Siamchiilbu/ Genesis Hilhchetna (E-26)

SIMMUN

26 

 

Text                : Siamc 10:1-32

Thupi              : Innkuan khat suan-le-khaakte

Taangvom      : Hite ahihleh Noah tapa Shem, Ham leh

                          Jafeth-te ahi uh hi; tuiziin tunkhit in,

                          ama'uh sung a kipan in tapate a hung

                          piang hi.

                                                                        Siamc 10:1

Thupatna

Siamchiil bung 10 na pen “Namte kichiamtehna dawhkan or suangpek” leh “Taanglai tanchinte kigelhna (annals)” chi a theih in a om hi. Tualeh hih bung leh taangte’n a tup pen ahihleh taang 1na leh 32 na ah muh in a om a, hih pen 1Khangthute bung khatna ah zong muhtheih in a om hi.

Siamc 10:1. Theihkhial louh diing! Hih bung leh taangte zil a, kha-lam hinkhua a diing a zillai hoihtak i muhna diing ua, i theihkhial louh diing uh thu bangzah hiam a om a, huate ah i lungsim uh i pia masa diing uh hi.

Khatna: Siamchiil 10 na a kigelh minte leh a suan-le-khaakte uh ahihleh, a mi taktak omlou a, khang pai diingdante etsakna dan a kigelh ahikei hi. Hih laibu gelhtu in, taanglai mite pen, “A nam nam, a beh-beh leh a innkuan-kuan in gam a nei ua, a ma'uh haam chiat in a haam uh hi” (Siamc 10:31) chih a hung hilh hi. Hih pen, a tomlam a gen in, khangthu, gamthu leh taangthu (History) kigelhna laibu ahi.

Nihna: Hisung a kigelh teng pen a bukimta chihna ahikei hi. Etsakna diing in, Laisiangthou khangthu or taangthu kisuutna diing a poimawh mahmah hilezong, Edom, Moab leh Ammon chihte a na kigelh kei hi. Tualeh hisung a Nam or mi omte 70te ahihleh gualtuak ahi a, Jakob innkuan, Egipt a paisuk 70te (Siamc 46:27; Pawt 1:5), leh Jesu’n Thu gen diing a, a sawl nungzui 70te (Lk 10:1) tawh a paidan a kibang sim hi. Mi/nam dangte poimawhlou chihna hikei lezong 70te pen poimawh diak hi.

Thumna: Hisung a kigen nam khenkhatte theihchian a haksa a, a tulai min diing uh zong a genhak mahmah hi. Aziak pen, kum a-100 a-100 asim a pai nung in, namte’n a min uh, a teenna gam uh leh a haam mahmah uh zong a kheel thei ua, tualeh mi dangte tawh kiteenna (intermarriage) ziak in zong, ama’uh khanglui hinkhua pen a nusia thei uh hi.

Siamc 10:2-5. Jafeth suan-le-khaakte: Jafeth tapa, mi sagihte min leh, Jafeth tapa sagihte lak a nihte a kipan a Jefeth tupa mi 7te min muhtheih in a om hi. Jafeth tapa dang 5te a kipan a tapa omlou chihna ahithei diam? Jafeth ahihleh Gentel namte pubul ahi a, ama’uhte Kanaan gam mallam leh tumlam ah a teeng uh hi. Ama’uh pen mi khanglian leh gam tuamtuam in zong siah a na piaknate ahi uh hi (Laate 72:8-10).

 

Siamc 10:6-20. Ham Suan-le-khaakte: Kush ahihleh taanglai Ethiopia ahi a, Mizraim pen Egipt ahi a, tualeh Put pen Libia ahi maithei diing hi. Kanaan ahihleh simmun 25na ah i na genta uh hi. Tualai a Ham suan-le-khaakte teenna dan a i theih uh ahihleh, Egipt, Palestine, Sudan, Saudi Arabia leh Yemen ahi.

Nimrod: Ham tapa taak pen Kush ahi a, Kush tapa taak pen Nimrod ahi. Nimrod minthanna pen ahihleh a leenggam tunding or bawlkhiat pen ziak ahi (Siamc 10:8-12). Tualeh Laisiangthou a amin a na kigelhna ziak zong, Israel taangthu a diing a mi poimawhtak ahihziak ahi. Nimrod ahihleh leitung a gaal-haat minthang masa pen, Toupa mai a sabeng haat (t. 8-9) a kichi hi. Hisung a i kammal zakh, “Haat” chih in a gennop pen ahihleh “Gualtungtung (Champion), hangsanna leh tha-le-zung a guaktungtuang chihna ahi.

