LOT LEH EITE

~ Pastor Thangdoulal Suantak

Eite kiang a Pasian hung kilakna Lai Siangthou laibu sung a tanchin kigen minthang mahmah Taanglai mi thupi Lot hinkhua ah, tulai a ei, a ki-tulai misak mahmahte’n zil diing tampi i nei ua, a baan baan in i et sawm diing uh hi🙏.

 

SIHNA CHIAM SAM DIINGTE LAK A KHAT AHI HI

Gen. 19:2-3 na in, “Ama'n, ‘Hehpihtak in, ka toupate aw, na silapa inn lam ah hung kihei unla, zan khat hung giak unla, na keeng uh hung sil un; zingsang chiang in na thoubaih diing ua, na paina diing uah na pai na diing uh hi,’ a chi hi. Ama'un, “Hilou; khawlak ah ka giak diing uh hi,” a chi uh hi. Hilezong ama'n ama'uhte a chial nguut-nguut a; tuachiin ama lam a kihei in a inn ah a lutta uh hi; ama'n ama'uhte an diing, tanghou tol sawh louh a bawlsak a, ama'un a neta uh hi,” chih thu i mu uh hi.

A omdan pen Pasian in Sodom leh Gomora a gawt hunlai a Lot leh a innkuante zong, hua khopi tegeel tawh a manthat khawm diing dan uh ahih tuak hi.

Hilezong Pasian Vaantungmite’n “Khawlak ah ka giak diing uh” chi a a dawnlai un zong, Lot in a ngeen nguut-nguut a, tuachiin Pasian thangpaihna a kipan a hotdam in a om lawhta hi.

 

💝ZIL DIING A POIMAWH💝

Eite’n zong, chialna a nial ngailou Toupa Jesu Khrist, i hinkhua ua i chial taktak ua ahihleh, lungtang taktak a deihna taktak tawh i chial ua ahihleh, Pasian thangpaihna a kipan in i suakta thei diing uh hi.

 

🙏A CHIAL KHIALKEI UH HI🙏

Lot in, a inn ua zintung diing in a na chial kei uh henla hileh, Sodam leh Gomora tawh haaltum a om a, vutvai suak diingte ahi uh hi.

Hilezong, a chial khial kei ua, a bit lawhta zaw uh hi.

 

💝ZIL DIING A POIMAWH💝

Eite’n zong, Jesu Khrist i deih taktak ua, i hinkhua uh LAL leh Hundampa hi diing a i pomkei ua ahihleh, Pasian thangpaihna maituah tou zeel lai diingte i hi uh hi.

Hilezong, hichibang ahih louhna diing in, eite a diing in Jesu, i Lawm hoih hi diing in a om hi. Amah i nei taktak ua ahihleh hutdam i hi diing uh hi.

 

🙏LOT IN A IT MAHMAH A TATE A PIA NGAM HI🙏

Lai Siangthou, Gen 19:8 an in, “En un, pasal tawh lumkhawm ngailou tanu nih ka nei hi; ama'uhte na kiang uah k'ung pekhia diing a, na ut bangbang un na bawl diing uh hi; hilezong ka innsung hung beel, hih mite tung ah bangmah bawl kei un, chi'n k'ung ngen hi,” a chi hi.

Sodom khua mite khelhna uanglua ahihman in Pasian vaantungmite na-ngawn luppih diing in a aam hial uh hi. Tuachiin Lot kiang ah, a luppih theih na diing un a ngen uh hi. Hilezong Pasian a diing a sil poitak bawl khaak diing saang in, Lot in a tate tegeel a piakkhiat diing zong khawk a sa nawnta kei hi.

Hisanlaitak ah, Pasian mizia a hung kilangkhia a, tuachiin hua vaantungmite’n khotualmi, ama’uhte siatpih sawm a omte, a mit uh a suktawtsakta uh hi.

 

💝ZIL DIING A POIMAWH💝

👉 JESU KHRIST ZIAK A, I DEIHLAI UH (LUNGSIM SIATNA, KI-MITSAKNA, SUM-LE-PAI, TATE NAUTE, I LAWM-NGAIHTE, KHAMTHEIHTE, KIMAWLNA TUAMTUAMTE, WEBSITE HOIHLOUTE…. PASIAN TAWH HUNG KIGAMSAKTU BANGPEUH HITALEH) I PIAKKHIAT NGAMNA UN I PASIAN UH BANGMAH BAWLLOU IN A MAWK OMSAK THEIKEI HI.

👉A GAM LEH A DIKNA ZON MASAKNA AHIHLEH PASIAN PANPIH DIING A KISAKNA CHI-KHAT AHI.

 

🙏MIDANG HUNDAM DIING A SAWL AHI🙏

Lai Siangthou, Gen. 19:12 na in, “Tuakhit in tua mite'n Lot kiang ah, “Hisung ah tanau dang na nei lai ei? Maakpate, tapate, tanute, ahihkeileh hih khopi ah mi na neih a om ei—a unsiang un hi-a kipan in paikhiatpih in,” chih i mu uh hi.

 

💝ZIL DIING A POIMAWH💝

Eite zong, i Pasian un i batphakna chiang tantan ua Ama nna sem a pang-sam diing in a hung seih chiat hi.

Hichibang a Ama nna sepna a vapang samte i hihna diing un Ama’n eite a hung chial zing hi🙏.

