Nokseng aw, na hinna diing in Jesu Nusia in! Eh, Nuisia lou e, Jesu ka nusia theikei hi!

 

Ni danglai 1904-1905 chih hunlai in, Wales gam ah Kha khanlohna a na tung a, tua Kha khanlohna tungtawn in, Missionary nna sem diing in mi tampi a kipekhia ua, hua tampite lak ah bangzah hiamte India gam, Assam state sung a om Garo kichi singtaangmite lak ah a hung tung uh hi; hichih hunlai in singtaangmite lak ah, mi dangte tawndan leh khandante pom-siamna mizia pen a na tamkei a, tuachiin khua sung ah zong, hausapa theihpihna lou in, kuamah a mawk giak theikei a, hih chibang cultural barrier tuamtuamte ziak in Wales pan a hung kuan India malsuah bial a hung paite, lohsam in a kileh uh hi; hilezong pasal khatpa pen hibang a hikei a, khua a lut in, hun bangtan hiam a om nung in innkuan khat a piangthaksak (ginna kikhengsak) hi; hibang hung piangthakpa ahihleh NOKSENG ahi.

Hichibang a khuapihte tawndan tawh kibanglou tawndan leh gindan tawh kibanglou gindan a hung neihtak in, hausapa a heh mahmah a, tuachiin amah pen, “Tanglai leh Tuhun” film a, khajang hausapu in a naupa kiang a, “Hitanveipi i pi i pa’n singzung suangzung a na biak, damtheihna hileh bang hileh, siing-le-ai, vokpi voktal, sialpi sialtal, taang ki-ai, kitong, tutan a kidam, tuni a nou a tuam a pial diing a, hi a mi zawnvakpa khat thugen gingta a, a nung na zuih taktak diing uh maw?” a chihbang sim in, hausapa’n zong Noksengte innkuan a na hou ahih tuak hi.

Tuachiin, hausa thusuak in, khajng pumpi sap in a om ua, hua mun ah, Nokseng leh a innkuante zong sap in a om uh hi; tuachiin mipite mai ah, Hausapu in Nokseng thudokna a nei a, na gin uh Jesu na nusia un, na nusiat utkei leh hoihlou diing hi; chi in a gen a, Nokseng in lah Jesu khahsuah utlou ahih chiang in, a tawp ah, Hausapu thalkap-siamte’n Nokseng mitmuh in, Jesu a nusiat utlouhna ziak in a kaplum masa uh hi.

Anihveina diing in Jesu nusia in, tu a na utlai kei leh na zi zong kaplup ahi diing hi; chi in Hausapu in a gen hi; hilezong Nokseng in a Tanpa Jesu nusia utlou ahihman in, a zi zong Hausapu thalkap-siamte’n a mitmuh in kaplum uh hi.

Atawpna ah, tu in Nokseng aw, kisiik inla, na lunghei in; na tate leh na zi a si khinta uh hi; Jesu nungzuihna tawpsan in, chi in Hausapu in a gen kiik a, hua ah zong Nokseng in a Tanpa Jesu Khrist pen nusia theilou ahihman in ama hinna mahmah zong laksak in a omta hi.

Tuachiin hihpa Nokseng kammalte a kipan in laa khat a hung pawtkhia a, “Jesu nungzui diing in ka kipanta, kiik nawnlou, kiik nawnlou diing,” chih ahi.

Hih Noksengte innkuan Jesu nungzuihna pen tulai i society uah, i Saptuamte uah, leh i khotaang uah poimawh mahmah hileh kilawm mahmah hi.

Tulai in gingtute hibang in kihawmta hi;

1. Jesu lamkaih gingtu: Jesu saang a amah kipoimawh sakzaw, Jesu in a hinkhua ah thu nei zoulou.

2. Jesu in a lamkaih gingtu: Jesu thuneihna leh letna hinkhua.

3. Jesu tawh kituahna neilou gingtu: Generational Christiante, Khrist a pianthakna neilou hinkhua.

Hihte lak ah, nang a bang pen ah na omkha a?

“Hung zui un, mihing man diing in nou kung bawl diing hi” (Mat. 4:19) Toupa’n a chi hi. Nokseng leh a innkuante’n Jesu a zui ua, tuachiin ama’uh innkuan thatte, a khozang un, a Hausapu uh lamkaih in Jesu Khrist gingtate a suak uh hi; Toupa’n Noksengte innkuan, mihing man in zang taktak ahi. Nou innkuan bang na chih sawm ua leh?

Jesu lamkaih gingtu hilou diing in pilvang inla, generational Christian zong, na hihlouh himhim diing ahi; Toupa’n nang tungtawn a nna sep ut a neihte a sepkhiat theih na diing in nang teekteek hung ngak ahi.

Kisa inla, tu mahmah in, Toupa kiang ah thupha tawi in, amah ah ki-aap thak in! Toupa’n hung lamkaih nuam ahi.