Pasian hehpihna bangmahlou a saanglou diing in noute zong k’ung ngeen uh hi


 2Korinth 6:1b

~Pastor Thangdoulal Suantak~

“…Pasian hehpihna bangmahlou a saanglou diing in noute zong k’ung ngeen uh hi...” A theihnop diing in, ‘Pasian hehpihna thupitak a saang diing in noute zong k’ung ngeen uh hi’…

Pasian Itna laa no. 255-na in,

“Aw hehpihna leitung taanvaak, Kalvary singlamteh tung ah ka Toupa’n a hong thuak, ka ngaihtuah chiang lamdang lua saang; ….. Toupa chitna, hoihna, phatna, simthu zailaa in leel theilou hi; pahtawi uh thangvaan ah, Toupa maangtouphah tung a tou, Serafimte’n zailaa in phat uh, en zong phat chiat ve ni,” chi hi. 

Pasian hehpihna simmawh kuamah i omkei ua, zong ut-huailou hi. Kuamah zong Pasian hehpihna simmawh in i ki-ngawhkei uh hi. Hilezong Pasian hehpihna thupitak a saandan kisiamlou deuh hileh kilawm ahihman in kizilthak ngai in ka ngaihsun hi. Hua diing in hih a nuai a thute limtak in i ngaihsun khawm diing uh hi.  

1. Pasian hehpihna thupitak a saang diing in: Pasian Hehpihna ziak a ne-thei, dawnthei leh thakhia theite i hihna uh thupitak in i ngaihsunthei ama? Ahihke’h bangchibang in i ngaihsun ua? Chih thupitak a ngaihsut thak diing in hoih kasa hi. Ka neu deuhlai in zuntha theilou in Lamka Dist. Hospital ah ka ki-ensak ngai a, huaziak in zunthak theihlouh haksatna theichian in ka kikoih hi. Tu ni in, ne-theilou in na khoilam pan hiam in na an diing hung kibah hiam hung kikaplut thoh hiam hileh, bang ngaihdan na nei diai? Na zun na ek khaihthoh diing dinmun ah om leteh bang ngaihsutna na nei diai? Pasian Hehpihna ziak a ne-thei, dawnthei leh thakhia theite i hihna uh thupitak in ngaihsun thak ni aw!….  

2. Pasian hehpihna thupitak a saang diing in: Pasian Hehpihna ziak a hinna piak a i omna uh thupitak in ngaihsun thak ni. Na hinna Pasian a kipan ahi a, Pasian in a manbei a a hung piak ahi chih thei kawmkawm in, i hinna uh thupitak in ngaihsun ni hang in, i hinna uh sesak thei diing silte (teep-le-muamte, zu neeknate, khamtheih-guihtheihte) tawpsan sawmta lehang hoih diing ahi; mi khat in a hinna thupitak a a ngaihsut theilouh chiang in, a hinna sesak diing teep-le-muam hi in, khamtheih-guihtheih hitaleh neek a, bawl gawp diing khawksakna neilou hi; hichibang mite’n Pasian pan a a ngah uh hinna zahtaak lou ua, Pasian hehpihna zong thuseh lou uh hi!...

3. Pasian hehpihna thupitak a saang diing in: Pasian Hehpihna ziak a ginna tungtawn a Tatkhiatna pen thupitak in ngaihsun thak ni. Hutdam i hihna uh thupitak a ngaihsun theiloute’n Pasian Hehpihna thupidan a theikei ua, Hutdamna manphatdan zong theilou uh hi; a taktak a chih in leitung ah sum-le-paai a leitheih louhte leitung ah a manpha penpente ahi; damtheihna a ki-leithei kei hinanleh manpha mahmah hi; hichibang sim in Pasian hutdamna zong a ki-leithei kei a, hilezong manpha mahmah ahihman in limtak in ngaihsun thak ni.

Pasian Hehpihna thupitak a i saan siamna diing un, Pasian Hehpihna ziak a i ngah, leitung sum-le-paai a leitheih louh, i hinkhua ua omte limtak a ngaihsun thak diing in i ki-ngeen un i ki-chial uh hi.

