Na inn biakna inn a hithei diam? John Mark Nu Mary Tanchin.

 

Na inn biakna inn a hithei diam?

John Mark Nu Mary Tanchin.

Nasepte 12:12 na a, a tanchin tamlou i muh uh John Mark piannu Mary in, a inn pen biakna inn a suah hi! Nungzui masate’n gawtna a thuak hunlai uh ahi a, bangchik chiang a gawtna hung tung diing chih zong bangmah genkholh theih a omlouh hunlai in, John Mark nu Mary a inn pen Pasian mite kikhopkhawmna mun a suaksak ngam hi.

Kumpi Herod in nungzui masate (Gingtu masate) tawlnga lou a, a gawt hunlai ahi a, Jakob sanggampa John zong, a ginna ziak a thah ahita a, tualeh tu in, Peter thong (jail) ah khum in a om hi.

Hichibang hun haksate in gingtute a tuamkiimvel hunlai in Mary inn ah gingtute a hung kikhawm ua, lungtang zousiah sungbua a kilungtuak in, Peter a diing in a thuumkhawm uh hi.

Hilaitak ah, Mary leh Pasian kizopna muhtheih in a om a, tualeh Khrist taksa a diing a Mary kipumpiakna thupitak zong muhtheih in a om hi.

Amahnu inn pen, ama’uh innkuan bek teenna mun ahikei a, thuumna munpi, kipawlkhawmna munpi, leh kibukna munpi leh Pasian nasepna munpi zong a hungsuak hi.

Khristiante tawh kalsuan a zawkna hinkhua in a tung a buaina a tuttheih diing ahihlai in, Mary in a inn pen gingtute kikhopna munpi hi diing in a honsak hi.

Tualeh Nasepte 12:12-17 na a i muhbang un, Pasian silbawltheihna in Peter a zaleensak a, thong (jail) a kipan in a hung pawtkhia a, tuachiin Mary inn a hung zuak vengveng hi. Hilaitak a i muhtheih uh ahihleh, Mary inn pen nungzui masate a diing a zong, a na kimuhkhawmna uh, meeting a neihna mun uh ahihna ahi. Huaziak mah a Peter in hinu inn a hung zawt vingveng ahi.

Tuachiang in Mary tapa Jahn Mark ahihleh tanchinhoih Mark gelhpa a hung hi a, hih pen a nu Mary impact ahi a, tualeh John Mark pen Thukhun Thak sung a diing a Paul leh Barnabas tawh Missionary a khualzin masa pen in a hung omkha hi. Hih zong anu sep gah mah ahi hi.

Hih John Mark pianna nu Mary tanchin in a hung ngaihtuahsak mahmah khat ahihleh, thugenna (preaching) leh kilamkaihna (leadership) chihte bek tawh Pasian kumpigam pai-hoih ahikei a, hilezong a inn thuumna mun a suaksak ngam gingtu, a neih-le-lam tawh Khrist a zui ngam gingtu leh Khrist leh a mite a diing a hingkhua a zang ngam gingtute (ordinary believers) ziak mahmah a zong api-hoih a na hi ahi.

John Mark Nu Mary tanchin pan a i kihanthawn ut pen uh ahihleh;

1. Pasian in inn khat pouhpouh ama nna kisepna mun, thuumna mun leh kihaanthawnna mun ahisak thei a, nang a zong a hisak nuam hi. Na kiphal a ahihleh!

2. Pasian kumpigam nna sepna ah Zindouna (hospitality) pen nasep thupitak ahi.

3. Gin-omna tungtawn a om hangsan in hun haksa leh laau-huaite zong a zouzou hi.

4. Tate kha hinna dinmun diing ah, nu leh pate in mawhpuakna liantak a nei uh hi.

5. Saptuam masate ahihleh thuumna neitam mite ahi ua, hua a thuumna uh ahihleh a haatna uh ahi hi.

Nasepte 12:12 “Mi tampi a kikhawm ua, a thuum uh hi.”