TULAI KHAWVEL LEH ZAKAI

~ Pastor Thangdoulal Suantak

 “Tuachiin Zakai a ding a, Toupa kiang ah, “Toupa, en in! ka dangka kimkhat mi gentheite kiang ah ka pia diing a, tualeh mi neihsa khat peuh diklou tak a ka lak a om leh alehli in ka din diing,” achi hi. Chih thu Lk. 19:8 na a i muhna uh pansiik in i nei diing uh hi.

I Bible uah mi tuamtuamte tanchin na kigelh a, huateng lak ah Zakai tanchin pen, mi zousiah theih phial ahih ngei diing ka gingta a, hitalezong a tanchin thuukzaw a zonkhiat diing dan i thei tuankei uh hi.

Amah ahihleh Juda mi ahi a, pianken a mi taangpite saang a neuzaw leh mi din saangloutak ahi. Amin omzia or khiatna ahihleh, Fel/ Siangthou/ Genbaanglou chihte hi dan in siamna leh theihna saang neite’n a gen uh hi. Tualeh Amin khiatna ahoih mahbang in a amah zong a mi hoih mahmah hi, chi  a gen minthang in zong a om hi. Tualeh Amah pen Jeriko khua a teeng leh Jeriko bialsung a siah dongte sappa, tax collector officer ahi.

Zakai in Jesu Khrist tanchin a na zaa ngaita a, hilezong mimaltak a a muh nailouh ziak in muh sam diing a sawm hi. Hichih hunlai in Jesu leh a nungzuite Jeriko khua kan a, a hung pai diing uh thuthang a na zaa kha hi. Tualeh ama’n mipi tamtakte kawmkal a, a muh theih diing a gintatlouh ziak leh muthei diing a a kitheih louh ziak in theipi kung ah kah in a na tuang hi. Ama mi hihna diktak kitheichiantak kawm a Jesu Khrist muh sam diing a tupna ah, a suanhuai mahmah hi.

Tuachi a Zakai omna mun a Jesu Khrist a hung tuntak in, “Zakai,kintak in hung kum in, tu ni a na inn a hung tung diing ka hi,” a chi hi. Tuachiin a singkung tuanna theipi kung a kipan in, Zakai zong, kintak in a kumsuk a, tuachiin Jesu leh a nungzuite Zakai inn ah a zintung uh hi. Officer khat inn a zintung na na na chu, neek leh dawn a lim in a nuam mahmah kha diing in a gintaat huai hi.

Hichibang silte mipite’n a muhtak un, “Mi khialte inn a zintung diing in a pai tave!” chi in a na phunsan uh hileh kawm hi. Ama’un a na lam-etna dan uh ahihleh Siampu lalte leh Pasian nna semtute inn lak a, a zintun diing uh dan a, a na lam-etlai un, mipite khasana (lei-man) khawm a, nekguukna a hausa a, a ngaihsut uh Zakai inn a a va tun pen lamdang a sa ua, theihsiam haksa a sa uh hi. Hilezong Jesu’n “Midiktatte sam diing a hung pai ka hikei a, mikhialte sam a kisiksak diing a hung pai ka hizaw hi,” a chihbang in, Zakai kiang a a zintunna tungtawn in, hih leitung a a hung paina ziakte, mi khial leh vakvaite a diing a hung pai a hihnate a kilangsak a, tualeh hih thu mah zong, Zakai kiang a a houlimna ahih diing a gintaat huai hi.

Tuachiin Zakai a ding a, Toupa kiang ah, “Toupa, en in! ka dangka kimkhat mi gentheite kiang ah ka pia diing a, tualeh mi neihsa khat peuh diklou tak a ka lak a om leh alehli in ka din diing,” chi in Jesu leh a nungzuite kiang ah thu a chiam ngam hi; hichibang thuchiam pen lamdang leh chi zaat huai khop ahi a, a thupi mahmah hi.

Tuachiang in Jesu’n a kiang ah, “Tuni in hih inn ah hutdamna a tungta hi, amah zong Abraham tapa ahihziak in,” a chita a, a thupi mahmah mai hi. Hibang a a kihoulim lai uh leh, hih thute a kigenlai un, Jesu nungzuite’n a khutte uh a na beeng diing bang un, a gintaak huai phialphial hi.

Awle, tuni a Zakai tanchin tungtawn a i gen nuam pen uh ahihleh, tullai khovel ah, neekguukna (corruption) a kithang mahmah mai a, neekguuk na utkei leh state solkal nna na sep louh diing ahi, chi a kigenna zong om hileh kilawm hi. Hih Neekguukna pen, bangchi beisak diing e? chiin in thu i na kikum kha ngai thamta diing un a gintaak huai hi; hilezong a bei taktak theikei hi.

India mi Anna Hazare in, India Parliament liing khop zen in, an ngawl in, corruption douna diing daan-le-dunte zom diing in a phuut a, tualeh India gam a mipi tamtakte’n zong lemsakpih in amah a zom uh hi. Hitalezong a ki-hahgen dan leh, a kipuaknat dan bang in, a phatuam daan in a kilang thei taktak kei hi. Tualeh sum-le-paai a gin-omna taaksapnate ziak in, gam tampi a lamkaite zong paikhiat a na hi ngaita uh hi; Hichibang in state solkal tuamtuamte ah zong, Chief Ministerte leh Minister dangte zong, neekguukna ziak a suspend tampi i nei maithei diing uh hi.

I gentaaksa mahbang un, Zakai pen siah dongte sappa hitalezong, mi nuainung zaw deuhte siah a ne guu taktak na diam? A na neguu ahihtaak lezong a lehli a din kiik diing a, a ki-huamna pen etton taak mahmah hi. I Khristian gam a Solkal nna semtute’n zong, diklou tak a na neguu kha i hihtaak ua ahihleh, Zakai bang a a lehli a dit diing i ngam taktak na diam? Chih ngaihsut tham chingtak hi in ka thei a, tualeh ei pawl a pen, Jesu nei kawmkawm a neguu zong ki-om a deh aw, chih ngaihsutna bang a tam mahmah hi. Hih Ditna in a gen ut pipen ahihleh, tawpsanna ahi. Hichibang ahihziak in, ei a hiloute khoih louh ngamna, haangsanna nei a, i Toupa Jesu Khrist in, “Tuni in hih inn ah, hutdamna a tungta hi,” a chih pen, i chihpih theih sam na diing ua Khrist a, kibulpat thak thei diing in i Toupa Jesu Khrist hehpihna thupha in hung ompih chiatta hen….