Lai Siangthou, 2Korinth 5:14-15 na ah, “Khrist itna in a hung sawl teitei hi, aziak hichiin ka ngaihtuah uh hi, mi zousiah sihtang a mi khat asih leh mi zousiah si ahita hi. Tualeh a hingte zong ama'uh a diing a hing hi nawnlou in, hinanleh asih taang a si a, tualeh thoukikpa diing a, ahihzokna diing, amah pen mi zousiah a diing in asi hi,” a chi hi.

Khrist a Lawm it aw, mi zousiah kichite lak ah, nang zong khat na hi🙏. Diabol/ Setan zong, a nek diing zong a vialvak ahihleh, ‘Khrist palai i hih theihsam na diing uh ngaihtuah in, eite’n zong Khrist a diing in panla thak ni hang in, Khrist a diing a i nektheih diing uh iu zong diing uh hi🙏. Na hih theihna chiang tantan ah, Toupa’n a hung zang nuam hi, chih theizing in aw🙏.

 

🙏A INNKUANTE BEK HUNDAM DIING IN TOUPA’N A SAWL HI🙏

Lai Siangthou, Gen. 19:15 na ah, “Zingsang phal a hung vak in, vaantungmite'n Lot a nawh ua a kiang ah, “Thou in, na zi leh hi-a om na tanu tegeel taikhiatpih in, tua ahihkeh, hih khopi gawtna ah na mangthang diing hi, a chi hi” chih thu i mu uh hi.

 

💝ZIL DIING A POIMAWH💝

Jesu Khrist chial a, Innkuan sung a Amah nei taktak a om a ahihleh, tua Innkuan pen Pasian in a zang ut mahmah hi, chih mangngilh kei ni🙏.

 

🙏TOUPA KINAWHTA🙏

Lai Siangthou, Gen. 19:16 ah, “Hilezong amah a ze-awl lai hiit-hiat hi; Toupa'n amah a hehpih ziak in, tua mite'n amah, a zi leh a tanu tegeel tawh, a bantang ua kaikhia in, khopi pulam ah a nusia uh hi,” a na chi hi.

 

💝ZIL DIING A POIMAWH💝

Toupa i Pasian un, i innkuan ua a hung zak ut mahmah lai in, eite i ze-awl ua, i na khomuangkha zeel uh hi. Toupa i Pasian un ahihleh, Ama mite mah tungtawn in a deihlamte a bawlkhia zeel hi; Jesu Khrist nei inla, Pasian gam na tu hinkhua ah tungsak zaw in. Pasian in a mite tungtawn in a deihlamte a tungsak hi🙏.

Toupa i Pasian uh, khatveivei a ze-awl a baksam hang, a nna sepna diing lam a kinawh mahmah a, khelhna saltaangte hunkhiatna diing in hun a hawmthoh hi, kichi leh a ki-chi dik mai diing in ka gingta hi.

 

🙏A PAINA UH KHUA IN PASIAN THANGPAIHNA A THUAK KEI UH HI🙏

 

Lai Siangthou, Gen. 19:20-21 na ha, “En un, hua khopi taina diing in a nai hun-giap a, khopi neu khat ahi. Hua'h ka vatai diing—khopi neu khat hilou ama?—hileh ka hinna a bit diing hi,” a chi hi.

 Ama'n a kiang ah, “Hih na ngetna zong k'ung saang diing a, na gen tua khua ka phiatmang kei diing hi.

Pasian in khua thumtak suksiat sawm hileh kilawm in i Lai Siangthou uah a kimu-thei a, hilezong khat pen Lot gaaltaina diing khua ahih ziak in Pasian a zah-ngai a, tuachiin a khoi hi🙏, chi in a kigen hi.

 

💝ZIL DIING A POIMAWH💝

Lai Siangthou, Rom 8:19 na ah, “Silsiam zousiah in kinem mahmah in Pasian tate kilakna diing a ngak-lah mahmah uh hi” chi in a hung hilh hi. Pasian thupha omna, Jesu Khrist neite ahihleh leitung a mi ki-ngaklah mahmahte ahihziak un, mi hampha pente ahi uh hi.

Khrist sisan vang a ka Lawm it aw, nang zong, tuni a leitung in kinemtak a, a na ngak-lah mahmah mi khat na hithei hi🙏.

 

🙏KI-NUNGHEI A POI MAWHMAH HI🙏

Lai Siangthou, Gen. 19:26 na in, “Lot zi in a nunglam a en a, chikhuam a suakta hi,” chi in a na gen a, nunglam et leh ki-nunghei a poi mahmah hi, chih i muthei uh hi.

 

💝ZIL DIING A POIMAWH💝

Lai Siangthou, Pasian thu in, “Mi kuapeuh langkawn tukawm a nunglam en pen Pasian kumpigam mi hitak ahi kei,” chi in Luke 9:62 an a na gen hi. Jesu Khrist, i hinkhua ua LAL leh HUNDAMPA a i pom ua ahihleh, man a leisate i suaku a, tuachiin Khrista a diing a palai i hi uh hi. Hilezong hih sil kilehheisan a, nung-lam en a, leitung i deihna uh bangtak a i zak ua ahihleh a poi mahmah diing hi🙏.

Bangchi hiam a na paisan kha hiam i hih ua ahihleh zong, ama’n eite a hung nan gak zing hi, chih mangngilh kei ni aw🙏.