THIL HAKSA AHIKEI

 THIL HAKSA AHIKEI

Tu i dinmun leh omdan bangbang uh ziak in Toupa’n a hung nialkei a, i om bangbang un ama’n eite a hung zongkhia zaw hi; hih pen tu i dinmun leh omdan bang ua i omden louhna diing uh ahi.

Amah tawh kizop a, pumkhat i hihtheih na diing un, amah mah in i kizopna diing uh khau-gui pen Singlamteh tung ah a hung khunsakta a, tuachiin mikhial leh siatna a dimte hi lehang zong ama’n eite a hung tunkhum a, tuachiin Khrist tungtawn in midik leh dikna a bukimte i suakzawta uh hi.

Ephesate 2:5-6 “Khelhna a si i hihlai un zong Khrist tawh a hung hingsakta hi. Hehpihna ziak a hundam na hi uh hi. Tualeh Jesu Khrist tawh a hung kaithou khawmta a, vaan munte ah a hung toukhawmsak ta hi.”

Hehpihna khau-gui tawh amah mah in eite a hung zoptheih na diing in Singlamteh a hung teel a, amah zopthei lou mite thah ahih ua zoh ahihna diing un thoukik Khrist Jesu ah, mi thak hihna, vaan khau-le-tui hihna tanvou eite a hung piazaw hi.

Rome 4:5-8 “Hinanleh nna semlou a Pasian ngaihsak loute siam tangsakpa gingta mite ginna pen diktatna a sim ahi.

 

Mi, nasep panglou a Pasian in diktat a asimte agual zawhsak thu David in zong: A khialhnate uh ngaihdam a omte leh, a khialhnate uh khuh a omte a hampha uh hi!

Toupa'n khialhna neilou a asehte a hampha uh hi.” Chi a a na genbang ahi.

Jesu Khrist ah i mi baklouhna leh khelhna zousiah phiatmang ahita a, sihna pen a thoukik Jesu Khrist ah, mihing thak, sil siamthak i hizaw ua, tuachiin amah pen i tungtaang thu uh hung khensakpa deih-huai ahizawta hi.

1Kor 1:30 “Hinanleh nou pen amah vaang in Khrist Jesu ah na om uh hi, amah pen Pasian a pat ei a diing a pilna, diktatna, siangthou sakna tualeh tatkhiatna diing a bawl ahi.”

Mahni a kisiamtan theilou leh kisiansuah theiloute a diing in amah (Jesu Khrist) pen, i felna uh leh i siangthouna uh hi diing a guat ahi a, sual sil bawltheih nate pan a mahni a kihemthei loute a diing in, amah pen eite hung tanpa ahi a, a hamphat huai mahmah hi.

Khrist in eite a diing a, a nasep leh a sil bawlte ginna pen Khrist mi-le-sa hihna ahi a, thil haksa kei hi.

Siam na tanna diing un bawl chihtak in bawl unla, hahpan in pang un a hung chikei a, siam hung tantheitu gingta diing in a hung deih hi. Thil haksa ahikei, gintak mai diing ahi. Thil haksa loute haksa a siam teitei louh diing ahi. Pasian in na ginna a en a, na omdan ah a hung tehkei hi.

🧑‍💻TONGKUP-ZAITHA💪