PASIAN IN KIDOUNA BANGCHIBANG IN A EN A?

~ Pastor Thangdoulal Suantak

I gamsung ua kidouna a om chiillai in, bangchi-chi hiam in hong vei mai in teh, chih ngaihdan ka na nei a, ahi’n venlam saang in a khawkzaw sem a, tuni dong in gaal neite leh gaaldou mite i hita uh hi.

Hichibang a kidouna phual a ding i hihtaak ziak un, PASIAN IN KIDOUNA BANGCHIBANG IN A EN MAH DEH-AW! Chih ngaihtuahna in a hong zou mahmah hi.

Christian hi sam a, Kidouna leh Pasian baan ah, Christianna bangchibang ahia? Chih theichian lou a, mite hihdan/ bawldan leh paidan ahihleh chi a, mi dandan a om sam Christian khat na hih leh, tuni a i kikup diing uh thute nang diing in a poimawh diak hi.

 

PASIAN IN KIDOUNA BANGCHIBANG IN A EN A??

Taanglai Hunte ah, Faro leh a gaalkaapte Tuipi san in a valhmang hi.

Hichih hunlai in mite keengnuai-suangphah a neih in a na om uh hi. Hichibang ahihziak in mite lungsung ah zaleenna ngaihna nasatak a om a, tuachiin Pasian kiang ah zaleenna ngen in thuumna nei uh hi. Hilezong a thu-ngetnate uh dawn in a om paikei uh hi. Amauhte ahihleh taanglai a Pasian mi chi a kithei, Israel nite ahi uh hi. Tualeh ama’uhte opbettute ahih uh leh, Ezipt mihatte ahi uh hi chih LST Ex. 1:13-14-na ah kichiantak in a kimu-thei hi. Tualeh Israel mite’n Egipt mite khut a kipan a, a suahtaat ua, a zaleenna diing un kum tampi, Pasian a ngak uh ua, tuachiin a tawp ah Pasian a kipat hun a tungta chih Ex. 3: 7-10 tan ah a kimu-thei hi. Tualeh Pasian mahmah in Egipt mite a douna thu leh a gamsung ua hii tuamtuam a leensakna thute baan ah Tuipi san a Egipt leengpa a gaalkaapte a thahgamna thute Bible in kichiantak in a gen hi. Tuachiin Pasian in Laate 136:15na leh Ex. 15:3-4nate tungtawn in Amite a diing a gaaldoumi haattak a hihna a kilangsak hi.

Pasian mahmah in Egipt mite a douna tungtawn in kidouna Pasian in a doudal kei chih a kilangsak a, tualeh a mi Israelte kiang ah kidouna a phalsak hun zong a om zeel hi. Etsakna diing in— Hit mite, Amor mite, Kanaan mite, Periz mite, Hiv mite, leh Jebus mite dou a, thatbei kilkel diing in Pasian in thu a pia hi, chih Deuteronomy 9:5; 20:17-18 nate ah muhtheih in a om hi. Kumpi David zong Filistia mite dou diing a thupiak ahi a, tualeh kidouna a, a gualzawhna diing a ngaihtuahna hoih pia zong Pasian mah ahi, chih 2 Samuel 5:17-25 ah muhtheih in a om hi.

Hih Bible a kigelh thute’n giitlouhna leh opbehna in Israel mite dinmun lauh-huai a, a omsak hun chiang in, Pasian in a mite kembitna diing leh biakna diktak, hoihtak a zuih a hihtheihna diing in, kidouna a om diing a phal hi, chih a kilangsak hi. Hichibang ahihziak in tutung i gaaldouna uah, kisuanglah kawmkawm a gaaldoute hi nawnkei ni aw…. Hilezong hichibang a Pasian lemsak kidouna tawh kisai a theih diing silt hum a om a, huate ahihleh;

Khatna ah:

Kidouna a pang diingte ahihleh Pasian bek in a guat or a seh ahi.

LST 2 Chronicles 20:17; 32:7, 8 nate i sim leh, Pasian in ami Israelte kiang ah, “Kidouna pen noute dou a ngaikei hi” chi in a hilh hi. Bangziak ahi diing in na gingta a le?? Aziak maw, Amah Pasian mahmah in ama’uhte a diing a, a dou diing ziak ahi. I na gentaaksa uh mahbang in, Pasian in hichibang in amite kiang ah a gen mun mahmah hi. Tualeh Deuteronomy 7:1, 2; Josua 10:40 nate ah, Pasian in ami Israelte pen, a gamchiamna la diing leh kembit diing a, gaaldou diing in a phal hi, chih mangngilh kei ni.

