HONDAMPA HONG ITNA (Jn 3:16)

 

~Pastor Thangdoulal Suantak

Leitung mi zousiah in itna i nei chiat uh hi. Tualeh hih itna pen Pasian batpih a siam i hihna uh zong ahi, aziak pen, Pasian ahihleh itna ahi, chih Bible ah i muthei uh hi. Hichibang ahihlai in mi khenkhatte’n mi dangte tung a a neih uh itna pen a genkhia zungzung ua, mit a muhtheih diing a suklatdan zong a siam uh hi. Mi khenkhat in lah, a sung ua om itna pen, a genkhia siamkei ua, or a genkhia-khia kei ua, a mi itte uh hindante en in leh a mi itte uh khosak dante en in, a deih uh a baklouh chiang in, a lungsung uah, aw, vevaw tazen! Chi in a ngaihtuah taangpi uh hi. Mi khenkhat in lah a mi itte uh kiang a a itna uh a suklatna diing un banghiam a bawl zaw uh hi. Tualeh mihingte pen, mizia kibanglou taktak neite i hihlai un, i mizia kibang uh ahihleh itna ahi.

Kum 2000 napaita-lai in, leitung ah i Toupa Jesu’n zong, tuni a nang leh ken leitung hinkhua i zak bang un a na zangh sam hi. Ama’n mite kiang ah k’ung it hi, k’ung ngai hi, hong zui in, or ka nung hong zui in, na ngaihhuai hi, chihlam tawh kisai in gen-le-sak a neikei a, thutak leh thudik hilhna lam ah gen-le-sak a hau mahmah zaw hi.

Hondampa’n eite a hong it ziak in, thutak a om diingdante a hong hilh hi. Eite i ki-itna uh pen, thutak a om diing kideihsakna lam saang in banghiam lam ahi ut mahmah hi, kichi leh a ki-genkhial kholkei maithei diing hi.

Hondampa’n eite a hong it ziak in, taangtawn a hinna thu a hong hilh hi.

Hondampa’n eite a hong it ziak in, kuamah mudah lou a, meelmate nangawn a it diing in hung hilh hi.

Hondampa’n eite a hong it ziak in, ginna thu a hong hilh hi.

Eite i ki-itna ziak un, bangbang thute i ki-hilh ua? Taangtawn hinna thute leh thudik a om diingdante i innsungte uah i ki-hilhta uh hiam? Meelmate it diing ahihdante i kithuhilh ngaita uh hiam? Ginna thute i kihilh ngaita uh hiam? Chi in i kidong nuam hi. Adiak in ei namte lak a nam tuantual deuhte pen, mi dangte kithuhilhna bang kithuhilhna a neilou leh a neithei nailoute i hi uh hi. Hih thu pen, ut in utkei lehang zong thudik hi in ka ngaihsun hi. Sia Thanglammung in a thugenna khat ah, “Leitung ah nu leh pa itna pen, khentuam a neithei itna ahi a, lawmta ki-itna zong, kitaisan theih itna leh bei hun a neithei itna hi,” a chih thu i ngaihsut leh, i Toupa itna chihlouh itna muantaak leitung ah omlou hileh kilawm hi.

Jesu’n eite a hong itna ziak in amah-le-amah a hong kipumpiak a, eite’n mi khat i it ua ahihleh, i it pen nu hiam pa hiam i neihsawm zaw ua, eite amah a diing a kipumpiakna pen a tamkei a, khatvei-vei a omlou himhim hileh a kilawm mawk hi.

LST i et leh, itna pen piakna ahi, chih baihlamtak a muhtheih in a om hi. Hih tawh kisai a a etsakna pen i Toupa Jesu sihna ah a kichian mahmah hi. Eite a diing in itna pen banglam ah a pai deh-aw? Chih a ngaihtuah huai mahmah hi.

 

Laa teel:

1. Aw nung itna sut siam hileng, ka Mang Nazareth Jesu, hibang liang a nung hehpihna, mi gilou dik nung tangsak.

Aw nung itna lamdang lua saang, chih ka zai-laa hita hen, aw nung itna lamdang lua saang ka hundampa hong itna

2. Kei di’n huan ah thu hong ngetsak, nang di’n zong hong ngetsak hi, mi dang dia lungkham hilou in, kei di’n a sisan hong luang.

3. Ka mawh tatna di’n tua zaan in, vaan nuai en in a hong pai a lungkhamna khamuan diing in, vaan sawltakte hong tualkum.

4. Ka khelhna ama’n puamangta, Ama khelh bang a ngai in, A puak Calvary a nga khia’n a thuak na’n hong tan zouta.

5. A vangletna a kivon in, a meel taang i muh chiang in, kei dia a hong itna lamdang, ka taangtawn laa hita hen.

Aw nung itna lamdang lua saang, chih ka zai-laa hita hen, aw nung itna lamdang lua saang ka hundampa hong itna.