A HAANPUAN HAWKSAK IN

 

~ Pastor Thangdoulal

Tuni in a, noute tawh i kikupna diing ua k’ung teel thupi ahihleh, A HAANPUAN HAWKSAK IN chih ahi. Aziak pen, i kiim i kiang uah haanpuan a tuam mi tampi om in ngaihsutna ka nei a, hih ka ngaihsutna pen a dik diing in zong ka gingta hi. Tuni a mi dangte HAANPUAN HAWKSAK a VAAN PUAN SILHSAK mite i hihna diing ua, panla thak a, Pasian a diing a, khatvei tawh kipanthak thei diing in, ngaikhiatut tung ah i Toupa Pasian Thupha hong tungta hen….

Khat veivei Pasian in ngimna leh deihna kichiantak neikawm in leh eite Amah a diing a, bangtan a pangzou diing i hi ua chih a hung etkhiatna zong hikawm in, i hinkhua uah i kilempih theih taktak louh mite a hung pia zeel hi. Ama’uhte ngolvei (I chih chiang in, khamna theih a eddiction i chihte) ahihkeileh a mi banglou deuh hiam, genhak deuh, hilhhak deuh, thumanglou deuh hiam leh zawngkhal deuh hiam chihte ahi maithei diing uh hi.

Hichibang mite Pasian in a hung piak chiang in zaw, ama’uhte tung a thukhentu a pan, a baihlam mahmah a, na hichih louh ziak ua hichi na hi uh, hilh zohlouh sap zohlouhte, chi a, hehsan diing pen, a baihlam pen hileh kilawm kha diing hi. Aziak pen ama’uhte lamlian zuih leh ei lamlian zuih a kibang kei a, eite pen, i hahpanna uh, eimah leh eimah i ki-thununnate uh leh khawllou a, i sepnate uh Pasian in thupha hong pia hi.

Hilezong a taktak a chih in, Pasian huhna leh panpihna ziak bek a, lamzang zaw deuhte i hi uh hi. Pasian in ama’uhte huhtheih zaw deuh diing a, nang a hung panpih masak hikha diing ahi. Hichibang ahihziak in, na hinkhua a mi nawngkai deuh a na koihte tung ah thukhentu in pang kenla, ama’uhte khotuah zaw in, ama’uhte’n nang mawhsakna saang in na hehpihna leh na khotuahna a poimawh zaw uh hi. Pasian in na tung a, a hoihna a omsak bang in nang zong ama’uhte tung ah na hoihna suahkhia zaw lechin, tuni a a thuphate tawh hung ompihpa Pasian in a hong ompih tou zeel zaw diing hi.

Johen bung 11na ah Lazar kichi Pasal khat a om a, ama’n sanggam numei nih a nei a, Mari leh Martha ahi uh hi. Mari leh Martha in a sanggampa uh a it mahmah ua, hilezong a sanggampa uh pen sih sual a damlou in a om hi. Tualeh hih Lazar kichipa pen Jesu Khrist in zong a it mahmah mi khat a na hi ahi. Tuachiin Mari leh Martha in, Jesu sam diing a mi sawl in, “Ngaih dih Toupa, na it achina hi,” a chisak uh hi. Hichibang ahihlai in Jesu’n Mari, Martha leh Lazar a it mahmah hi. Hibang a a itte unau damlouhna thu a zaak hang, a omna mun ah Jesu, ni nihtak a taam behlai hi.