Nihna ah:

Hichibang kidouna a tun hun diing pen, Pasian bek in a guat or a seh ahi. Pasian tate’n a kiim leh kiang ua giloutak a ki-opbehna leh haksatna a thuakte uh a douna diing ua, Pasian hun guat pen dawhzoutak a, a ngak uh a ngai hi. Hih pen eite lak mahmah ah a kichian in ka ngaihsun hi. Aziak, Pasian in Meitei gaal i dou hun diing uh diktak a hong guatsak a doute hikei lehang, tu dong gaaldou in a pang zoukei maithei diing uh hi; or meiteite guatdan bang a kidou hilehang tuni in meiteite khut ah i si khinta maithei diing uh hi. Pasian phalna lou a, Israelte gaal a dou chiang un siatna in a buak khum zeel hi, chih LST ah kichiantak in i muthei uh hi. Tualeh theih diing a poimawh khat chu, Pasian in Kanaan mite dou lezong, numei kizuak Rahab leh a innkuante Jeriko khopi puuksia kawmkal a dam a, a om mahbang un, meelmate lak ah zong Pasian leh a mite zahtaakte dam in a suakta thei uh, chih ahi.

Thumna ah:

Mi Giloute zong huam in, mihingte sihna ah Pasian a kipaak kei hi.

LST Laate 36:9 ah, Pasian ahihleh hinna tuikhuuk, mihingte hinna siampa ahi, a chi hi. Hichibang ahihziak in Pasian in mihingte taksa hi in kha ah hitaleh, a sih diing uh a deihkei hi, deih henla hileh, hinna leh sihna a siamkhawm diing ka gingta hi. Tuni a i theih uh sihna pen khelhna ziak a om ahi a, khelhna a om masang hunlai in sihna a na omlou hi, chih theisiam ni. Laate mah, 37: 12, 14 na in, “Mi gilou in mi diktatte dou diing daan bekbek a ngaihtuah a, a haa uh a gawi khum khum uh hi. Gentheite leh tasamte puuksak diing leh, mi diktatte that gam diing in, mi giloute'n a temsau uh a dok ua, a thal uh a luai uh hi” chih i mu ua, hichibang mi giloute tawpsakna diing leh hichibang giitlouhnate dou diing pen, Pasian in a phal hi. Hichibang ahihziak a Israel mite’n Pasian tawh pangkhawm a a gaalte uh a doulai un, Pasian in a gaalte uh a hehpih veve hi chi LST Laate 86:15-na tungtawn in i muthei uh hi. Hichibang ahihziak in, Deut. 20: 10-13 ah, “Khopi sim diing a na naih chiang un, lemna thu gen phot un. Na lemna thugen uh a saan ua, na khut ua a hung kipiak uh leh, tua khopi sung a om zousiah in na nna uh a sep teitei diing uh ahi. Na khut ua a hung kipiak utkei ua, a hung dou uh leh, tuachiang in tua khopi na sim diing uh hi; Toupa na Pasian un tua khopi na khut ua a hung piak chiang in, pasal zousiah temsau tawh na that diing uh hi,” a na chi hi.

Hichibang ahihziak in mi gilou sihna ah Pasian a kipaak kei chih a kichian hi, Hilezong mi gilou in a omdan a tawpsan, Pasian lam a naih diing pen Pasian kipaakna ahi chih LST Ezekiela 33:11, 14-16.b nate ah i muthei uh hi.

A tawpna ah:

Pasian in kidouna a deih ahikei a, sisan suahna zong a deihlam ahikei hi. Hilezong kidouna a om diing a phalna ziak diktak hi a i theih uh, leh Bible tungtawn a i muhtheih uh ahihleh, gitloutak a gamtatnate, kimuhsitnate, kihuatnate leh giitlouhna chi tuamtuam beisakna diing ahi. Tualeh leitung ah tatsiatnate, kihuatnate, kimuhsitnate leh giitlouhna tuamtuamte a bei chiang in, gam leh leitang kituh a kidouna zong a beita diing hi.

 

(Pasian in damna tawh a hong ompih zeel leh, “Bang ziak a Pasian mite gaaldou a kuan diing uh e?” chih thu i kikup sawm diing uh hi.

A kimuh kiik dong damni, Mangpha