NUMEITE DIING A KHEEMNA THUAKHAK 3TE

 

~ Pastor Thangdoulal Suantak

INTRODUCTION

Gintatlouhpi a noute lak a hong dingsak a, kivehtuahna neithei diing a hong makaih Toupa i Pasian uh thupina ka pia hi. Tualeh tuni kivehtuahna a hong kikhawm saptuamte Jesu min in chibai, chibai, chibai…

Christian numei hihna ah a mawhpuakna tampi i nei chiat diing un ka gingta a, Saptuam tawh kisai hi henla, innsung tawh kisai hitaleh, mite hong muhna leh theihdan saang a lianzaw, i zohlouh diing khop mawhpuakna nei zong a ki-om maithei diing in ka gingta hi. Kei diakdiak bang a mawhpuakna zouloute lak ah a khatna ka hi maithei diing hi. Zoh sawm a naktak a pan ka lak lai in haksatna tuamtuamte tuakkha in ka kithei a, huate pen a taktak a chih in haksatna lam saang in ze-etna ahihke’h kheemna hizaw in ka thei a, noute’n zong na na tuak sam diing uh ka gintat ziak in, numeite a diing a, a thuakhak kheemna chi 5te, hih a nuai a bang in i kikumkhawm diing uh hi.

COMPARISON/ TEHKAKNA OR BUKTUAHNA

Galatia 6:4= Hinanleh mi zousiah in ama nasep ki-etchianzaw hen, tuachiin mi dang tung hilou in a mahmah tung ah a kipak diing hi.

            LST in eimah leh eimah ki-en chian diing hong chi napi ei Numeite pen, midangte tawh kitehkak in i kibuktuah nak uh hi.

            Etsakna:

1.     I silh-le-teen leh mi dangte silh-le-teen tehkak or buktuah.

2.     I pasal leh mi dangte buktuah in mi zong ahichi ua tun ahichita ve uale, nang zong hua chive……

3.     I inpinu (pasal nute) leh mi dangte tehkak or buktuah in mi nu na hihleh na hichih sam di, na hua chih louh di, na mou na it di chihte a tuamtuam ah kibuktuah hi.

4.     I pasal sanggamte pen mi dangte unau (sanggamte) tawh kibanglou deuh sese uh….

5.     I Saptuam paidan leh mi dangte a kibanglou sese…

I leitung mit tawh ki-et in hih kibuktuahna a bei ngaikei diing, hitalezong ei Christian numeite pen, tunglam en a, mi dangte va en en lou diing in Pasian in hong deih hi (Kolosa 3:2= Tunglam a sil omte ah na lungsim uh nga unla, leitung a sil omte ah ngakei un).

 

THANGSIATNA/ HAZATNA

Paunak 14:30= Lungtang hoih sa a dia hinna ahi; himahleh hazatna guhte muatna ahi (Paite Version).

Hazatnate a kipan a i lungtang/ lungsim uh i kepbit diing uh hi napi’n thil hamsa mahmah khat suak a, i kepbit zohlouh chiang un ei mahmah a diing in guh-le-taang muatna suak hi. Hazatna tawh a omkhawm dente pen lungmuanna, khamuanna, lemna chihte tawh omkhawm ngailou uh hi. Tualeh hih HAZATNA in i neihlouhte bak en tawntung ahihman in hih pen Numeite ze-etna/ kheemna diing a SATAN vanhzak hoih pen hileh kilawm phial hi. Tuaziak in hih Hazatna/ Thangsiatna omna mun ah DEIHSAKNA i koihtheih diam? Chih pen challenging mahmah hi.

 

CONTROL/ THUNUAI A KOIHNA

“Na lungtang zousiah tawh Toupa muang inla, nangma theihna bek ah ki-nga ken. Na lampi zousiah ah amah thei gige in, hileh ama'n na lampite a hung bawl tangsak diing hi. Nang kimuh daan bek tawh kipilsak kenla; Toupa laau in, gilou taaisanzaw in.” (Pau. 3:5-7)

Numeite’n i thauklah taangpi kheemna ahih leh sil zousiah ei thunuai a koih utna kheemna ahi. Hih kheemna a kipatna pen lungkhamna/ lunghihmawhna ahi. Na leh sil chinteng ah i lungnuamkei ua, tuachiin i thunuai ah koih i sawm uh hi.

Etsakna:

1.     I pasal i lunghihmawhpih ua or awlmawh ua, hua awlmawhna in i lungsim uh zou ahihman in i pasalte uh i thunuai ua koih diing tupna i nei uh hi. Aziak pen ei chih bangbang a a om chiang un i lunghihmawhna uh omlou/ bei diing in i ngaihsun uh hi.

2.      I innsung awlmawhna uh lian ahihman in, i innsung uh pai diingdan leh om diingdante tengteng i thunuai ah koih i sawm ua, naktak in i pang uh hi.

3.     Awlmawhna leh lunghihmawhna in eite thuneih utna ah a hong khangsang a, tualeh ei theihna dan ah, hih a hoih penpen ahihziak in, ei tawh kisai kha tengteng i thunuai uah koih i sawm uh hi. Ahihhang hih pen sil diklou pumlum ahi a, kheemna theihhak leh thuakhak mahmah khat ahi.

Tuni’n i thuneih utna ua kipan in i ki-ngiamkhiat theita diam? Thuneihnate mi dangte pia in Submissive attitude i neitheita di uam?  Toupa muang a, ei theihna a ki-ngalou numei/ nute i hitheita diam? “Vaan leh lei saandan a kikhiat bang in, ka lampite leh ka ngaihtuahnate, na lampite leh na ngaihtuahnate saang in a saangzaw hi.” (Isaiah 55:8-9)

THUKHITNA

Tuni in, Pasian min in kitehkakna or buktuahnate tawpsan in, Hazatna neilou numei/ nu khat hi a, bangkim control sawmlou a, bangkim a ki-ngiamkhiat nute/ numeite i hihna diing ua pan la thak diing in Jesu min in i kichial uh hi.

Toupa’n a thute, i khantouhna uh ahihna diing in thupha hong piaksakta hen…. Amen!