MIT-TUI

~ Pastor Thangdoulal Suantak

Mit in tui a nei a, hua tui pen ziak hoihtak nei in a hung luangkhia zeel hi.

"Hih Mit tui pen, muhtheih a, i tu leh dinmun hinkhua uh hung hilhchiantu zong ahihlai in, mit tui in a tapnom hinkhua pen, hinkhua xawngkhal leh bahsam ahi, chih zong a kichiansak hi. "Mihing haatna pen a kisia a, a kitamzaak theilou khop diing bang in i ngaihsun zeel uh hi.  Tuaziak in hih tungtaang ah, Toupa ngaihdan i poimawhna uh a kilang diak hi

 

I haat-lai un mi kuamah poimawhna nei dan in i kitheikei uh hi. Tua ahihleh “Haatna dikloutak ahi hi.” Haatna neilou mite mah in mi dangte haanthawn a thapiak dan a na theisiam zeel uh hi.

 

Mite saang a pai masakna pen haat chikhat hi a chiamtehna ahi tuamkei a, mi dangte tawh kikim leh a kibang a paidan siamna zong haatna chi khat ahi, a chih theih tuankei hi.

 

Mahni saang a dinmun ngiamzawte tawh kalsuankhawm theihna ahihleh haatnate lak ah haatna hoihtak ahi kha thei diing hi.

 

 Mihing in kinepna i hauh chiang, “I chitlahte'n a hung kimvelh diing” chihna a suak thei hi.

 

Pasian tung a kingakna ahihleh “Amah gin-omna ziak in, bittak in i om diing uh” chihna a suak hi.

 

Toupa kiang a mi khialte i zaleen ua, i puakgikte uh Aman a hung dawn zangkhai zaw zeel hi.

 

 Khovel ahihleh thil kikhelna leh kilamdanna mun, phaizaang ahi.

"Hun chiam sung a om i hi uh hi,” chih theisiam lehang, mi kuamah muhsit hiam leh simmawhna lam hiam ah i om tuamkei diing uh hi.

 

"Silte a kikheel lamdangtak in a hung makaih chiat ziak in, i mi muhsit leh ngaihsaan louhte dinmun ah i omthei uh” chih thu pen a tak a vatot sese louh in theisiam mai lehang a chih huai hi.

 Aziak leh asan diing zong thei butuak lou a, “Toupa aw, hung panpih in” chia dinmun kichianlou leh mangnang kawm a i kikouna un, hong ittu Toupa'n a kitheihmoh-bawl ngaikei hi.