Isak: Siamc. 17:18-22. Tongkup-Zaitha Bible Study

 

TONGKUP-ZAITHA: BIBLE STUDY

Siamchiilbu. 17:18-22. Isak

Laisiangthou a nau-ngek, a pian masang a, a min diing kiphuakte lak ah a khatna Ismael (Siamc. 16:11) ahi a, a nihna ahihleh Isak ahi. Hih naupang tegeel pen, etsak hoihtak nei a piang ahi uh hi: (1) Ismael, taksa a i pian masakna uh etsakna ahi a, (2) Isak, Kha tungtawn a i nihvei pianna uh etsakna ahi (pianthakna) (John 3:1–8 leh Gal. 4:21–31, adiak in taang, 28–29.). Tualeh Siamc. 21 na lam ah, a kichianzaw in i sintoulai diing uh hi.

Hilaitak ah, leitung hinsung a ginna tawh kilamkaih utte a diing in sinlai poimawhtak, a tak a zuih diing a om hi: Pasian in mailam hun a na hoih na diing a hung bawlsak chiang in, na hun paisate ah omden sawm ken. Ismael ahihleh na hun paisa ahi a, Isak pen na mailam ahi. Ismael pen, mihing in Pasian a diing a, taksa a banghiam i bawlsak pen uh etsakna ahi a, hilezong Isak pen nau-ngek lamdang, Pasian sil bawltheihna a piang ahi hi. Ismael in innsung ah lungsim kituahlouhna a tun a, Isak in nuihna a tun hi. Na hinkhua a “Ismael” neikha na hihleh, Pasian kiang ah pia in. Pasian in nang diing in silhoih a nei a, hua pen a hoih penpen ahi. Haksa mahmah lezong na “Ismael” pen paikhia in, Pasian lampi ahihleh lamdik a hi gigezaw hi.

India gam a missionary nasem Amy Carmichael in, a lawm genthei kisa, lungkhamtak a omnu khat kiang ah, “Hun sawtlai a, i vaanpi Pasian in a hung gen pen mah k’ung gen diing, ‘Sihtheih na diing a omleh, hoihtak in a na enchain in” achi hi. Hih pen nang-le-nang kithat kenla, ngaihtuahna hoihlou na neih pen sisakzaw in, a chihna ahi. Hichibang sim a eite’n zong, “Oh ka sung a om Ismael pen sita henla hileh aw!” chi a thuumna i neihtheih ngeingei diing uh ahi.

 Ismael in minthak a neikei a, minthak piak in a omkei hi; aziak pen amah ahihleh hih leitung taksa limlahna (represent) ahi a, kheek theihlouh ahi. “Sa a piang taphot sa a ahi” (John 3:6). Paul in, “Keimah ah (ka taksa ah) sil hoih mawngmawng a teengkei hi” (Rom. 7:18) a chi hi. Tualeh eite hinna hung pia pen ahihleh Kha ahi a, taksa in bangmah a hamphatpih kei hi (Jn. 6:63). Hih pianken mizia lui pen a kithu-neihkhum thei a, thunun theih in zong a omthei hi; hilezong a kikheek theikei hi. Toupa masang a Kha-lam taksa i neih dong uh taksa leh kha kikaal gaaldouna pen a omden diing hi (Gal. 5:16–26).