What happened after Easter?

     

~ Pastor Thangdoulal Suantak

Sihna pan a i Toupa Jesu a thohkiik khit a sil tung bang ahia?

Empty tomb

Kum 2000 na liamsa lai in, i Toupa Jesu’n sihna tung ah gualzawhna a na ngah a, a kivuina haankhuuk sitna suangpi zong liik khiat in a om a, tuachiin Khrist ah, hinna thak piak in i om uh hi.

But what happened next? Hilezong a baan a sil tung bang ahia?

I Toupa Jesu, sihna tung a gualzou a, haan pan a, a thohkiik khit a, a sil bawl, eite etton diing a, a hung nusiat 5te tuni’n muchian inla, tuni a eite a diing a zillai poimawhtak a hihna leh, eite a diing a bang genna ahia chihte theikhia diing in, na lungsim pia-thak in, chi in i ki-ngen uh hi.

KHATNA: Jesu Kilaakna.

Jesu’n a thohkiik khit in leitung ah ni 40 sung hun a zangh hi. Hih ni 40 sung in, Ama’n a nungzuite ginlelna leh muanmawhnate a kipan in a khamuan a, tualeh a mailam hun diingte uh tawh kisai in direction a pia hi.

Vaantung a kipan in Jesu’n a itna a taangkoupih kei a, Ama’n a itna leitung ah a langsak hi. Huachibang in tuni in zong a bawllai hi. Amah tu dong in i kiang nai uah a om a, i kahnate uh ngaikhia diing a mansa a om in, i lungsim/ lungtang natnate uh damask diing in a om hi.

Pasian Houpih In > A kiang ah thuum in….>

NIHNA: Jesu’n Minamte a Puahthak Hi.

Emmau lampi a thanghou balkek na a kipan in leh a nungzuite tawh breakfast a nekkhawmnate tungtawn in, Jesu’n kipawlkhawmna diing in hun a pia chih i muthei uh hi.

Jesu’n a hung limsakna a hung lahna diing in, hun neilou a buailua in a omkei hi. A nungzuite bang a eite zong, i nna sepna munte uh, i khopite uh, i innkuante uh leh mite lak a Khrist tanchin gen diing a sapte i hi uh hi.

Jesu Khrist mahbang in na minamte mah na poimawhsak masa inla, ama’uhte puahthakna diing in nah un mantamtak zong piak diing kisiit ken…

THUMNA: Jesu’n Khasiate Hehnem hi.

Sihna pan a thou a, Jesu a hung paikiiktak in, a nungzuite’n a plan bawlsate a theihsiam louh ziak un a heh a suak kei a, hilezong ama’uhte dipkuatna leh mangbatna ah a kimuhpih zaw hi.

Jesu’n haan guak a mangbangtak a kap numei a khamuan a, Thomas ginlelna zong khamuan in, hinna leh khamuanna thute a gen hi.

Tuni dong in i Tanpa un, i theihsiam louhte uh leh dokna i neihte uah hehpihna a nei lailai hi. Ama’n i lung hihmawhnate leh i lunggimnate uh a hung limsak in a hung ngaihsak lailai hi.

LST ah a Khamuanna thute mukhia in… >

LINA: Jesu’n i sepkhial i bawlkhialnate ua pan in a hung tankhia hi.

I Toupa Jesu, singlamteh a khai ahih masang in, Peter in Jesu thein a pipi in thumvei a kilepsan hi. A khonung in Jesu’n Peter a lamthakna, Amah a it leh itlouh thu a thumvei Jesu’n Peter a dokna tungtawn in i muthei ua, tualeh Amite keem diing a a thuhilhnate i thei uh hi.

Ginna ah Peter a na puukkha lehzong, a puukna in Khrist a a mi hihna a beisak kei hi.

Hichibang in eite’n zong, i haat louhna uah Pasian haatna bukimtak in a kilang theizaw chih muang ni…

NGANA: Jesu’n mite thuhilh in a haatsak hi.

Jesu’n vaan a a kah kuan laitak in, a nungzuite kiang ah, “Pai unla, nam zousiah lak ah nungzuite vabawl un,” a chi hi.

Hih thuhilhna tthei a, eite zong, i hinkhua ua tangthupha genna diing hunlem zong tawntung diingte i hi uh hi, chih mangngilh lou diing in i ki-ngen zaw uh hi.

Mite kiang a Pasian thu gen a, Pasian a theihna diing ua panlakna pen, eite mawhpuakna ahi.

Na hinkhua a na kituah khakpih mite kiang ah Pasian thu gen in.

Easter ni a beita khamah diing a, hilezong eite a diing in kumtawn in a hingzing hi.

Jesu Khrist sihna thohna ziak in eite’n Pasian hehpihna, khotuahna, leh ompihnate, ni dang leh hun dang tawh kibangloutak in i hamphatpih thei uh hi, chih theizing kawm a, Khrist gualzawhna a gualzoute hi diing in i Toupa Pasian in a Thupha hung pechiatta hen…