Siamchiilbu/ Genesis Hilhchetna (E-27)

 

SIMMUN

27

 

Text                : Siamc 11:1-9

Thupi              : Mihing in bangteng sawm lezong, Pasian

                           deihna mah taangtung hi.

Taangvom      : Tuakhit in ama'un, “Hung pai un, eimah

                         a diing in khopi khat i bawl diing ua,

                         innsawng sang, a vum vaan holh di'n bawl

                         ni hang in, i min uh thangsak ni; tua ahih

                         keileh leitung gam teng ah i kithehthaang

                         zaak kha diing uh,” a kichi uh hi.

                                                                        Siamc 11:4

Thupatna

“Mihing lungsim in bawl diing tampi a ngaihtuah maithei hi, hilezong Toupa deihna tawh kituak a phuhdet ahi diing hi.” (Thu 19:21). “Lungsim a tupnate mihing a ahi a, hinanleh leii a dawnna pen Topa a kipan ahi zaw hi. Mihing lampite a ma mitmuh in a siangkha maithei diing hi, hilezong Toupa'n a hinna kha uh a sel-khai tou vingveng hi. Na nna sep diingte Toupa kiang ah aap in, tua hileh na tupnate a taangtung diing hi.” (Thu 16:1-3)

Siamc 11:1-9. Pasian deihna tawh kituak lou sawmnate bangmahlou ahi hi: Siamchiil bung 11na ah, Babel tawh kisai a, mihingte tupna pen, Pasian thupiak kalh a gamtatna ahi a, hichibang khelhna tung ah Toupa’n thu a khen a, tualeh a hehpihna in kithakpatna diing a bawl hi.

Adam a khial a, Pasian in a puan diing bawlsak in a tuam a, tuachiin leitung Tanpa diing khat a sawl diing, chi in thuchiam a bawl hi. Kain in Abel a that a, hilezong Pasian in Ama mizia a paipih diing in Seth a pia hi. Hih Seth mite’n Pasian limsaklou Kanaan mite a kiteenpih ua, tuachi a a khang uh a buah ziak in, Pasian in tuiziin tawh leitang a sawp lawh hi; hichibang ahihlai in Noah leh a innkuante a ginna ziak ua hutkhiat ahi uh hi. Tuiziin khit in Noah tapa thumte tungtawn in leitung ah mihing a hung pung hi. Hilezong Noah tungtawn a leitung a kithakpatna (mihing khang kipat-thakna) pen ah, Pasian kalh a siatna huaisetak muh diing a om hi.

Pasian kalh a mihingte gamtatna: Pasian in tampi a pung a, leitung a kithehzaak diing a thu a piak lai in, Nimrod khopi Babulon ah a hung paikhawm ua, huasung ah a teengkhawm ua, innsawng saangtak a lam ua, hua pen Babel a kichi hi.

“Babel innsawng” pen “Ziggurat” chi a theih in zong a om hi. Tualeh hih “Ziggurat” chi a kithei Babel innsawng pen, a sawngnuai lam lian, a zum toutou a kilam ahi a, a inn pulam pan a zong a dawn a kitungthei diing a bawl hidan a gen in a om hi. Hih hunlai a mite’n hichibang inn a lamna ziak uh ahihleh Pasian kumpi-touna suanna diing or suhna diing a hikei a, hilezong ama’uh biak pasian pen vaan pan a hung kumsuk a, ama’uh tawh a kimuhtuah theihna diing uh ahi.

Tualeh “Babel” i chih chiang un, Babulonte a diing in, “pasiante dawngkot (the gate of the gods)” chihna ahi a, a

Hebrew kammal ah “Balal” a kichi a, hih pen lung-am or ngaihtuahbuaisak (confusion) chihna ahi. Hisung a mite buaizaakna pen Pasian in pasiante dawngkot a thu a khenna a hung kipan ahi a, tuachiin pasiante dawngkot kichi pen ngaihtuahbuaina dawngkot a suakta hi. Tualeh hih Babel project pen Pasian lak a gamtat khelhna hilou in Pasian kalh a langpanna ahi a, tuachiin Pasian in a tupna uh bangmahlou a suaksak hi.

 

Mihingte innsawng tunna         Pasian kumsuk

Siamc 11:3-4                                      Siamc 11: 5

 

Mihingte thuphuan                   Pasian thuphuan

(Pasian tawh kigamla di)         (Mihing tawh kinaih di)

Siamc 11:3-4                                            Siamc 11:6-8

 

Mihingte teenkhawm               Pasian in mihingte khenzak

(Siamc 11:2)                                                  Siamc 11:7

 

Mihingte haam kibang            Pasian in mihingte haam

Mi zousiah kihouthei              kitukalhsak (Siamc 11:8-9)

(Siamc 11:1)    

 

Charles Beard kichipa’n, “Babel pan a Belshazzar (Dan 5) leh Herod (Nas 12:20-25) pan a Hitler chiangtan ah, Pasian in a deihna tawh kikalh a gamta mite a thudon louhdan pen a tung ua sil, a tunsakte tungtawn in a kilangsak hi,” a chihbang in Laisiangthou in, “Kiletsakna lungsim in puuksiatna a tun hi,” (Thu 16:18) a chi hi; Babel innsawng lamna a pang mite tung a sil tungte zong, hih Laisiangthou a i muh uh tawh kibang ahi.

Bible in Babel innsawng letdan genkei lezong “The book of Jubilee” kichi laibu in Babel innsawng pen “meter 2484 a saang a hi a, hih pen Burj Khalifa bangbang 3 kipehtou leh hua tawh kibang a saang ahi,” a chi hi.

 

 

Theihbeh/ Zilbeh Diingte: Babel tanchin pen taanglai mite tanchin leh khangthu bek ahikei hi; aziak pen Babel leh Babulon in kha-lam hinna ah, tulai gingtute a hung tawk or chou (challenge) mahmah hi.

1. Pasian in zakmoh neilou: Babulon pen khopi thupitak a hung hi a, tuachiin 606-586 BC, hunlai in Pasian in thumanglou leh genhaktak a om, a nam teel Israelte soisakna diing in a na zangh a, tuachiin Babulonte’n Judah leenggam la in a khopi Jerusalem zong vuivai a suah ua, mihing a tuul a simte gaal-hingmat in a kai ua, tuachiang in Babulon ah Judahte kum 70 sung sal in a taang uh hi. Pasian in nang, banglam ah a hung zang in na kithei a?

 Laisiangthou ah Babulon pen, leitung kisaktheihna, omdan a siatna leh langtangtak a Pasian kalhna chihte limlahna ahi a, hih tawh kigaalsai (ki-opposite) in Pasian thupina langsaktu Jerusalem a om hi. Jeremiah 50-51 leh Kil 17-19 ah hih khopi tegeel a na enkaak in. Siamchiil Babulon, Nimrod in leitung pumpi kipumkhatna (Worldwide unity) hi diing a, a na sawmna pen ni khat ni chiang in Pasian limsaklou Satan paidante tungtawn in a hung om ngei diing hi.

2. Gingtute pen Pasian a diing a innsaang (tower) lam diingte i hi uh hi: Psychotherapist Naomi H. Rosenblatt in, “Khang zousiah a mite’n ama’uh innsaang (Tower) diing a kilam chiat uh hi,” chi a, a na genbang in, mi zousiah in eimah a diing in bang hiam bawl a kisawm chiat hi; hichibang ahihlai a gingtute’n i theih diing uh ahihleh, hih leitung a Khrist pawlpi lam a pichingsak diingte i hi ua, Pasian a diing a innsaang lam diingte i hi uh hi.