EN-HAKKORE- HINNA TUI (TUISAM)

 

Laisiangthou a mi lamdang, a haatna ziak a gen-tulmoh Samson kichipa pen, Khristiante lak ah, a theilou a ki-omkei phial diing hi.

Ama hunlai pen, Filistia mite nuai a Judahte om hunlaitak ahi; tuachiin a ni khat a zi Filistia numei kiang a, a vapai leh, a sunghpa in a zi pen, mi dang khat tawh a na kiteengsak a, tuachiin a nau kiteenpih diing in a gen hi; hih thu in Samson a hehsak a, tuachiin si-aal zathum (300) a man a, meisel bawl in a meite uah a khih a, Filistiate louzaau ah a khah hi; hih in Filistia mite a hehsak mahmah a, tuachiin Samson dou diing in a hung kuan uh hi.

Hichih hunlai pen, Filistia nuai a, Judahte a om hunlai uh ahi a, tuachiin Judah upate’n bang diing a hung dou sawm na hi ua, chi a, a na dok chiang un, Samson tung a heh a, Samson dou diing ahihdante uh a genta uh hi. Hih thu Judah upate’n Samson kiang ah a gen ua, tualeh Samson zong Judah upate a kimansak hi.

Tuachi a, Filistiate Samson vaidawn diing a, a hung kuanlai un, Pasian kha a tung ah a hung om a, tuachiin a kikhihna khaute phu-tat in, Samson in Filistiate a dou a, a khutzak zual diing bangmah a muhzok louh ziak in Sabiltung kha-guh khat a tawm zawk a, hua tawh ama’uhte adou a, mi haat tuul khatte (1000) a thatta hi.

Hibang a, a gualzohna lamdangsa a, “Sabiltung kha-guhka that a, amauhte a lomlom in ka sevum hi,” chi hi. Hibang a thu a gen khit in, a sabiltung khaguh tawi a pai hi; tuachiin tua mun Ramath-lehi a kichi hi. A tuachih lai in, a dang a taak mahmah a, tuachiin ama'n Toupa a sam a, “Na sila khutsung ah, hih gualzawhna thupitak na pia hi. Tu in kei, dangtaak in ka si mai diing a ma, ahihke'h tep tanlouhte khut a puuk mai diing ka maw?” achi hi. Tuachiin Pasian in Lehi ah leitang a khipawksak a, tua a ki pan in tui a hung pawt hi. Ama'n tui a dawn khit in, a hung halhthak a, a tha a hung tungkik a, a hingta hi. Tuaziak in tua mun En-hakkore chi'n a phuak ua, tuni dong in Lehi ah a omlai hi (Vai 15:16-19).

"En-hakkore" ahihleh "the spring of the caller," chih leh “The Eye Of The Caller” chih ahi, chi in Bible Dictionaryte’n a gen taangpi uh hi. Hih pen gualzoh nung , beidon thu-ngetna, Pasian in a dawnna chiamtehna ahi.

Leitung ah mi guallelte bek in Pasian min lou uh hi a, i theihlai un, mi gualzoute in Pasian min loh a ngaizaw thamtham ahihdan ngaihtuah thak diing a hoih mahmah sil poimawhtak ahi.

Innveng kinialte zong, a guallel pen in “Pasian in theih heh” chi in Pasian min lou nuam chitchiat ua, hilezong a gualzoute in Pasian min a lohlam uh kithei tamlou hi.

Gualzohna ban ah tawlna, bahna leh beidonna omthei ahihlam theithak ni. Mi guallel hi in mi gualzou hita lehang zong, thuumna tawh Pasian kiang zot diing ahihlam mangngilh kei ni!

“En-hakkore” ahihleh “thuumtute hinna tui” chiamtehna ahi a, hih pen Pasian in thuumtute kiang bek a, a piak ahi, chih thei in, i hinkhua uh thuumna tawh kidim hinkhua hisak ni!