Bangteng hileh, ek tamlua vok in gailou a kichihbang in thu tamlua zong kithei kim zoulou ahihman in, hizah in hunsak ni. Damni Mangpha…..

Toupa in hih thute na simna ah a thupha hung ngahsakta hen aw!....

Comments

Post a Comment

Popular posts from this blog

Damlai Gawtmun

Image
  By: Pastor Thangdoulal Suantak   Damlai Gawtmun pen vaangsiatna leh vaangsia kisakna genna kammal leh, utlouhna munte a omna leh nna sepnate genna deuh ahi a, hih pen mi zousiah tung a tungthei sil zong ahi hi.   Nu-ngak meel hoihtak khat in hunkhatlai in pasal sepna nei khat a a kiteenpih a, tuachiin ta pasal thum leh numei nih a hung neita uh hi. Hibang ahihlai un, a pasal in zu a neeksan a, lawm a ngaisan a, a zi-le-tate khawtuahlou in hinkhua a hung zangta mawk hi. Hih numei in a pasal leh a tate a nusiat diing pen a ngai-ngamkei a, tuachiin a tate tawh a neek diing uh khut nna sep a zong in hinkhua a hung zangtou ua, tuachiin a tapa taak pen a hung tangvaal simsimta hi. Tuachiang in a tapa taakpen tawh sum-le-paaite zong in a hung om ua, a naute skul a kaisak uh hi. Tuachiin hih numei tapa taak pen in zi a hung nei a, sepna bawlnate tawh innsung keem in, inn nuamtak a hung bawl a, haksatna tampi tawh a inn bawl uh hung zou uh hi. Nuamtak a hinkhua zak dii...
Read more

TONGKUP-ZAITHA

Image
  _✍🏻 Pastor Thangdoulal Suantak  Thupi ut luatnate, minthan ut luatnate, a penpen hih utnate i lungsim ua pan a, a koihkhiat diingdan ngaihsut a, paihmang vingveng a hunta in na thei samta hiam? A ki-ngiamkhiat ngam, a guallel ngam lamlam lah, Mihingte pahtawi hikei lezong, Pasian in a pahtatzaw ngal a! Mihing dinmun saanna diingte, mite genphat leh mite theih hihna diingte, khovel sil a hamphatna diingte a lah, a mi zousiah in Pasian lemsakna i ngah uh poimawh ahihna lah i pomsiam mahmah zeel ua maw! Hilezong mite theih phaklouh leh khovel sil a lawkna diing omlouhna dinmun a dinna pen Pasian aw zaakna diing a sil poimawh khat ahihlam lah i pomsiam theikei zeel mawk ua maw! Sil hoih zousiah i bawlkim theikei ua, i lungsim ua om zousiah zong Pasian hung houpihna AW a hikhin kei chih thei thak ni aw! Na kalsuan sukdik sawm in, kal khat suankhial, khatvei totkhialna in eimah lak ah natna a hung tunzaw hi!
Read more

ETTONTAAK, LARA DUTTA-TE NUPA

Image
By: Pastor Thangdoulal Suantak   Indian actress leh interpreneur minthang leh meel hoih, kum 2000 a Miss Universe hihna na ngah leh Miss Intercontinental zong a na hikha ngai, Bollywood films a zong gentham chingtak, Lara Dutta leh a pasal, Indian tennis minthang, Indian tennis player lak a, 1997 kum a Grand Slam tournament a kilang zou, mixed doubles a zong Grand Slam chiang tungzou, International Prwmier Tennis League (IPTL) dinkhepa, Mahesh Bhupathi-te nupa in Pasian muanna in, tukum kumbul a kipan in a omna uh Saptuam a Pastor Shekar Kallianpur tawh kimuhna diing in zingsang nai 4 (4AM Challenge) a bawl ua, tuachiin zingsang naili sial in thu-ngetna hun zangh uh hi. Tuachiin Mahesh in, ‘Breakthrough From Heaven,’ chih youtube video bawllawhta hi. Hih video ah a testimony thupitak a gen a, zingsang baihtak a Pasian mai a vaki-aap a hamphat-huaidan leh a manphatdan a gen hi.   2013 IPTL Mahesh in kum 2013 a kipan in project thanop-huaitak leh khantouhna diing a hoi...
Read more