THEIHSIAMNA

~ Pastor Thangdoulal Suantak

Theihsiamna neihtheihna diing in theih masak a ngai a, tualeh i theihna ua kipan a theihsiamna i

 zil-touh uh a ngai hi. Mi zousiah in theihna khat chiat ki-nei mahleh, i theihna uh bangchibang theihna e, chih kidok theih diing bang a, a kilat hun a tam mahmah hi. Eimite lak a theihna i neihte uh zaakna (hearing) a hung kipan ahi taang a, laibu (books) tuamtuamte leh laigelh tuamtuamte a kipan a, zilkhiat theihna saang in, zaakna (hearing) tungtawn a theihna a i hauhsak luatziak un, theihna diktak nei saang in theihna diklou nei i tamzaw uh hi, kichi leh ki-genkhial lou diing hi.

I mi ngaihsaan louhte na-ngawn zong a tanchin uh diktak, hoihtak a i theih chian taktak chiang in, i ngaina zou uh hilou maw…? Etsakna diing in, bawlungpek siam Ronaldo ngainatute lak ah, a tamzaw in, a tanchin tungtawn in a ngaina ua, huachibang mite lak ah, kei mahmah zong ka hi a, nang zong na hikha thei hi. Hichibang ahihziak in, i theihna chiang uh leh i theihna tan ua kipan in theihsiamna a om behlai hi, chih thei in, zil masa lehang a deihhuai hi. Eima mimal theihna tan bek gingta a mi dang kua hiam tawh kilemlou, kituaklou ban ah, kua hiam ngaihnat theihlouh chihte i neihlouh uh ahoih mahmah diing hi.

Mi kua hiam a kipuuk leh, a kham hi in teh, i chi ua, eimah i kipuuk hial chiang in zaw, a naal lua a ahi, i chi ut mahmah uh hi. Thuakzou kei na lawmlawm e, i chihna munte uah zong, ‘A naa mahmah hi’ chi in a thu i kheek taangpi uh hi. Mi a tate uh giitlouh mahmah leh sual mahmah daan a i ngaihsut lai un, ei tate lamdik lou a na lamkaih na kihi khinkhian thei zeel mawk hi. I tuh bangbang lakna khovel ah, mi vaangsia i kihisak zeel mawk ua, “Hung it diing, hung khawtuah diing nei keng e,” i chi zeel mawk ua, tualah bang khaichi tuh i ua chih i ngaihsun phabankei zeel mawk uh hi.

Hih theihsiamna taktak neilou a, a theih pen a i om lenlanna mahmah ahi, eimah leh eimah i ki-it bang a mi dangte i it theihlouhna uh!

MARK 12:31, “NANGMAH NA KI-IT BANG IN NA INNVENGTE NA IT DIING HI”