Biak-inn Meivaak a Mih Ngailouh DIing Ahi

TONGKUP-ZAITHA

Meivaak a Diing Sathau

Pawtkhiatna 21:20-21 “Meivaak a kuan tawntung theih na diing in, Israel mite'n oliv thau, ama 'uh bawl thoh siangtak, a hung tawina diing un thu na pe diing hi. 21Kimuh tuahna puanbuuk sung, thukhun bawm mai a puanzaak pulam ah, Aaron leh a tapate'n nitaak a kipan in zingsang tan in, Toupa mai ah tua meivaakte a kuangsak tawntung diing uh hi. Israelte lak ah hih biakna daan a khang a khang in a omden diing hi (Ref. Siamp 24.1-4).

Thukhun Lui hunlai in Biak-inn, Meivaak, leh Sathau in poimawhna liantak a nei a, ahunlai in hih sil thumte pen vanzakh, biak-inn a diing a sil poimawhte in a na ngaihtuah ua, zong a dik hi.

Hilezong  Thukhun Thak ah hih sil thumte hibang a hilh in i omta uh hi:

Biak-inn (Temple) pen mihingte genna ahi hi; 1Kor. 3:16, “Pasian biak-inn na hi ua, na sung uah Pasian Kha a teeng hi chih theilou na hi uh ama!” chih ahita hi.

Meivaak ahihleh Jesu Khrist genna ahi: John 8:12, “Kei leitung vaak ka hi,” Jesu in chi hi (Ref. Is. 60:1); tuachiang in hih vaak pen gingtute kiang ah piak sawn ahi: Matt. 5:14, “Noute leitung vaak na hi uh,” Eph. 5:8, “Masanglai in mial na hi ua, hilezong tu in Toupa ah vaak na hi uh,” chih ahita hi.

Sathau ahih Kha Siangthou limlahna ahi tawntung hi.

Tu a, eite pen Biak-inn leh Meivaak i hi uh chih a kichianta a, Thukhun Lui hunlai a, Pasian in Biak-inn meivaak a mihlouh diing ahi (Pawt. 20:20-21; Siamp. 24:1-4) a chih pen eite a hung genna ahita hi; tua ahihziak in i meivaak uh a mihlouhna diing a poimawh penpen ahihleh Sathau ahi a, hih Sathau pen Kha Siangthou genna leh limlahna zong ahihziak in, i hinkhua ua Kha Siangthou a kilak theihkei a ahihleh, i meivaak uh a mit diing hi, chih pen a kichian mahmah a, Pentecost ni Kha Siangthou tang a, i Toupa Pasian uh mitmuh a, i meivaak uh a mihlouh na diing in Toupa Kha Siangthou in simtute tengteng hung ompih chiatta hen!

Toupa Thupha.