“Ka Damsung Khualzinna Kumte, Tomnoukhat leh Haksatna tawh Kidim Hinkhua Ahi”
Leitung ah, mi zousiah in hinkhua tawh kisai in gendan khat chiat a
kinei a, khenkhat in hinkhua pen taai kidemna, kidouna, ki-thaangsiahna leh
haksatna chihte in a gen ua, hilezong Jakob in hinkhua pen ginna a khualzinna tawh
a na tehkaak hi. Tuachi mahbang in Israel pubulte ahihleh leitung ah mikhual
leh khualzinte a na hi ua (Heb. 11:13-16), tualeh ama’uhte pen Pasian mite zong
ahi uh hi (1Khang 29:15; 1Pet. 1:1; 2:11).
Eite’n zong Abraham, Isak, leh Jakob mahbang in hih leitung pen i
inn uh ahikei chih i pomkip uh hi. Hih leitung a i hun zakhte uh ahihleh
tomnoukhat sung bek ahihziak in, taangtawn a i teenna diing uh, vaan a Pasian
khopi pen i gaaldot zing uh hi.
“Ka damsung khualzinna kumte, tomnoukhat leh haksatna tawh kidim
hinkhua ahi," chi in Jakob in Faro a hilh hi (47:9). Jakob damkum 130 tam
saloute ngaihtuah diing a poimawh khat ahihleh, Isak kum 180 a hih in a si a,
Abraham kum 175 a hih in a si hi; ama’uhte a tawh tehkaak in Jakob damkum pen a
tawm mahmah hi.
Biakna tawh kisai a pasian tuamtuam tampi kibiakna gam ah, Joseph
innkuante’n Pasian hing bia hihna uh, omdan leh gamtatna a, a taklatna uh pen
ama’uh innkuan bek a diing in a hoihkei a, Pasian a diing in zong a hoih a,
tualeh tuni hih thu simkha eite a diing in zong etton a taak ua, a hoih mahmah
hi. Hichibangte ahihleh Peter in, “Zentelte lak ah na gamtatdan uh kilawmtak in
om hen,” a na chihte ahi (1Pet. 2:12).
Comments
Post a Comment