Nimrod in a lamkhiat khiopite ahihleh Shinar (Babylonia) ahi a. tualeh Assiria gamsung ah khopi li a tungding hi. Babylon leh Assiria ahihleh Israelte meelma ahung suak ua, ama’uhte pen Pasian in ami thumangloute sawina (thuhilhna) diing in a na zang hi. Tualeh Babylon tungtaang pen simmun hung omlai diingte a i zil touh lai diingte lak a khat ahihziak in, hisung a, kimtak in i enkei diing uh hi.

Samc 10:21-31. Shem suan-le-khaakte: Shem ahihleh Babel tanchin leh Abraham khangthu tawh kizopna hoihtak nei (Siamc 11:10ff) ahihziak in eite’n i nukhiksak uh hi. Shem tapa nga-te min gelh lezong, i suulzuih diing uh ahihleh Arphaxad ahi; aziak pen amah ahihleh Eber pu-sawn (t.24) ahi. Tualeh Israelte nampa Abraham zong Eber suan a hung kipan ahi a, a tanchin uh ahihleh bung 12 na ah a om hi.

Hisung a kikup ngai khat ahihleh 10:25 na a, Peleg damlai a “Leitung kikhen,” chih thu ahi. Hisung a leitung kikhenna in a gen nuam hi diing a taksan om mahmah khat ahihleh, bung 11 na a namte kikhenna ahi. Hichibang ahihlai in student khenkhatte’n hih pen a gam gam a kikhenna hi diing in a gingta uh hi.

Zillai Poimawhte:

1.     Hih simmun a i muh uh mite leh a luahna uh gamte a kipan in, Pasian pen namte goutan diing hawmsaktu (Daan 32:8) leh a siamsa mihingte a diing a gamgi khunsaktu (Nas 12:26) ahihna zilkhiat theih in a om hi. Nimrod bang a leeng gilou tampi omta lezong, Pasian pen khangthu or taangthu (history) leh gam-leitang (geography) Pasian ahi a, Ama’n sil zousiah a thunun (control) hi. Pasian in a kamchiamte a semkhia a, tualeh Noah in a tate tungtaang thu diing a genkholhna thute zong a taktak in a tung hi.

2.     Mihingte pulam kilatdan (external differences) tuam in kibangkei lezong, innkuan khat pan a kipankhia vive i hi uh hi. Pasian in mi zousiah, “Sisan bul munkhat,” (Nas 17:26) suan a, a hung bawlte i hih ziak un, kuamah a nam neu leh a nam lian deuh diing chihbang a omkei hi (en in, Thu 22:2).

3.     Namte’n a sepsuah diing ua Pasian sil tup a om hi. Israelte ahihleh Pasian nam teelte (Siamc 9:24-11:32) ahi uh a kichian hi. Hitalezong Pasian in a nam teel Israelte khutzak in a nei tuamkei a, Egipt, Babylon, Assyria, Media-Persia, leh Rome mite zong, a tup-le-ngimte taangtun sakna diing in a zangh hi. Pasian in milim pasian bia kumpi Nebukadnezzar, Siras (Cyrus), Darius chihte baan ah, Augustus Kaisar (Caesar) chihte zong, a sil tupte mualsuah ahihna diing in a zangh hi.

4.     Pasian in nam zousiah a ngaihsak hi. Laate ah “Gam zousiah” chih leh “Nam zousiah” chih kammal pen (Laate 66:1-8) leh Laate 67na ah muh in a om a, hih in mi khentuam a neikei a, mi zousiah in Pasian a theih ua, a nna a sep diing uh a deih hi. Leitung pumpi a Gospel thu kaangkou diing pen Thukhun Thak bek tupna ahikei chih zong a kichian hi.

5.     A tawpna pen in, Siamc 9-10 pen, Israelte’n Kanaan gam a luah hun chiang ua diing a, a tha-ngahna mahmah uh ahikha thei diing hi. Aziak pen, Pasian nam teelte ahihna uh hoihtak in a kithei ua, tualeh Kanaan pen ama’uh sila ahi diing hi. Tuachiang in Kanaan gam a gualzohna pen Pasian thuchiam ginna ziak a gualzohna ahih diing ziak in, Joshua pen Pasian Thu ngaihtuah diing a thupiak in a om hi (Josh 1:8).

Noah tapa thumte’n leitung ah chi-khah tohpawi (mixed legacy) a nusia ua, hilezong namte Toupa pen a thunei penpa ahi a, khangthute ama khangthu ahi hi.