KHRIST TAWH VAAK KHAWM DIING IN

 

“Ka sil bawl pen a ngaihna ka theikei hi; bangziak in ahia i chihleh, ka sil bawl ut pen ka bawlkha theikei a, hilezong ka huatlamtak ka bawlkha zeelzaw hi.” (Rom. 7:15).

Ahi; a dik mah ahi. Keimah ah sil hoih bawl diing utna pen a om a, hilezong hua sil hoih pen ka bawlkha theikei hi. Hih ka bawlkhaak theihlouhna laitak in keimah a hung vua a, hua pen naa sa in ka kapkha zeel hi.

Hih mihing gam ah, Pasian gam diktak pen tuhlut a ut gige hi; tuachiin Toupa a ka lungdamna pen ka haatna ahi chih thei kawm in, ka thuum zeel hi.

Hilezong Toupa a ka lungdamna pen, a lehlamtak ah a na luangbei dekdek zeel a, hua in a hung chimohsak zeel hi.

Tuachiin Toupa a ka kipah theihlouhna in a hung leh-vuak a, a hung bahsak mahmah zeel hi. Toupa na hutdamna sung a om lungnuam a kipahna pen hung pia in, chi a thuum bang a ngaikha zeel hi; hilezong a dawnna pen Toupa;n a hung musak kei hi.

Lungsim damtheitak neih sam diing ka lunggulh a, mi zousiah tung a lemna tuntu leh mite theihdan a lungsim leh taksa a damtheih bang a om sam diing zong ka ut mahmah hi.

Hilezong maw, hih ka mihing lui pen ka kep zohlouh hun a tam mahmah hi! Keimah ah Khrist mizia hilou, mizia dang a om tamluat ziak in ka buai a, tuachiin ka bah mahmah hi!

Hilezong hung ittu Khristta ziak in ka kipak hi!

Eden khelhna ziak a, a hung hutkhiat chiangtan a hunsak lou in, Amah (Jesu) in, hih ka simlei mizia kikukkalhtak ziak a ka buainate a pan in zong a hung hunkhia diing hi chih a hung hilh hi. Ka haatlouhnate tungtawn a haatna ka neihna diing lampi Khrista ahihlam ka na theihak mahmah hi.

Tuni in i tawpsan theihlouh Taksa miziate, Khrist tawh pang in tawpsanta ni aw!

Keimah a awm khelhna in, gimnam nei henla hileh, ka namsia mahmah diing hi! Hilezong Khrist tawh ka kituah nungsang, ka namtui deuh samta hi; hilezong hite saang a namtuina diktak pen, Khrist tawh zawkkhawmna ah a om hi.

Ka theih ngailouh ka theihthak khat ahihleh: Eimah a sil hoih bawl utna doudaltu ziak a, poisakna neilou a, nuamtak a lemchin (acting) hinkhua hung zangsaktu kua ahia, bang ahia, chih ahi hi.

Hichibang lemchinna hinkhua kawm ah, mahni ki-ngaihsanna a om a, hua in kha a i omna diing mun uh a na dalzaw zeel hi.

Tuachiang in, a nihna diing ah; “Hih lei taksa in kha a dou a, kha in zong taksa a dou hi.” Eimahte ah, taksa mizia hoihloute doutu diing kha omlou ata diam, gingtu bangkim bawlthei a kitam mahmahta mawk hi. Sual poisakna neilou gingtu hihkhaak diing bang a lauhuai in, a mulkin-huai mahmah hi. Aziak pen hichibang mizia in, Pasian deihbang siangthpuna lampi a hung zuisak theikei a, hua in i hinkhua uah uihna (namsiatna) a hung tunzaw hi.

Khristian hinkhua pen, kha siangthou panpihna tawh ni teng a gahsuanna hinkhua zakna leh malam nawt a kalsuanna hinkhua zakna ahizaw hi; chih pen i zilthak mai aw!

Ching a i omna Toupa, hoih dinmun i luahtheih na Toupa ahi a, Amah vang in i hoih toutoulai diing uh hi.

Khristian hinkhua pen siangthou ngal, haat ngal, chihlam ahikei a, niteng a Kha Siangthou hung lamkaihna tungtawn a sual (khelhna) sihsanna ahizaw hi.

Ka naih Pasian pen Vaak ahi a, Amah ka naih tan in kei a om sual (khelhna) a kilang chiang deuhdeuh hi!

Simtu deihtak aw, na haat louhnate ziak in, na dah mahmahta hiam? Khrist ah ki-nem in aw!

Khrist vaak ah na khelhna leh haat louhnate a kilang chiang mahmah hi, chih mangngilh ke’n aw! Diabol in pen ahihleh bangchi-chi hiam in na lungsim a thunun sawm ngei diing a, hih leitung danbang a kalsuan ngam diing in zong a hung hantawk kha-diing hi, chih thei inla, i hoihlou hunlai leh i hoih hun a zong hung it zingtu amh Khrist ah zungdet neih sawm in aw!