A khonung in ahihke’h Lazar a sih nung in Jesu, Bethani khua a vatung a, hichih hunlai in, haan a Lazar kivuina ni li a na hi manta hi. Tuachiin Martha in Jesu kiang ah, “Toupa, nang om hile chin, ka sanggampa uh silou mah diing hi ven..” a chi hi. Jesu’n, “Na sanggampa a thou kiik diing,” chi in a dawng a, Martha in, “Ni tawp ni, thohkikkna ah a thou diing chih ka thei hi,” a chi hi. Hichih hunlai in Jesu, khosung a lut nailou ahi. Tuachiin Mari in zong Jesu khua a om ahih a theihtak in, a vadelh a, “Toupa, nang om hile chin, ka sanggampa uh silou mah diing hi ven,” chi in, a keengbul ah a kap hi. Hichibang a Mari kap leh, a nung a hung zui Judah mi honpite a muhtak in Jesu’n, “Amah koi a na sial uh ahia?” Tuachiin Jesu haan ah a paipih ua, Toupa en in, a chi uh hi. Tuachiin Jesu’n Haan sitna suang hemkhia diing in a ngen a, hilezong Martha in Toupa, namsiata diing ahi, a sihna ni li chingta ahi, a chi hi. Jesu’n na gintat leh Pasian thupina na mu diing, a chi a, tuachiin haan sitna suang a hemkhiata uh hi. Tuachiang in Jesu’n Pa kiang a kipahthu gen in, Lazar a kaithou a, “Lazar hong pawt in,” a chi hi. Tuachin misi pen, a khut a keengte haanpuan a tuamsa in a hong pawtkhia hi. Tuachiin Jesu’n phel unla, paisak un, a chi hi.

Jesu’n Lazar tung a a sep diing teng a zouta a, tu in a Lazar innkuante leh a lawm-le-gualte’n a haanpuan a hawksak diing un a omsak a, tualeh ama’un a hawksak uh leh a hawksak louh uh a enkhia hi. Hichibang in nang zang, mi kua hiam in, a haanpuan hawksak diing in hong na ngak-ngak ahi maithei, misi a sihna ni li bang paita khat haanpuan hawksak diing zaw, a namsia mahmah kha diing a, utlouh theihna diing zong tampi a omkha diing hi. I Toupa Jesu’n a sep diingteng a semkhian a, tu in nang leh kei tung ah sep diing a hung guan a, tua ahihleh mi dangte haanpuan hawk diing nasep ahi.

Tanchin hoih Johan bung 8na ah, numei a angkawmlai a kiman khat, Jesu kiang ah a hung paipih ua, Mosi daang dungzui a, suang a denlup diing in Jesu kiang a a heek uh hi. Jesu’n na lak ua a khial khalou leh a khial ngailoute’n deng masa un, a chi a, tuachiin a deng masa ngam omlou in a pai bei uh hi. Hichibang in eite’n zong sepkhial bawlkhial i neitham uh hi. Hitalezong Jesu’n i khelhna leh mohna uah a hung nusia denkei a, mi dangte haanpuan hawksak diing in a hehpihna a hung pia zaw hi. Eite zong huachibang hi diing a lam-ette i hi uh hi.

Ni khat Jesu’n Zakai singkung a tuan in a mukha a, tuachiin Zakai hung kum in, tuni na inn a hung tung diing ka hi chi hi. Aziak ahihleh, Jesu’n mailam a Zakai kizak theih diingdante a thei a, a mu chian mahmah hi. Huaziak in a kiang a an a ne hi.

Tangval Hosea ngaihsut in, Amah pen Pasian represent ahi a, tualeh azi Gomer pen, nang leh kei represent ahi hi. Pasian mi zakh tangval muanhuaitak Hosea pen kasubi kichi numei kizuak khat tawh kiteeng diing a sawl in a om a, tuachiin a kiteeng uh chih LST Hosea laibu ah kichiantak in i mu uh hi. A taktak a chih in, Hosea nasep pen Kasubi tawh kiteenna bek ahikei a, Mangthang khat hunkhiatna nasep baan ah lamthakna leh puahthakna nna sepna ahizaw hi.

Tuni in i mite leh i gam a diing a Hosea na hithei diam, nang mahmah deih diak na hi.

Na mite Hosea na hithei diam? Pasian in hutkhiatna nasem a, mite lamthak leh puahthak diing in nang teekteek hong deih hi…. Will you be our today Hosea?

Haanpuan a kituamlai i gam tampi a om a, ama’uhte haanpuan hawksak diing a Pasian deih nang mahmah na hi.

I mi nam leh i gamsung hutkhiatna nasem a, i mite leh i gamsung uh lamthak leh puahthak diing in Pasian in nang a hong ngak hi…

Na thukhensatna bangbang in i Toupa Pasian in Thupha hong piata hen…