TAPA IN A PIANNA A PA LIM-LE-MEEL A PUAK DIING AHI

~ Pastor Thangdoulal Suantak

Tapa in a Pa lim-le-meel a puak diing pen Pa deihna leh lunggulhna ahi, chih lungsim a nei kawm in, Gen. 1:26-27 na a na kigelh, “Tuachiin Pasian in, “I kibakpih, eima lim-le-meel pua mihing bawl ni; ama'un, tuipi sung a ngasate, gantate, huihkhua a vasate, leitung a gamsa namkimte leh, a bokvaak ganta namkimte tung ah thu neihna nei uh hen,” a chi hi. 27 Tuachiin Pasian in ama lim-le-meel pua in mihing a bawl a, Pasian meel pua a ama'uhte bawl in; pasal leh numei in a bawl hi,” chih thu tungtawn in i na ngaihtuah khawm diing uh hi.

Tapa in a Pa a sut diing ahi, chih pen mi taangpite ngaihdan ahih mahbang in eite lak ah zong hichibang ngaihdan nei mi tampi i om diing uh ka gingta hi. Hibang ahihziak in, Tapa khat in a Pa a sutkei a ahihleh, a Pa a diing in lungkimna taktak omthei lou a, tualeh Amah tawh kisun lou tapa neipa in a Tapa pen a innsung pan a nawhkhiat diing zong ki-huam zou mahmah hileh kilawm hi.

Ni danglai in a, chiammuihna dan a na kigen thu, hibang a om hi, “Ni khat pasal khat in tapa a nei a, tuachiin kipaktak in a om hi. Hichibang ahihlai in, a innsakpa uh zong nau-ngek kipahpihna nei diing in a hung hawhsak a, tuachiin ama’n, ‘Eh, na tapa hoihna lawmlawm e, inn khangpa a sun hoih mahmah ngel ve,’ a chi hi. Hichibang mah in, a phaitompa zong nau en a, a hung pailai in, ‘Nau in inn khangpa sun hoih mahmah e,’ na chi khinta ahihman in hih tapa neipa a lung a kimthei kei a, a zi a ging-mawh hi,” a kichi hi. Hichibang mah in, Tapa in a Pa a sutkei leh, a Pa a lungkim theikei hi.

LST ah zong, Mihingte pen Pasian lim-le-meel suun a siam ahi chih kichiantak in i mu uh hi. Hih Lim-le-meel kichi pen, a taktak pan a ki-copy or kiteisawn chihna ahi a, tualeh a taktak omlou in lim-le-meel (image) a omtheikei chih i theih chiatsa uh ahi. Hichibang in Tapa zong a Pa lim-le-meel suun diing a teisawn or copy ahi i chi nuam uh hi.

Tualeh, Kisutna or kibatna (Likeness) chih tawh kisai a i gen nuam pen uh ahihleh, English in, ‘Pattern in the sense of specification from which a thing is made,’ chi in a na gen hi. Hih pen, sil khat kibawl khiatna diing a sil na omsa khat omdan kichiantak a zuihna or ettonna ahi a, tuachiang in, hih pen a original blueprint pan a etton ahihkeileh teisawn chihna zong ahi hi. Hichibang ahihlai in eite’n ei hung siampa i Toupa Pasian uh sutna taktak, i niteng hinkhuate uah i neithei taktak kei ua, a dahhuaipi a suak hi. Mihingte pen, Pasian lim-le-meel pua diing a siam ahih hang in, khelhna ziak in Satan lim-le-meel pua, leitung ah a ki-tamzaw phial deh-aw chihbang ngaihsut kham ching mahmah hi. Hichibang ahihlai in Lamka Khopi a teeng zo suante’n Pasian lim-le-meel i pua thei taktak na uh hiam? Chih pen dotna lianpi a suak hi.

Tapa in Pa a sutlouhna ziak ahihkeileh Mihing, Pasian lim-le-meel pua diing a Pasian siamte’n a siampa uh lim-le-meel a puak theih louhna ziak uh ahihleh, LST a Solomon thugen, “En in, Pasian in mihing dikna bukimtak nei in a bawl chih ka mukhia a, hilezong ama'un bawlthuh tampi a zongkhia uh hi,” chi a Eklesiati 7:29 na a, a na genbang in, bawlthuh tampi i mukhia ua, tuate a taktak bang a ngaihsutna nei in, i pu uh Adam mahbang in, i Pa uh nusiat utna in i hinkhua uh lamkaih ahi, chi lehang i khial kholkei diing uh hi. Hitalezong, i Pa uh itna in eite a hung huamzou lailai hi. I Pa uh itna huang ah lut thak sawm chiatta ni…

Tapa in Pa a sut theihlouhna ziak a Buainate sukvenna Jesu Khrist ahi. LST Eph. 2:12-13 ah, Huachihlai a Khrist neilou a, Israel khua leh tui tawh kimatlou a, leitung a kinepna bei leh Pasian neilou in na om ua, thuchiam thukhunte lak a mikhual a na om na hih uh thei tawntung un. Hinanleh tu in pen Khrist Jesu ah, nou ni danglai a gamlapi a omte, Khrist sisan ziak in suknai in na omta uh hi,” chih ahi. Hichibang ahihziak in Jesu Khrist beelthak mahmah ni. Jesu’n i Pa uh tawh hung kilemsakta hi. Ama nna septe muang in, tuni in ginna tawh i Toupa kiang lam i zuanthak uh aw! Eph. 4:23-24 na a, “Na lungsim kha uah athak in hung om un, mihing thak, diktatna leh siangthouna Pasian bang a siam pen silh un,” a chihbang a, A lim-le-meel pua diing a, eite hung siampa lim-le-meel i puaktheihna diing uh lampi omsun Jesu Khrist ahihziak in, tuni in Amah Jesu kiang i zuan thak mahmah diing uh hi. Hih thute tungtawn in i Toupa Pasian in A Thuphate hung musakta hen… Amen