NA KISAKHOLH SAM NI AW

~Pastor Thangdoulal Suantak

Rom 6:9-11

Hinanleh Pasian kha nou kiang a a om taktak a ahihleh, taksa a om na hikei ua, kha a om na hizaw uh hi. Hinanleh mi kuapeuh Khrist kha neilou pen amah a ahikei hi.

Tualeh Khrist nou a a om leh pumpi pen khialhna ziak in asi ahi, hinanleh kha pen diktatna ziak in a hing ahi.

Hinanleh misi lak a Jesu kaithoupa kha noumah a a om leh misi lak a kipan a Khrist kaithoupa'n noumah a om kha ziak in na pumpi uh sitheite zong a hingsak diing hi.

Pasian thu mah in, “Tuaziak in, sila hi nawnlou diing a Khrist in a hung zaleensakna ah dingkip unla, sila hakkol ah awk nawn kei un” (Gal. 5:1) a na chi hi. Khelhna ziak a sihna pen, Khrist sihna tungtawn in suahzaleen in i na omta ua, tualeh a sihna pan a Ama thohkikna a siamtansak in zong i om uh hi.

Hilezong, Krist nna sep taksanglou leh gingtaloute ahihleh khelhna ah a omlai ua, mi khial leh siamlouhtansak ahi uh hi.

Khelna tawpkhawk na bawltate leh a bawl lellelte hita lehang zong, mi zousiah sihna diing mun ah i Toupa Jesu a hung sita a, hua Ama sihna leh a thohkikna koppih a thou a, hinkhua thak nei diing in Aman (i kitheih louh hang) ei diing a poimawh leh sil thupitak ahong guatsak hi.

 Tuaziak in, eite zong khelhna lam ah si in i kikoih diing ua, Krist Jesu a hing leh, i tu dinmun leh hihna, hinkhuate manphatak a zangh diing in i omzaw diing uh hi.

Hih pen Pasian in eite a hung koihna leh i omna diing ua a hung guatsak ahi, chih pomsiam ni.

Hichibang a Jesu Khrist ginna ziak a na omtate’n khelhnate a paisan thei zeelzaw uh hi.

Pasian hehpihna i tan uh manphat-dan leh a mantamdan mu a theichian theilou diing in Kheemtu in eite a hung kheem zeel hi. Tuachi a, i theihchian louhte leh i muh chianlouhte i pomsiamlouh lamtak uh ahihna Kheemtu a diing a vanzak manpha ahihna diing in.

Hichibang ahihziak in, theichian diing leh mu chian diing in Toupa lam zuanta ni hang in, Amah ah ki-tuhlut lehang, Amah Jesu Khrist kiphuanna theilou in i omtheikei diing ua, tua pen eite a diing a hoihna mah ahi diing hi; Aziak pen eite i hih uhleh, Khrist a teelte i na hi uh hi.

I THU theihna uh a kichinlouh ziak in, eite’n i Tou Jesu pen, a tuam in i sisak zeel uh hi.

Ama sihna eite sihna ahihdante theilou in, Khelhnate pua a Singlamteh tung a thah a ompa, Pasian tapa sihna ziak zong hoihtak a theisiamlou in, i hinkhua ih eima hoihsakna bangbang in i kizak vamel ua, a poi mahmah hi. Tuachiin Rom 10:17 a i muh uh, “Ginna pen zaakna ziak in a hung om a, tualeh zaakna pen Pasian thu ziak in a hung om hi,” chih thu kihilh thak ngai bang in a kilang zeel a, a poi, chihlouh gen diing a tamkei hi. Mihingte pen i ginna uh tawh i leitung hinkhua uh zangte i hihman un, tutung in Khrist nna septe, eite a diing a, a sil bawlte ginna tawh i lei hinkhua uh zangh theita lehang a deih huai mahmah hi.

Rom. 4:5, ah, “..Nna semlou a Pasian ngaihsak loute siam tangsakpa gingtazaw/ taksang-zaw mi ginna pen diktatna a sim ahi,” chih ahi.

Hilezong, khetvei-vei, Jesu sisan in i khelhnate uh a sawpsiang theihlouh mahbang in, “Cross thu pen mangthangte a diing in motna/ haina ahi a,” a na chihbang in, eite zong i na omkha zeel uh hi. Khrist sisan in i khelhnate ua kipan in a hung silsiang a, siansuah i hita uh, chih thei nazenpi, a genbang siam mahmah napi a, a taktak a zui theilou pawl bang, ki-omthei mawk hileh kilawm bangtak a a kilatna tampi a om zeel a, a dahhuai mahmah hi. Khrist vaak, vaak-pih theilou Khristian tampi ki-om abang hi.

Kha a si i hihna uh theitheilou a, silou a ki-ngaihsun a hinkhua zang, taksa leh sa-dan a sihna chihlouh sihna dang theiphalou, Khristian tampi omta hilehang kilawm simsimta hi. Kha a a sihna theitheilou mi a diing in, Kha a siamtan theih na diing a omkei a, ginna zong a neithei kei, aziak Pasian ahihleh KHA ahi.

Sa-dan a sil thawnpiak (gift) kipahdan i theichiat sam kha-diing uh hi. Kha ah zong sil thawnpiak i nei ua, hua pen lungdamtak a, i pom mai diing uh ahi.

Mi kuamah in a hinna a muthei kei a, mi dangte kiang ah zong a ensak/ lah theikei, aziak pen tua hinna pen KHA ahi, tuaziak in Kha thu ah lunglut in.

John 3:16-18

Aziak Pasian in hih leitung a it mahmah a, tuachiin a Tapa tang neihsun apia hi, tuachia kuahileh amah gingtate mangthang lou a tangtawn hinna a neih zawkna diing un. Leitung siamlouh tangsak diing in Pasian in a Tapa a sawlkei, leitung amah ziak a hutdam a hihtheihna diing in a sawlzaw hi.

Kuahileh amah gingtate siamlouh tansak in a om kei diing a, hinanleh a gingtaloute pen siamlouh tansak khit ahi ta, Pasian Tapa tangkhat min a gintatlouh ziak in.

TOUPA A THUPHA HUNG PIA CHIATTA HEN

                            🙏🙏🙏