Na Lungtang uh Mangbang Kei Hen! (John 14:1-3)

✍️Pastor Thangdoulal Suantak

“Na lungtang uh mangbangsak kei un, Pasian muang unla, kei zong hung muang un. Ka Pa inn ah teenna diing mun tampi a om ahi; omlou hileh, k’ung hilhta diing hi. Nou diing a mun bawl a pai diing ka hi. Ka om na a nou zong na omtheih na diing ua, vapai a, nou a diing a mun ka vabawl leh, k’ung paikiik diing a, ka kiang ah k’ung la ding hi.”

Pasian laa Siangthou no. 54-na in,

“Toupa na thei, nangbang lawm dang nei keng, Vaan ka inn hikei leh Toupa bang ka suak diam? Angelte’n vaan kongkhak hoih pan hung gaaldot uh, hih nuai simlei zaw nuam ka sathei nawnkei hi. 

Hih leitung ka taangtawn mun diing hikei, ka khualzinna lel hi; ka vaan goutan diingte lummei zaamna gaalkhat ah a omzaw hi. Angelte’n vaan kongkhak hoih pan hung gaaldot uh Mangbat-huai nuai simlei tuang nungsiah nuam ing,” chi hi.

I Toupa Jesu’n, “Na lungtang uh mangbangsak kei un” chi napi a eite’n i lungtang taktak ua mangbatna diing haau mahmah hilehang kilawm khop in, kikhopna hunte a kikhawm manlou, Saptuam Program tuamtuamte uap manlou in hinkhua i zanghkha thei zeel ua, dah-huai chihlouh gen diing tamlou hi. 

I Toupa Jesu’n, “Pasian muang unla, kei zong hung muang un” chi napi a, eite’n i Toupa Jesu Khrist leh Pa Pasian pen, muangzou taktak lou i deh-o! 

Ka Pu in a damlai in, “Leitung ah mi gual-lelte’n ‘Pasian in theih heh,’ chih kammal a zang ua, hilezong a gualzoute’n zangh lou uh hi,” chi in a hung genkha ngai hi. Ei pawl pen, mi gual-lel kitawm hileh kilawmtak bang in, Pasian Muan taktak a, ‘Pasian in theita hen,’ chi in i vaai diing zousiah Amah i Toupa Jesu Khrist khut ah a i koih tamkei mawk uh hi. Innsung vaai a buaina neite leh buaina tuamtuam neite’n Pasian saang in singnuaimite leh policete kimuang zawta hileh kilawm hi. Ngaihsun thak sin-o leeh!....

I Toupa Jesu’n, “Ka Pa inn ah teenna diing mun tampi a om ahi; omlou hileh, k’ung hilhta diing hi,” chi napi, leitung ah innbul-loubul hih diing mah kilunggulh chiaichuai hi. Pasian kiang a teen diing lunggulhna eite lak ah tawm mahmah hi, chi lehang dik khadiing hi.

I Toupa Jesu’n, “Nou diing a mun bawl a pai diing ka hi. Ka om na a nou zong na omtheih na diing ua, vapai a, nou a diing a mun ka vabawl leh, k’ung paikiik diing a, ka kiang ah k’ung la ding hi,” chi napi, i Toupa Jesu tawh teenkhawm diing lunggulhna in i hinkhua uh lamkaih zoulou deuh hileh kilawm hi. 

Eite pen, eimah a diing a hinglou a, i Toupa Pasian a diing a mi kibungbulehte i hih diing dan uh ahi a, ei deihna bang a omlou a, i Toupa Pasian deihdan a om zawk diingdan ahi. Ei hoihsak bang a nna seplouh a, i Toupa Pasian hoihsak bang a sep zawk diingdan ahi.

Innsung a i kivaipuakna uh zong i Toupa Pasian vaipuakna tawh a kituak diing ahi. Pa in a zi a tate a kep diingdan zong i Toupa Pasian in a siamsa leitung mihingte a hung kepna daan tawh a kituak diingdan ahi.

Pasal in a zi a it diingdan zong, i Toupa Pasian in saptuamte a hung it a, saptuamte a diing a, a hinna a piak ahihziak a, zi a diing a si-ngam pasal hih diing a na poimawh mahmah dan ahi. Zi in zong a Pasal a it bek hilou a, a kipumpiak diing chih ahihdan theih diing ahi.

Bangteng hileh, ek tamlua vok in gailou a kichihbang in, thu tamlua zong kithei kim zoulou ahihman in, hizah in hunsak ni.

 Damni Mangpha…..

Toupa in hih thute na simna ah a thupha hung ngahsakta hen aw!....