TONGKUP-ZAITHA 20250928

 

__✍🏻 Pastor Thangdoulal Suantak

Tu hun leh tu dinmun a, i maituah uh silte, haksatna i thuakte uh hung theihpih khollou mite ahihleh, i tanchin uh thei mahmahte a na hikha zeel uh hi;

Hichibang mite pen, hung it leh hung ngai-naa mahmahte dan a sim diing pen sil haksa mahmah khat a suak a, tuachiin poisakna liantak ka nei a, lah bangmah bawltheih ka neikei hi.

I kiang ua thu-ip bangmah nei ngailou a, i haatlouhna leh ei a om taaksap leh mite i batzoh louhna tampi omte imchip leh i haatlouhnate, ei a om taaksapnate kitheihmoh bawl zong, mi a na om veve zeel hi.

Hichibang mite pen, i siatna diing uh deihte dan a sim diing zong a haksa mahmah kiik hi.

Mihing lungsung ah sil kihdak-huai leh gimsia mahmahte zong, phumlut leh tuhlut in a om a, hua in Itna leh deihsakna na-ngon zong, sukminsiatna leh a kheem-kheem a suaksak thei a, a laau-huai mahmah hi.

A taktak bang in kilang lezong, a taktak ahihlouhdan a kilat hun a om zeel hi.

Mi hoihlou leh tatsia, giitlouh chihtak a giilou tawh kituah hun a omthei a, hitalezong, hua pen eimah a om hoihnate suklat ahihna diing a HUN HOIH ahi, chi in pomsiam mai-lehang hoihzaw lou dii!

Mi hoih leh migi mahmahte tawh kituahkhak hun zong a omthei zeel hi; hichibang mite lak a i omkhak hun chiang un simlai bang in omzaw lehang, ama’uhte a kipan in banghiam sinkhiat sawm in, ZILLAI HOIHTE zilna diing in lata lehang, a hoih diingdan maw!

Siatnate lak a a hoihlou penpen a omtheih a hihlouhbang in, a hoih penpen zong a hihtheih mawk kei hi.

Eima KITEHNA leh KI-ETDAN tawh kituak in silte kilatdan a lamdangzaw hi.

Mite hung etdan i khelsak theihkei taak ua ahihlezong, ama’uh tungtaang a i lunggeel, i ngaihtuahna pen khelzaw mai lehang a hoihzaw mai diam maw! Hoihzaw teitei diing ahi.

Mi zousiah mai a siamtan i sawm tentuun mawk ua ahihleh, i zah-omna uh mansuah diing khop in, i dikna uh leh i diklouhna uh tawh i buai tawntung kha-diing uh hi

Hih mizia in mi kiliansak penpen nu hiam mi kiliansak penpen pa hiam a hung suahthei hi.

Khristian hi a, mi piangthak khat i hih ua, eite hung siamtantu Toupa Jesu Khrist mai a  dintheih ua ahihleh hua pen HINDAN-KHANDAN DIKTAK i muhkhiatna uh ahi hi.

Mahni lamlian chiat zui a pai pen asia ahikei a, hitalezong, mi dangte su-liam leh vapangdawt gige kawm a i pai chiang un, hua in ITNA DAAN a kalh a, eimah a diing in siatna ahizaw hi.

Ei ziak a kua hiam in, khase-tak a biang a mikhitui luang a Toupa a na sap-khaak diing pen a laau-huai a, den ni chiang a kiphuankhiat a na ngaiklha diing hi.

Mi lungsim suknat a va-liamsakna ahihleh, Jesu Khrist sinsakna tawh kikalh a hinkhua zakna kichetna ahi, chih mangngilh louh diing ahi.

Mi’n i sil hoih bawlte a muhtheih kei ua ahihleh zong, vabuaipih kei lehang, a muhna chiangtan-tan uh pen eima hihna a na hizaw ahi chih theisiamtu lah eimah i hi-ngal ua. Ama’uhte saang a i lamdan zawkna uh ahihleh AMA”UHTE BANG i hihlouhna uh ahi

Hih diing in, eima lungsim thuzoh a, thunun siam a ngai mahmah hi.

Eimahl eh eimah ki-etna diing in LIMLANG (mirror) TOUPA in a hung pia a, hua pen THU-NGETNA leh BIBLE SIMNA, Pasian thu suut a, ngaihtuahna tampi piakna ahi.