Siamchiilbu/ Genesis Hilhchetna (E-24)

SIMMUN

24

 

Text                : Siamc 9:8-17

Thupi              : Noah kiang a Pasian thukhun

Taangvom      : Nang tawh ka thukhun ka phutkipta,

                          tuiziin tawh hinna nei sa chikimte ka

                          beimangsak nawn kei diing a, leitung suse

                          diing in tuiziin ka tungsak nawn kei diing

                          hi,” a chi hi.

                                                                        Siamc 9:11

Thupatna

Pasian in Noah leh a tapate kiang bek a hih thukhun a chiam bang in kilang lezong, Noah khang a kipan a khang hung omlai diingte a diing in zong ahi (t. 9, 12). Tuaching in hih thukhun pen hi chiangtan ah a beikei a, sil siam hinna nei zousiah (t.10) leh ganhing zousiah (t.15) tawh kaal ah zong a om hi. Tuachiin hih thukhun in mihingte, gantate, vasate leh gamsate a huamkim a, thukhun lamdangtak bang in a kilang hi.

Hih thukhun ah, Pasian in chiangtan neilou in, kam chiam or thu chiam a nei a, zil diing leh theih diing a poimawh tampi zong a gen a, huate a zilkhiat i sawm diing uh hi.

Sil siamte tawh thukhun: Hih thukhun a, Pasian in “Sil siam hinna nei zousiah” (t.10) chih in a gen pen ahihleh, tembaw sung a Noah in a ompih ganhing namkimte ahih na tawh kiton in, Pasian in a siamsa ganhingte zong a ngaihsak mahmah hi, chih a muhtheih hi.

John in a mangmuhna a neilai a, vaangam laltouna inndan sung a muhlai in, ganhing lamdang li a mu a, ama’un asuun-azaan a khawllou in, Pasian a bia ua, tualeh ama’uhte meel pen a tuam chiat ahi (Kil 4:6-7). Ganhing masa pen ahihleh humpinelkai bang ahi a, ganhing nihna pen ahihleh bawngnou bang ahi a, ganhing thumna pen in mihing melbang apua a, tualeh ganhing lina pen muvanlai lenglai bang ahi. Hisung a maitang kibanglou ganhingte pen, Siamc 9:9-10 na a i muh uh: gamsate, gantate, mihingte leh vasate tawh kibang, Pasian hih thukhun a bawlpihte ahi, a chihtheih diing hi. Tualeh Pasian laltouna mai a hih ganhingte a va omna ziak uh ahihleh, Pasian in a siamsate a ngaihsak dan a kilatna ahi.

Hih ganhingte’n a hung ngaihtuahsak ahihleh, silsiamte’n zong a siampa uh phat in, hichibang a ama’uhte siampa a phatna uah nuam asa uh, chih ahi.

Chiamtehna Thukhun: A thukhun a theih na diing ua a mite a huhna diing in, Pasian in muhtheih chiamtehna apia hi. Pasian in Abraham tawh a thukhun a na bawllai in teptanna tawh a kipsak (sealed) a (Siamc 17:11; Rom 4:9-12), Sinai mualtung a Mosi tawh a thukhun ahihleh nipikaal simsial a sabbathni (Paw 31:16-17) tawh a kipsak hi. Tu in, Pasian in Noah leh a sil siam hingte tawh a thukhun pen sakhi-tuihup tawh a kipsak hi. Hih sakhi-tuihup pen, mite’n a muh chiang ua, guahpi ziak in tuiziin a tung nawnkei diing a, mihingte zong leitung a kipan in phiatmang a hi nawnkei diing chih a

theih theih na diing uh ahi. Pasian in Noah leh a innkuante kiang a sakhi-tuihup thu a genlai in, bangiam sil thak, a theih ngailouh uh thu gen tawh a kibak louh ziak in, sakhi-tuihup pen tuiziin masang pan a na omsa hileh a kilawm hi.

