Amah tawh thoukhawm diing in i ki-ngaihsun ua, Pasian hiil-hial ki-ngiamkhiatna singlamteh ah i ki-ngiamkhiat kim kei uh hi.

Eimah a ki-imdapna hinkhua nei kawmkawm in Pasian nnate lawhchingtak in a kisemkhia zou ngaikei diing hi.

Ahi’n tomkhat khit a, Vaan aksi in Jesu omna mun a kawkmuhtak in, gankuang simmawh huaitak a piang himahleh a gingmawh kei ua, Kumpi thak hung piang pen chibai a buk uh hi.

Nang zong, Khrist a ka lawm it aw, na lamlian zuih pen hung enthak kik in, lamdik ahihleh hihlouh pen kuamah hilh na ngaih diing ka gingta kei hi.

A ziak pen, nangmah ah, lamdik hung theisak diing in Kha Siangthou a om hi. Na lamlian zuih pen diklou deuh a na theih leh, Jesu’n singlamteh (Kraws) lampi bangchibang a a na zuih ahia chih ngaihtuah thak in aw! Nang leh kei khelhna pua a, asi-anai tawh Kalvari mual zuan a pai, Jesu Khrist in na khelhnate a puakna manphatdan theichian diing in na lungsim pia inla, kipanthak mai in. I Pu-le-pate’n zong, “Kua khatvei lamkhang tuankhial lou a om dia” a na chi sam uh ahi.

Bible a i muh uh Suahlam mipilte bang in, na sia-le-pha theihna ah ki-nga ken; “Na omdan diing Toupa tung ah nga inla, Amah muang in, tuachiin Ama’n a hung sem diing hi. (Laate 37:5)

✝️ GOSPEL MESSENGER✝️