Sakhi-tuihup omdan pen nisa-zung or nisa-keng in huih lak a om tui a kikhiitna (filtering) pan a hung omdan a gen in a om hi. Aziak pen huih lak a om tuite, amal-mal a kia pen nisa in a khawh chiang in, siik tampi nei (prism) bang a chiim in a om a, hua pen nisa vaak tawh ahih chiang in zeem (colour) nei in a hung om hi.

Sakhi-tuihupte kitanbaih mahmah lezong a etlawm mahmah a, hua pen mi tampi’n hoihtak a etchian kisawmlou hi. Tualeh a zeem uh etlawmtakte’n a hung ngaihtuahsak ahihleh, Peter in “Pasian hehpihna chii tuamtuamte (the manifold grace of God- 1 Peter 4:10) a na chi hi. 

Sakhi-tuihup ahihleh leitung mun chinteng a mi zousiah theih ahihbang in, Pasian hehpihna zeem tuamtuamte zong leitung pumpi a diing in a kiching hi. Aziak pen Pasian in leitung a it mahmah a, tuachiin a tapa neihsun Jesu a pia a, (Jn 3:16) tualeh Jesu Khrist pen, leitung khelhna pua in, singlamteh tung ah a si hi (1 John 4:10, 14).

Hichibang ahihlai in, Sakhi-tuihup pen eite muh diing bek ahikei hi; aziak pen Toupa’n, “Meilumte lak a sakhi-tuihup a hung kilat chiang in, ka en diing a,” (Siamc 9:16) a chi hi. Hih in a taklat ut ahihleh, Pasian in a mite tawh a thukhun pen a mangngilh kei a, a theizing hi, chih ahi. Eite’n sakhi-tuihup i muh chiang un, vaan a om i Pa un zong, a omna mun pan in a na en a, tuachiin a mite tawh a thukhun a theizing hi.

 

Sakhi-tuihup thumte: Laisiangthou sung ah, mi thum in kawknei or etsakna nei sakhi-tuihup muhdan kibang lou in a mu ua, ama’uhte ahihleh Noah, Ezekiel leh John ahi uh hi.

Noah in, tulai a eite muhbang in khopi-guah a zuk khit in a mu hi. Hilezong Kamsaang Ezekiel in, sakol-leengpeite leh laltouna tawh kisai a mangmuhna a neihlai in, khopi-guah or guahchiin hunlaipi in a mu hi (Ezk 1:28). Hichibang a mang-muhna a neihlai mah in, Ezekiel in, ganhing li, meel tuam pua chiatte zong a mu hi! Khat pen mihing bang, a dang khat pen humpinelkai bang leh a dang khat pen muvanlai bang ahi a, hua pen John in amuhte mah tawh kibang ahi (Kil 4:6-7).

Tualeh Sawltak John in, laltouna a kipan a thukhenna phuankhiat or genkhiat ahih masang deuh in a mu hi (Kil 4:3). Hih sakhi-tuihup pen leitung ah themkhat bek in i mu ua, hilezong ni khat ni chiang in, vaangam ah ama’uh hihna bangbang in, bukimtak in i mu diing uh hi (1Kor 13:12).

Hih tawh kisai a Pasian mite a diing a zillai hoihtak ahih leh hih ahi: mihing hinkhua ah khopiguah a zuk hun a om a, hichibang hun chiang a, eite’n Pasian thukhun kichiam na sa-khituihup pen i et diing uh ahi. John mahbang in khopiguah zuk masang in hua sakhituihup pen na mukha maithei diing hi; Kamsaang Ezekiel mahbang in khopiguah or guahchiin ni in na mu maithei diing hi; ahihkeileh lah Noah mahbang in, khopi-guah a theu hun nan gak zong a ngai mai-thei kha-diing hi. Hilezong, Pasian kamchiam thukhun sakhi-tuihup pen, ginna tawh na et a ahihleh, bangchiktan in zong na mu diing hi. Hua ahihleh Thukhun Lui hunlai Rom 8:28 na ahi hi.

Silte siampa Pasian pen hotdamna Pasian ahi. Na lungtang tengteng in Toupa gingta in, tua hileh, “Hih pen ka Pa leitung ahi,” chih la ana sa-thei taktak diing hi.